اقسۋ، بالقاش، رايىمبەك اۋداندارىندا وزگەرتۋدى قاجەت ەتەتىن كوشە اتاۋلارى از ەمەس - الماتى وبلىسى
وندا اقسۋ، بالقاش، رايىمبەك اۋداندارىنداعى ونوماستيكالىق جۇمىستارعا بايلانىستى اتقارىلعان ءىس- شارالار تۋرالى اۋدان اكىمدەرى ورىنباسارلارىنىڭ ەسەبى تىڭدالدى، دەپ جازادى «جەتىسۋ» باسىلىمى.
اتالمىش اۋداندارعا وبلىستىق تىلدەردى دامىتۋ جونىندەگى باسقارمانىڭ الدىن الا جۇرگىزگەن تەكسەرۋى بارىسىندا ءتىل زاڭدىلىعىنىڭ ساقتالماۋىنا بايلانىستى ءبىرقاتار كەمشىلىك انىقتالعان بولاتىن. اتاپ ايتار بولساق، اقسۋ اۋدانى بويىنشا 49 ەلدى مەكەننىڭ ەكەۋىنىڭ ورىسشا اتاۋى بۇگىنگى كۇنگە دەيىن ساقتالىپ كەلەدى.
اراسان اۋىلىنداعى سادوۆايا، دەپو، دمسۋ-45 كوشەلەرىنىڭ اتاۋى دا وزگەرتۋدى قاجەت ەتەدى. سونىمەن بىرگە اۋداندا كوشەگە اتى بەرىلگەن كىسى ەسىمدەرىنىڭ تولىق جازىلماۋى ءجيى ۇشىرىسادى. قاپال اۋىلىنداعى كوشە اتاۋلارى قازاقشالانباعان كۇيى «ت. بوكينا، م. دۋلاتوۆا، و. دجاندوسوۆا، ا. مولداگۋلوۆوي» بولىپ تۇر. جانسۇگىروۆ اۋىلىندا ورنالاسقان اينالماداعى «مير»، «بوگاتستۆو»، «درۋجبا» ۇران جازۋلارى ورىس تىلىندە عانا جازىلىپ، ورنالاستىرىلعان.
بالقاش اۋدانىندا وڭىردەگى ونوماستيكالىق احۋالدى جاقسارتۋ ماقساتىندا ءبىرقاتار جۇمىس اتقارىلۋىمەن قاتار ولقىلىقتار دا ورىن الىپ وتىر. بۇگىنگى كۇنگە دەيىن وكرۋگ، اۋىل اتاۋلارىندا «سەلولىق» ءسوزى تيىسىنشە «اۋىلدىق» سوزىنە اۋىستىرىلماعان. بىرلىك، باقباقتى اۋىلدارىندا ا. يمانوۆ، ج. جابايەۆ، م. مامەتوۆا اتىنداعى كوشە انشلاگتارى تەك ورىس تىلىندە عانا ىلىنگەن. بىرلىك، اقكول اۋىلدارىنداعى كوشە اتاۋلارى قاتە جازىلعان ءارى جاڭارتۋعا قارجى قاراستىرىلماعاندىقتان جازۋى ءوشىپ، ابدەن توزىعى جەتكەن. سونىمەن قاتار اقجار، بەرەكە، قاروي، اقدالا، باقاناس، كوكتال اۋىلدارىنداعى كەيبىر كوشەلەردە انشلاگ جوق. جەلتوراڭعى، كوكتال، اقكول، بالاتوپار اۋىلدارىنداعى كوشە اتاۋلارىندا كىسى ەسىمدەرى تولىق جازىلماعاندىقتان ناقتى كىمنىڭ اتىنا بەرىلگەندىگى تالاس تۋدىرارلىق جاعدايدا. ءۇشجارما اۋىلىندا كەيبىر ورىسشا اتاۋلاردى وگەرتۋگە بايلانىستى جۇمىس جۇرگىزىلمەگەن.
ال رايىمبەك اۋدانىنىڭ كەگەن، تەكەس اۋىلدارىندا كوشەلەر اتاۋىنىڭ جازىلۋىندا بىرىزدىلىك ساقتالماستان «ۋل. ابايا، ۋل. دجاندوسوۆا، ۋل. امانگەلدى» دەپ ورىس تىلىندە عانا بەرىلگەن. مۇنداعى تۇرعىنداردىڭ 99 پايىزدان استامىن قازاق ۇلتى قۇرايتىندىعىنا قاراماستان ءالى دە كەگەن، نارىنقول اۋىلدارىنىڭ ساۋدا ورىندارىندا «مەبەل، بىتوۆايا تەحنيكا، پوسۋدا، ۆۋلكانيزاتسيا، كسەروكس، لاميناتسيا» دەگەن جازۋلار رەسمي تىلدە عانا كورىنىس تاپقان. سونداي- اق، مەملەكەتتىك كىرىستەر باسقارماسىنداعى كەيبىر اقپارات تەك ورىس تىلىندە جازىلىپ، ىلىنگەن.
مىنە، وسىنداي ورىن العان ولقىلىقتاردىڭ ورنىن تولتىرۋ بارىسىندا اتقارىلىپ جاتقان شارالار جايىن اقسۋ اۋدانى اكىمىنىڭ ورىنباسارى ءسابيت قورعانبايەۆ، بالقاش اۋدانى اكىمىنىڭ ورىنباسارى سايران سماعۇلوۆ، رايىمبەك اۋدانى اكىمىنىڭ ورىنباسارى تالعات بايەدىلوۆ بايانداپ، بۇل ماسەلەلەردىڭ جۋىق ارادا شەشىمىن تاباتىنىن جەتكىزدى.
كوميسسيا وتىرىسىندا كوشە اتاۋىنىڭ اۋىسۋىنا بايلانىستى تۇرعىنداردىڭ بانكتەن نەسيە الۋ جاعدايىندا، ءۇي ساتۋ كەزىندە تۋىندايتىن ماسەلەلەر دە ورتاعا سالىندى. وبلىس اكىمىنىڭ ورىنباسارى باقتيار ونەربايەۆ ونوماستيكالىق كوميسسيا اتىنان بانكتەرگە اۋىلدىڭ نەمەسە كوشەنىڭ اتاۋى وزگەرگەندىگى تۋرالى حات جىبەرۋ ارقىلى بۇل ماسەلەنى شەشۋدى ۇسىندى.
سونداي- اق، وتىرىس بارىسىندا بيىلعى جەڭىستىڭ 70 جىلدىعىنا وراي ۇلى وتان سوعىسى ارداگەرلەرىنىڭ ەسىمىن كوشەگە بەرۋ بويىنشا ۇسىنىستار قارالىپ، ءبىرقاتارى ماقۇلداندى. ال، قۇجاتى تولىق ەمەس دەگەندەر تولىقتىرىلعان سوڭ كوميسسيانىڭ الداعى وتىرىسىندا قايتا قارالاتىن بولادى.
