قازاقپارات اگەنتتىگى «قازمەديا ورتالىعى» كورمەسىندە ءوز تانىستىرىلىمىن جاسادى

 وسىمەن ءتورتىنشى رەت ۇيىمداستىرىلعان كورمەگە ادەتتەگىدەي مەملەكەتتىك جانە كوممەرتسيالىق تەلەارنالار، باسپالار مەن جارناما نارىعىنىڭ ۇزدىكتەرى، سونداي- اق كوممۋنيكاتسيا جانە ماركەتينگ سالاسىنىڭ مىقتى ماماندارى قاتىسۋدا.

«قازمەديا ورتالىعى» «Media Expo 2015» كورمەسىنىڭ ستراتەگيالىق ارىپتەسى بولدى جانە ءبىز وعان وتە قۋانىشتىمىز. كورمەنىڭ «قازمەديا ورتالىعىندا» ءوتۋى - پەرسپەكتيۆاعا جول اشىپ وتىر، كورمەنىڭ وسى عيماراتتا ءوتۋى داستۇرگە اينالدى دەسەك بولادى. شارانىڭ تاعى ءبىر ماڭىزدى تۇسى - بۇگىن تەلەارنالار ءوزارا تاجىريبە الماسىپ، وزگە دە باق وكىلدەرى جاڭالىقتارىن جاريا ەتىپ جاتىر. كورمە جۇمىسى جەمىستى بولسىن»، - دەدى كورمەنىڭ اشىلۋىندا «قازمەديا ورتالىعى» كومپانياسىنىڭ باس ديرەكتورى ميربولات ايۋپوۆ.

بيىلعى كورمەنىڭ ءبىر جاڭالىعى - كورمەگە تەلەارنالارمەن قاتار، العاش رەت پروداكشن كومپانيالار مەن ستۋديالار دا قاتىسۋدا. كورمەنى ۇيىمداستىرىپ جاتقان «باس رەداكتورلار كلۋبىنىڭ» پرەزيدەنتى بيبىگۇل جەكسەنباي بۇعان قاتىستى ويىن ايتا كەلە: «بيىل العاش رەت كورمەگە پروداكشن ستۋديالاردى دا شاقىردىق. الايدا، ولار تاراپىنان قىزىعۋشىلىق وتە جوعارى دەپ ايتا المايمىن. ءبىراق، مەنىڭ ويىمشا، ۋاقىت وتە كەلە پروداكشن ستۋديالار دا وسىنداي كورمەلەردىڭ قاجەتتىگىن تۇسىنەدى»، - دەدى.

كورمەگە سونداي-اق «قازاقپارات» حالىقارالىق اقپارات اگەنتتىگى دە قاتىسىپ، ءوز تانىستىرىلىمىن جاسادى.

«قازاقپارات» - حالىقارالىق دارەجەگە يە بولعان قازاقستانداعى العاشقى اقپاراتتىق اگەنتتىك. مەديا- اگەنتتىك 95 جىلدان استام ۋاقىت بويى ساياسات، ەكونوميكا، ءبىلىم بەرۋ، دەنساۋلىق ساقتاۋ، سپورت، مادەنيەت جانە قوعامنىڭ وزگە دە تىنىس تىرشىلىگى تۋرالى جەدەل ءارى سەنىمدى اقپارات تاراتىپ كەلەدى.

اگەنتتىكتىڭ ورتالىق كەڭسەسى قازاقستاننىڭ ەلورداسى استانا قالاسىندا ورنالاسقان. ەلدىڭ قارجىلىق جانە مادەني ورتالىعى الماتىدا ونىڭ فيليالى - تىلشىلەر بيۋروسى بار. قازاقپاراتتا وزگە وتاندىق اقپاراتتىق اگەنتتىكتەردە جوق تىلشىلەر جەلىسى بار. ەلدىڭ بارلىق ايماقتارىندا 15 تىلشىلەر پۋنكتى ورنالاسقان. ونىڭ ىشىنە بايقوڭىر دا كىرەدى.

رەسەي، قىتاي، تۇركيا، ب ا ءا، بەلگيا، ازەربايجان، وزبەكستان، قىرعىزستان ەلدەرىندە مەنشىكتى تىلشىلەرى بار. بۇل ەلىمىزدە جانە الەمدە بولىپ جاتقان جاڭالىقتاردى on-line رەجيمدە جەدەل ءارى شىنايى تاراتۋعا مۇمكىندىك بەرەدى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى