ارمەنيادا ۇ ق ش ۇ بىتىمگەرلەرىنىڭ جاتتىعۋلارى باستالدى
جاتتىعۋلاردى ارمەنيا رەسپۋبليكاسى قارۋلى كۇشتەرى باس شتابىنىڭ باستىعى گەنەرال-پولكوۆنيك يۋري حاچاتۋروۆ، ۇ ق ش ۇ باس حاتشىسىنىڭ ورىنباسارى ۆالەري سەمەريكوۆ، ۇ ق ش ۇ بىرىككەن شتابىنىڭ باسشىلارى، ۇ ق ش ۇ حاتشىلىعىنىڭ جانە ۇ ق ش ۇ مۇشە - مەملەكەتتەرى مينيسترلىكتەرى مەن ۆەدومستۆولارىنىڭ وكىلدەرى اشتى.
ۇ ق ش ۇ باسپا ءسوز حاتشىسى ۆلاديمير زاينەتدينوۆتىڭ ايتۋىنشا، بۇل جاتتىعۋ جوسپارلى جانە اشىق سيپاتتا. وعان حالىقارالىق قىزىل كرەست قوعامىنىڭ، ب ۇ ۇ بەيبىتشىلىكتى قولداۋ جونىندەگى وپەراتسيالار دەپارتامەنتىنىڭ، باسقا دا حالىقارالىق جانە ايماقتىق ۇيىمداردىڭ وكىلدەرى شاقىرىلدى.
«جاتتىعۋدىڭ نەگىزگى ماقساتى - ۇ ق ش ۇ مۇشە-مەملەكەتتەرى بىتىمگەرشىل كونتينگەنتتەرى اراسىندا ءوزارا تۇسنىستىك پەن ىنتىماقتاستىقتى نىعايتۋ، بىتىمگەرشىلىك مىندەتتەرىن ورىنداۋدا اسكەري بولىمدەر مەن بولىمشەلەردى باسقارۋ جانە بىتىمگەرشىلىك وپەراتسيالارىنا دايارلىقتا بارلىق دارەجەدەگى كومانديرلەر مەن شتابتاردىڭ پراكتيكالىق يكەمدىگى مەن داعدىلارىن ارتتىرۋ. جاتتىعۋ ءۇش كەزەڭدە 5 تاۋلىك وتكىزىلەدى. 4- قازاندا اياقتالادى. مانيۆەرلەرگە رەسەي، ارمەنيا، بەلارۋس، قازاقستان، قىرعىزستان جانە تاجىكستان قارۋلى كۇشتەرىنىڭ، پوليتسياسى مەن ميليتسياسىنىڭ وكىلدەرى قاتىسۋدا، - دەپ مالىمدەدى زاينەتدينوۆ.
«مىزعىماس تۋىسقاندىق-2015» جاتتىعۋلارىنا بارلىق مەملەكەتتەردىڭ بىتىمگەرشىل كۇشتەرىنىڭ شەكتەۋلى كونتينگەنتى قاتىسۋدا. قاتىسۋشىلاردىڭ جالپى سانى - 600 دەي ادام، جاتتىعۋعا 50 گە تارتا تەحنيكا، سونىڭ ىشىندە تىكۇشاقتار مەن ۇشقىشسىز ۇشاقتار تارتىلعان. ۇ ق ش ۇ- داعى بىتىمگەرشىل كۇشتەردىڭ جالپى سانى بۇگىنگى تاڭدا 3600 ادامدى قۇرايدى.
