استانادا ساۋد ارابياسىنىڭ قازاقستانداعى ەلشىلىگى كورولدىكتىڭ ۇلتتىق كۇنىنە وراي رەسمي قابىلداۋ وتكىزدى
سالتاناتتى ءراسىمدى اشقان ساۋد ارابياسى كورولدىگىنىڭ قازاقستانداعى توتەنشە جانە وكىلەتتى ەلشىسى گۋرم بەن سايد ال مالحان ءوز سوزىندە ساۋد ارابياسى كورولدىگى (س ا ك) قۇرىلعالى بەرى دامۋ جولىندا كوپتەگەن ىرگەلى قادامدار جاساپ، قازىرگى تاڭدا حالقىنا جانە وندا تۇراتىن ازاماتتارعا ەڭ جوعارى دەڭگەيدە قىزمەت كورسەتەتىن ەلگە اينالعاندىعىن اتاپ ءوتتى.
«ساۋد ارابياسى كورولدىگى الەمدەگى ەڭ كوپ گۋمانيتارلىق جانە دامۋ جولىندا كومەك كورسەتەتىن 10 ءىرى مەملەكەتتىڭ ءبىرى بولىپ تابىلادى. ب ۇ ۇ- نىڭ ستاتيستيكاسىنا سايكەس، وتكەن جىلى 6- ورىندى يەلەندى. سوڭعى 40 جىلدا كورسەتكەن كومەگىنىڭ جالپى كولەمى 115 ميلليارد دوللاردان اسىپ، الەمنىڭ 90 نان استام ەلىنە كومەك كورسەتتى» ، - دەدى ەلشى ءوز سوزىندە.
ول سونداي- اق ساۋد ارابياسى كورولدىگىنىڭ كورولى، قوس كيەنىڭ ساقشىسى، ءسالمان بەن ابدۋلازيز ءال ساۋد جانە ق ر پرەزيدەنتى نۇرسۇلتان نازاربايەۆتىڭ باسشىلىعى اياسىندا ەكى ەل اراسىندا ەكىجاقتى دوستاستىق قارىم- قاتىناستىڭ ورناعاندىعىن ەسكە سالدى. بۇل ىستىق ىقىلاس سوڭعى جىلداردا ودان ءارى تەرەڭدەپ كەلەدى. 2014 -جىلى قاراشا ايىندا ەر- رياد قالاسىندا وتكەن بىرىككەن قازاق- ساۋد كوميسسياسىنىڭ 4- وتىرىسى سونىڭ ءبىر جارقىن كورىنىسى ىسپەتتەس. ەسكە سالا كەتسەك، بۇل كوميسسياعا قازاقستاندىق تاراپتان ق ر ينۆەستيتسيا جانە دامۋ ءمينيسترى ءتوراعالىق ەتكەن بولاتىن. ول جولى ساك ساۋدا جانە ءوندىرىس ءمينيسترى باستاعان قۇرامىندا 135 ادام بار ۇكىمەتتىك دەلەگاتسيا قازاقستانعا رەسمي ساپارمەن كەلدى.
ەندى ساك ساۋدا جانە ءوندىرىس ءمينيسترىنىڭ شاقىرۋى بويىنشا، ق ر ينۆەستيتسيا جانە دامۋ ءمينيسترىنىڭ ساۋد ارابياسىنا ساپارى كۇتىلۋدە.
بۇگىنگى تاڭدا ەكى ەل اراسىنداعى كوپتەگەن سالالاردا كەلىسىمشارتتار مەن تۇسىنىستىك مەموراندۋمدارىنىڭ جوبالارىن تالقىلاۋ ۇدەرىستەرى ءجۇرىپ جاتىر.
وسى ارادا ەرەكشە اتاپ وتەر جايت، اعىمداعى جىلى قازاقستان قاجىلارى الماتى اۋەجايىنان ءمادينا مەن دجيددا قالالارىنا العاش رەت تىكەلەي رەيسپەن ساپار شەكتى.
«بۇل وڭدى شارا ءوزارا ىنتىماقتاستىقتىڭ ناتيجەسىندە جۇزەگە استى. بۇگىنگى ساك ۇلتتىق كۇنىنە قاتىستى ءىس- شارالارىمىزعا قاتىسقاندارىڭىزعا العىسىمدى بىلدىرەمىن» ، - دەدى ءسوزىنىڭ سوڭىندا ساۋد ارابياسى كورولدىگىنىڭ قازاقستانداعى توتەنشە جانە وكىلەتتى ەلشىسى گۋرم بەن سايد ال مالحان.
