الەمدىك مىنبەردە - قازاق ءتىلى - باسپاسوزگە شولۋ

«ەگەمەن قازاقستان» گازەتى بۇگىن قازاقستانداعى ەكونوميكاسىمەن قاتار، حالقىنىڭ الەۋمەتتىك جاعدايى توقتاۋسىز دامىپ وتىرعان جامبىل وبلىسىنىڭ باسشىسىمەن بولعان سۇحباتتى جاريالاپ وتىر. وبلىس باسشىسى كارىم كوكىرەكبايەۆ ايماقتىڭ ەكونوميكاسى، اۋىل شارۋاشىلىعىنداعى الىس- بەرىسى، وبلىس ورتالىعى - تاراز قالاسىنىڭ دامۋى، جامبىل وبلىسى ارقىلى وتەتىن «باتىس ەۋروپا- باتىس قىتاي» حالىقارالىق ءدالىزىنىڭ بۇگىنگى جاعدايى تۋرالى اشىق- جارقىن اڭگىمە وربىتكەن.

مىسالى، «ەگەمەن» جازىپ وتىرعانداي، وبلىس ازاماتتارىن باسپانامەن قامتۋ ماقساتىندا بيىل ءبىر تارازدىڭ وزىندە جالپى الاعى 6400 شارشى مەتردى قۇرايتىن 65 پاتەرلى ءبىر تۇرعىن ءۇي جانە قورداي اۋدانىندا 50 پاتەرلى تاعى ءبىر ءۇي پايدالانۋعا بەرىلگەن. ال، «باتىس ەۋروپا- باتىس قىتاي» ءدالىزىنىڭ نە بەرىپ وتىرعانىن ايتا كەلە، اكىم «وسى داڭعىل جولدىڭ ارقاسىندا تاراز بەن الماتى قالالارىنىڭ اراسىنداعى جولاۋشىلار قاتىناسى جاقساردى»، - دەپ اتاپ وتكەن. سۇحبات سونداي- اق 11 -قازاندا تارازدا وتەتىن ۇلى توي تۋرالى اڭگىمەمەن وربىگەن. «تويدىڭ استانادان كەيىن تاراز قالاسىندا وتەتىنى تۋرالى ەلباسى شەشىمىن ەستىپ، قۋاندىم. ءبىراق، بۇل قۋانىشتىڭ ارتىندا ۇلكەن جاۋاپكەرشىلىك تۇرعانىن سەزدىم. حالقىمىزدا «تويدىڭ تاماشاسىن باقپا، تاعىلىمىن باق» دەگەن ءسوز بار. دەمەك، 550 جىلدىعىن اتاپ ءوتۋدىڭ نەگىزگى التىن ارقاۋى - ۇلتتىق قۇندىلىقتارىمىزدى ۇلىقتاپ، دارىپتەيتىن ءىس- شارالار»، - دەگەن اكىم تويعا دايىندىق بارىسى تۋرالى تاعى دا كولەمدى جاۋابىن ۇسىنعان. بۇل تۋرالى «ەگەمەن قازاقستاننىڭ» بۇگىنگى نومىرىندەگى «تويدى تاماشالاپ قانا قويما، تاعىلىمىن دا ال» دەگەن سۇحباتتان وقي الاسىزدار.

***

«ايقىن» رەسپۋبليكالىق گازەتى بۇگىن نازارىمىزعا مەملەكەت باسشىسى نۇرسۇلتان نازاربايەۆتىڭ ا ق ش- قا جاساعان ساپارى تۋرالى قاتار- قاتار بىرنەشە ماقالا ۇسىنىپ وتىر. مىسالى، گازەت ن. نازاربايەۆتىڭ ب ۇ ۇ باس اسسامبلەياسىنىڭ مەرەيتويلىق 70-سەسسياسىنداعى بايانداماسى تۋرالى جازا كەلە، «مەملەكەت باسشىسى ХXI  عاسىردا ادامزاتتىڭ ەڭ باستى مىندەتى الەمدى سوعىس قاتەرىنەن مۇلدە ارىلتاتىن جانە ونىڭ سەبەپتەرىن جوياتىن ستراتەگيانى جۇزەگە اسىرۋعا ءتيىس ەكەنىنە نازار اۋداردى» دەپ جازادى. قازاقستان پرەزيدەنتى بىرىككەن ۇلتتار ۇيىمىنىڭ ءجۇز جىلدىعىنا جاھاندىق ستراتەگيالىق باستاما - 2045 جوسپارىن ازىرلەۋدى ۇسىنعانى دا بەلگىلى. وسى جانە وزگە دە ماڭىزدى مالىمدەمەلەر تۋرالى جازعان گازەت باسىمدىقتى مەملەكەت باسشىسىنىڭ باياندامانى قازاق تىلىندە جاساعانىنا ەرەكشە نازار اۋدارتىپ وتىر. «ال ەلباسى الەمدىك مىنبەردە ۇلى دالا ەلىنىڭ تىلىندە سويلەدى. وسىلايشا، جالپاق الەم ەلباسىنىڭ ارقاسىندا جۇمىر جەر بەتىندە تەك قازاقستان دەگەن مەملەكەت بارىن عانا ەمەس، ونىڭ رۋحتى، اۋەزدى عاجاپ ءتىلى بار ەكەنىنە دە كۋا بولدى. مويىندادى»، - دەپ جازادى «ايقىن». بۇل تۋرالى «الەمدىك مىنبەردە - قازاق ءتىلى» دەگەن ماقالادان تولىق وقي الاسىزدار.

ال ق ر پرەزيدەنتى ن. نازاربايەۆتىڭ ساپار قورىتىندىسى رەتىندە ب ا ق وكىلدەرىمەن كەزدەسە وتىرىپ، قانداي ماسەلەلەرگە توقتالعانىن بىلگىڭىز كەلسە، گازەتتەن «مەملەكەت باسشىسى قورىتىندىسىن جاريالادى» دەگەن ماقالامەن تانىس بولىڭىز.

ب ۇ ۇ باس اسسامبلەياسىنىڭ كەزەكتى سەسسياسىندا الەمدى الاڭداتقان ماسەلەلەر ايتىلىپ جاتقاندا الماتى قالاسىندا باسقا جارىستاردان وزگەرەك - اۋلا سىپىرعىشتار بايگەسى ءوتىپتى. ءوزى جۇمىس ىستەيتىن اۋلانىڭ ءمىنسىز تازالىعىن ساقتاي بىلگەن ءمانجۋوۆ تەكتى ازامات جارىستىڭ باس بايگەسى - 200 مىڭ تەڭگەنى ولجالادى. ەرەكشە جارىس تۋرالى «ايقىننىڭ» بۇگىنگى نومىرىندەگى «ۇزدىك اۋلا سىپىرۋشى اتاندى» دەگەن اقپاراتتى وقىڭىزدار.

***

«ەكسپرەسس- ك» باسىلىمى دا كەشە تۇندەگى «استانا» - «گالاتاساراي» ماتچىنا وزىنشە تالداۋ جاساپ، ەكى كوماندانىڭ مىقتى تۇستارىمەن قاتار، اقساپ تۇرعان قىرلارىن اتاعان. «ەكسپرەسس- ك» بۇل ماقالاسىنا «راحمەت زا پوبەدۋ»(جەڭىستەرىڭە راحمەت) دەگەن تاقىرىپ بەرىپ، ءسوز سوڭىنا «ەتو - رۋح، پو- كازاحسكي» (بۇل قازاقتىڭ رۋحى) دەگەن ەكەن. تولىعىراق باسىلىمنىڭ بۇگىنگى سانىنان وقي الاسىزدار.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى