ءانشى قاراقات ءابىلدينا «بالالاردىڭ ەرتە دامۋى تۋرالى» جوباسىن تانىستىردى

بۇگىن ق ر مەملەكەتتىك حاتشىسى گۇلشارا ءابدىقالىقوۆانىڭ جەتەكشىلىگىمەن وتكەن ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسىندا كوميسسيا مۇشەسى، ءانشى قاراقات ءابىلدينا «بالالاردىڭ ەرتە دامۋى تۋرالى» جوباسىن تانىستىردى.

 «ەلباسىنىڭ «ماڭگىلىك ەل» يدەياسىنىڭ وزەگى بالا تاربيەسىنەن باستالادى. وسىعان وراي، ءبىز مەكتەپكە دەيىنگى تاربيە مەن بالالاردى وقىتۋدىڭ وقۋ-ادىستەمەلىك قۇرالىن ازىرلەگەن بولاتىنبىز، جوبا رەتىندە. بۇنى ۇلتتىق كوميسسيادا تانىستىرعالى وتىرمىز. بۇل ءارتۇرلى جاستاعى بالالارعا ارنالعان بىرەۋى ويىنشىق تۇرىندە، بىرەۋى وقۋلىق تۇرىندە بولىپ، بالا دامۋىنا اسەر ەتەدى دەپ ويلايمىن»، - دەدى قاراقات ءابىلدينا.

ونىڭ ايتۋىنشا، جوبانىڭ ەرەكشەلىگى بالانىڭ ويناي وتىرىپ، كوپ نارسەگە ەرتە باستان ۇيرەنۋىن قامتاماسىز ەتۋ بولىپ تابىلادى. بۇل رەتتە ۇسىنىلىپ وتىرعان جوبا وقۋ-ادىستەمەلىك تىزبەگە ەنگەن. ەندىگى كۇنى ستاندارتتارعا سايكەستەنۋ ماسەلەلەرى قاراستىرىلادى.

«ەڭ باستىسى بالانىڭ انا تىلىندە سويلەۋىن، ويلاۋىن ەرتەگىلەر، حالىق اندەرى ارقىلى ءسىڭىرۋ. بالا ەستۋ، قايتالاۋ، ويناۋ ارقىلى داميدى. بۇدان بولەك، مەكتەپكە دەيىنگى ءارتۇرلى جاسقا سىزۋ، جازۋ باعىتىندا دا ءبىرشاما دۇنيەلەردى قامتىپ وتىرمىز. جوبادا بالانى تاربيەلەۋ مەرزىمىن قۇرساقتان باستاپ 7 جاسقا، ياعني مەكتەپكە دەيىنگى كەزەڭ بويىنشا قامتىعىمىز كەلەدى. بالانىڭ ويناي ءجۇرىپ بىردەن قابىلدايتىن، تەز ۇعىپ، بويىنا تەز سىڭىرەتىن كەزەڭنىڭ ءبىرى دە وسى»، - دەدى ق. ءابىلدينا.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى