الماتىدا «اباي الەمى» اتتى كورمە اشىلدى - فوتو
«بۇل كورمەگە ق ر مەملەكەتتىك ورتالىق مۋزەيىنىڭ قورىندا ساقتاۋلى اباي قۇنانباي ۇلىنا قاتىستى قولجازبالار جانە كىتاپتارمەن قاتار، سەمەي وبلىستىق تاريحي-ولكەتانۋ مۋزەيىنەن دە 100 گە تارتا جادىگەرلەر جەتكىزىلدى. سولاردىڭ 50 دەن استامى - قۇجاتتار.
بۇل جەردە ابايدىڭ ۇلى ماعاۋياعا 1896-جىلى جازعان حاتىن، اباي قول قويعان قۇجاتتاردى، 1903-جىلى اقىنعا بەرىلگەن مىنەزدەمەنى، اباي وقىعان شىعىس اقىنى ءساعديدىڭ «بوستان» پوەماسىنىڭ قولجازباسىن ايتۋعا بولادى. سونداي-اق، ابايدىڭ اقىندىق تۇلعاسىن، قوعام قايراتكەرى رەتىندەگى تۇلعاسىن اشا تۇسەتىن باسقا دا قۇجاتتار بار»، - دەدى ءوز سوزىندە سەمەي وبلىستىق تاريحي-ولكەتانۋ مۋزەيىنىڭ عىلىمي حاتشىسى شىنار سادىقوۆا.
سونىمەن قاتار ول كورمەگە اباي ءومىرى مەن ونىڭ اۋلەتىنە قاتىستى پورترەتتەر، فوتوسۋرەتتەر، مۇسىندەر، كيىمدەر، كىلەمشەلەر جانە باسقا دا زاتتاردىڭ قويىلعاندىعىن ايتتى.
«ەندى اباي قىردا تۋىپ، ءومىرىن قىردا وتكىزگەن عوي. سەمەيگە كەلىپ كەتىپ جۇرگەن. سوندا تۇسەتىن ۇيلەرى بولعان. مىسالى، بەكبايدىڭ، انيار مولدابايەۆتىڭ ءۇيى. مىنە سول ۇيلەردىڭ، ءوزى جۇرگەن كوشەلەردىڭ، ءوزى مۇشەسى بولعان قوعامدىق مەكەمەلەردىڭ، ءوزى تۇراقتى وقىرمانى بولعان كىتاپحانانىڭ فوتوسۋرەتتەرى اكەلىندى. سونداي-اق كەلۋشىلەر ابايدىڭ ءوز اۋلەتىمەن تۇسكەن فوتوسۋرەتتەرىن دە تاماشالاي الادى. ەگەر جۇرتشىلىق وسى كورمەگە: «مەن ابايدى ءتۇسىندىم بە؟ اباي ماعان كەرەك پە؟» - دەپ وزىنە سۇراق قويىپ، ابايدى تانۋعا ىنتالىق تانىتىپ كەلەر بولسا، وندا ماقساتىمىزدىڭ ورىندالعانى. ويتكەنى، بۇل كورمەنىڭ تاربيەلىك ءمانى وتە زور»، - دەدى ش. سادىقوۆا.
ايتا كەتەلىك، كورمەنىڭ اشىلۋ راسىمىنە اقىلبايدىڭ نەمەرەسى، ابايدىڭ شوبەرەسى قاسيرا يسرايلوۆا، ءال-فارابي اتىنداعى قازۇۋ «اباي تانۋ» ينستيتۋتىنىڭ ديرەكتورى، پروفەسسور جانعارا دادەبايەۆ، سونىمەن قاتار ادەبيەتتانۋشى ماماندار، جوعارى وقۋ ورىندارىنىڭ ستۋدەنتتەرى جانە مۋزەيگە كەلۋشىلەر قاتىستى.
كورمەنىڭ اشىلۋ ءراسىمى بارىسىندا اباي اتىنداعى وپەرا جانە بالەت تەاترىنىڭ، ەسترادا جانە سيرك كوللەدجىنىڭ، قۇرمانعازى اتىنادعى مەملەكەتىتك كونسەرۆاتوريانىڭ ستۋدەنتتەرى ابايدىڭ ءبىرقاتار اندەرىن شىرقاپ، جينالعان قاۋىمنىڭ ريزاشىلىعىنا بولەندى.
