گرۋزيانىڭ پرەزيدەنتى مەن پرەمەر- ءمينيسترى شەتەلگە ساپارلاپ شىعۋعا تالاسىپ ءجۇر

ءبىرىن يراكلي گاريباشۆيلي باسقارسا، ەكىنشىسىن ەل پرەزيدەنتى گەورگي مارگۆەلاشۆيلي باسقارادى. كورشى اۋىلعا بارا جاتقان ەمەس، شىعىس ەۋروپادان مۇحيت اسىپ، امەريكا قۇرلىعىنا جەتۋ دە وڭاي شارۋا ەمەس، كولىكتىڭ شىعىنى دا ايتارلىقتاي. ءبىراق ولار ءبىر ۇشاق كوتەرسە دە، بىرگە بارماي، جەكە- جەكە ۇشاقپەن بارادى. ءبىر ۇشاققا باستارى سىيمايدى.

ءبىر كۇن بۇرىن بارعان پرەمەر- مينيستر ب ۇ ۇ باس اسسامبلەياسىنىڭ مەرەكەلىك 70- سەسسياسى اياسىندا ورنىقتى دامۋ سامميتىندە ءسوز سويلەپ، گرۋزيا الدىندا تۇرعان وزەكتى ماسەلەلەرگە توقتالدى: حالىقتىڭ سالاماتتى ءومىر سالتىن قامتاماسىز ەتۋ، ەنەرگيانىڭ ارزان دا قازىرگى كوزدەرىنە قول جەتكىزۋ، يننوۆاتسيالاردى ەنگىزۋ، بارلىق ادام ءۇشىن ادىلەتتىلىك ورنىقتىرۋ. سونداي- اق، ابحازيا مەن سحينۆال ايماعىندا ۇيلەرىن تاستاپ كەتكەندەردى ورنالاستىرۋ دا باستى مىندەت قاتارىندا. ەل پارلامەنتىندەگى ەكى وپپوزيتسيالىق پارتيا پرەمەر- ءمينيستردى گرۋزيانىڭ ءبىرشاما اۋماعىن كورشى ەلدىڭ باسىپ العانىن ايتپادىڭ دەپ سىنادى.

وسى ساپارى كەزىندە گاريباشۆيلي ا ق ش پرەزيدەنتى باراك وباما ۇيىمداستىرعان ب ۇ ۇ- نىڭ بىتىمگەرلىك قادامدارىنا ارنالعان الەم ليدەرلەرى سامميتىندە دە ءسوز سويلەپ، ب ۇ ۇ باس حاتشىسى پان گي مۋنمەن جەكە كەزدەسۋدى دە وتكىزدى. سونداي- اق، ول باراك وباما مەن ميشەل حانىم ۇيىمداستىرعان كلينتوننىڭ سىيلىعىن تاپسىرۋ سالتاناتىنا دا شاقىرىلدى.

ال پرەزيدەنت گەورگي مارگۆەلاشۆيلي ساپارىنىڭ ماقساتى نە؟ ەڭ الدىمەن، باس اسسامبلەياسىنىڭ سەسسياسىمەن قاتار وتكىزىلىپ جاتقان الەمنىڭ ايەل ليدەرلەرى كەڭەسى ۇيىمداستىرعان ديسكۋسسياعا قاتىسپاق. ونى سول كەڭەستىڭ ءتورايىمى ليتۆا پرەزيدەنتى داليا گريباۋسكايتە شاقىرىپتى. سونان سوڭ وسىندا كەلگەن ءبىراز ەلدىڭ باسشىلارىمەن، ونىڭ ىشىندە ۋكراينا پرەزيدەنتى پەتر پوروشەنكومەن دە كەزدەسپەك.

وسىنىڭ بارلىعىن، باسقا ەلدەردەگىدەي، گرۋزيانىڭ ءبىر باسشىسى دا اتقارۋىنا بولار ەدى. ال بۇلار تالاسادى. ءبىرازدان بەرى تالاسىپ كەلەدى. اسىرەسە، بىلتىر ب ۇ ۇ باس اسسامبلەياسىنىڭ 69- سەسسياسىنا باراردا دا تالاسقان. 3-4 اپتا بويى ايتىستى.

گاريباشۆيللي: اتقارۋشى بيلىكتىڭ باسشىسى مەنمىن، مەن بارامىن دەدى. مارگۆەلاشۆيللي: گرۋزيا - پارلامەنتتىك ەمەس، جارتىلاي پرەزيدەنتتىك ەل، بيلىك بۇتاقتارعا بولىنگەن، «ەشكىم ديرەكتور ەمەس» دەدى. سويتسە دە، بىلتىر نيۋ- يورككە پرەمەر- مينيستر بارعان. ەل پرەزيدەنتىنىڭ بەدەلىن ءتۇسىردىڭ دەپ مارگۆەلاشۆيلي سوندا وكپەلەپ قالا بەرگەن. ال بيىل قالمادى، جارىسىپ باردى.

بۇدان نە شىقتى؟ ەلدىڭ بەدەلى ءتۇستى. باسقالارعا كۇلكى بولدى دەگەنگە دە كەلەر. ءوز ۇيلەرىندە داۋلاسىپ جاتسا ءبىر ءسارى، بۇكىل الەم باسشىلارىنىڭ كوزىنە تۇسكەندەرى ءجونسىز- اق. ءتىپتى، بۇدان ۇيالماعاننىڭ وزىندە، باسشىلارى ءتىل تابىسا الماي جاتقان ەلدە نە بەرەكە بولماق؟ كەيبىر ساراپشىلاردىڭ پىكىرىنشە، بۇلاردى تالاستىرىپ قويعان دا، ەلدى سىرتتان باسقاراتىن دا بۇرىنعى پرەمەر- مينيستر بيدزينا يۆانيشۆيلي كورىنەدى. كىمنىڭ ءىسى بولسا دا، جوسىقسىزدىق ەكەنى داۋسىز.

ماماديار جاقىپ، جۋرناليست.

«ەگەمەن قازاقستان» گازەتى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى