قازاقستان قاجىلارى كەستە بويىنشا ۇشا باستادى
قازىر بۇكىل الەم مۇسىلماندارى مەككە قالاسىنان ءوز ەلدەرىنە ۇشا باستادى.
ساۋد ارابيا كورولدىگى كۇنتىزبەنى جاڭا ايدىڭ تۋۋىنا بايلانىستى بەلگىلەيدى. جاڭا ايدىڭ (ءبىزدىڭ ەلمەن سالىستىرعاندا) ءبىر كۇن كەش كورىنۋىنە وراي بارلىق ۇشاقتاردىڭ ۇشۋ كەستەسى دە ءبىر كۇنگە شەگەرىلدى. كەشە ساۋد ارابيا كورولدىگىنىڭ قاجىلىق مينيسترلىگى وسىنداي شەشىم قابىلدادى.
سونىمەن قاتار قاجىلارعا قىزمەت كورسەتەتىن جەرگىلىكتى مەكەمەلەردىڭ اۆتوبۋستاردى (قاجىلاردى مەككەدەن جيددا قالاسىنا تاسىمالداۋ ءۇشىن) ۋاقىتىندا بولمەۋ، ۇيىمداستىرۋ جۇمىستارىن جۇيەلى جۇزەگە اسىرماۋ سالدارىنان جەرلەستەرىمىز اۋەجايعا دەر كەزىندە جەتكىزىلمەدى.
قازىر قاجىلاردى ۇشىرۋعا قاتىستى تەحنياكالىق سەبەپتەر شەشىمىن تابۋدا. بۇل تۋرالى قازاقستان قاجىلارىن تاسىمالداۋ قۇقىعىنا يە بولعان «FlyNas» حالىقارالىق اۋەكومپانياسىنىڭ جاۋاپتى وكىلى مۇحاممەد ءال-قارني قاجىلىق ميسسياسىنىڭ ءتوراعاسى عىلىمبەك ماجيەۆ مىرزاعا مالىمدەدى. ەندى وتانداستارىمىزدىڭ ۇشۋ كەستەسى بەكىتىلگەن كەستە بويىنشا جۇزەگە اسىرىلۋدا.
قاجىلىق مينيسترلىگىنىڭ ۇشۋ ۋاقىتىن ءبىر كۇنگە شەگەرۋ تۋرالى شەشىمى بارلىق ەلدەن كەلگەن قاجىلارعا قاتىستى ەكەنىن حابارلايمىز. بۇگىندە قازاقستاندىق قاجىلار جيددا - الماتى باعىتى بويىنشا تىكەلەي رەيسپەن ۇشۋدا.
جيددا اۋەجايىندا كەزەگىن كۇتكەن وتانداستارىمىز قاجەتتى اس- سۋمەن قامتاماسىز ەتىلدى. فيرما باسشىلارى ۇيىمداستىرۋ جۇمىستارىن جاۋاپكەرشىلىكپەن اتقارۋدا.
«بۇقارالىق اقپارات قۇرالدارى وكىلدەرىن «قازاقستاندىق قاجىلار اۋەجايدا ەلگە قايتا الماي جاتىر» دەگەن مازمۇندا اقپارات تاراتىپ، الدىن الا ماسەلەنى كۇردەلەندىرىپ كورسەتپەۋگە شاقىرامىز»، - دەلىنگەن قازاقستان قاجىلىق ميسسياسى حابارلاماسىندا.
