الماتى وبلىسى: قاراعاي كوشەتىنىڭ مەكەنى - كەگەن
جانعا شۋاق، بويعا قۋات سىيلايتىن، جۇزىڭە ءار، جۇرەگىڭە ءنار بەرەتىن وسىناۋ تابيعات الەمىن رۇقساتسىز قىرقىلۋدان، كەزدەيسوق ورتتەن ساقتاپ، قورعايتىن ورمانشىلاردىڭ باستى مىندەتى - ورمان الابىن ودان ارى مولايتۋ.
«جەتىسۋ» گازەتىنىڭ جازۋىنشا، رايىمبەك اۋدانىنداعى كەگەن ورمان شارۋاشىلىعى مەملەكەتتىك مەكەمەسى - قاراعاي كوشەتىنىڭ ءبىر وتانى ىسپەتتى. ۇستىمىزدەگى جىلعى ماۋسىم ايىندا جانات دەمەجانوۆ باسقاراتىن اتالعان ورمان شارۋاشىلىعى تۇراقتى تۇقىمباعى نەگىزىندە وبلىستىق سەمينار- كەڭەستىڭ وتكىزىلۋى بەكەر ەمەس.
مەكەمەدە 5 ورمانشىلىق بار. مۇندا 82 ادام ەڭبەك ەتەدى. ورمانشىلىقتىڭ جالپى جەر كولەمى 84790 گەكتار بولسا، ونىڭ ىشىندە 24272 گەكتارى ورمان القابى بولىپ تابىلادى. وسىناۋ تابيعات الەمىندەگى اينالىمدار مەن ورامداردا قىسى-جازى ومىرلەرىن وتكىزەتىن 41 ورمان كۇتۋشىسى تۇرعىن ۇيمەن، اتپەن، قاجەتتى قۇرال- جابدىقتارمەن قامتاماسىز ەتىلگەن.
كەگەن ورمان شارۋاشىلىعى مەكەمەسىندەگى جالاڭاش ورمانشىلىعىندا بازالىق تۇقىمباق، تەمىرلىك ورمانشىلىعىندا ۋاقىتشا تۇقىمباق بار. وسىناۋ تۇقىمباقتاردىڭ اياسىندا جىل سايىن 0,5 گەكتار جەرگە تيانشان قاراعايىنىڭ تۇقىمى سەبىلەدى. ودان از دەگەندە 500 مىڭ دانا كوشەت وسىرىلەدى.
بۇل كوشەتتەر ارام شوپتەردەن تازارتىلىپ، ۋاقتىلى سۋعارىلىپ 4 جىل وسىرىلەدى. مەكەمە بويىنشا جىل سايىن الدىن الا دايىندالعان 50 گەكتار الاڭقايلارعا 250 مىڭ دانا جاس كوشەت وتىرعىزىلادى. تۇقىمباقتاردا تيانشان قاراعايىنىڭ كوشەتتەرىنەن بولەك كوگىلدىر قاراعاي، الما، ورىك، ۇيەڭكى وسىرىلۋدە. ءبىر سوزبەن ايتقاندا، كەگەن ورمان شارۋاشىلىعى مەكەمەسىندەگى تۇقىمباقتار ارقىلى 4 جىل وسىرىلەتىن شىرشا كوشەتتەرى رەسپۋبليكانىڭ يگىلىگى بولىپ كەلەدى. جىل سايىن 3 مىڭنان اسا كوشەت وڭىرلەردى كوگالداندىرۋ ماقساتىندا ساتىلىپ، بەرىلەدى. مۇنداعى شىرشا كوشەتتەرى استانادا، الماتىدا، وبلىس ورتالىعىندا جانە رەسپۋبليكانىڭ تۇكپىر- تۇكپىرىندە بوي كوتەرۋدە.
ال بەرىك كوشەكبايەۆ جەتەكشىلىك جاسايتىن تەمىرلىك ورمانشىلىعىنا جالپى 19578 گەكتار جەر قارايدى. داۋلەت كوشەربايەۆ، بەرىك شارعىنوۆ سەكىلدى ورمان شەبەرلەرى، ساعاتجان قاسىمبەكوۆ، نۇرساپا دۇيسەنبيەۆ، مۇقتار ەلۋبايەۆ، سانات تۇلكىبايەۆ، تولەگەن المابەكوۆ سەكىلدى ورمان كۇتۋشىلەرى ەڭبەك ەتەدى. ورمانشىلىقتىڭ ۋاقىتشا تۇقىمباعى بار. جىل سايىن 0,2 گەكتار جەرگە شىرشا تۇقىمى سەبىلىپ، ءوسىرىلىپ كەلەدى. تۇقىمباقتا جەرگىلىكتى شرەنكا شىرشاسى، قاراعاي، كوگىلدىر شىرشاسى دا وسىرىلەدى.
- جىل سايىن ورمان قورىن مولايتۋ ماقساتىندا 10 گەكتار جەرگە شۇڭقىرلار قازىلىپ، شىرشا كوشەتتەرى وتىرعىزىلادى. تۇقىمباقتاعى جۇمىس وڭاي ەمەس. شىرشانىڭ تۇقىمىن جيناۋ، ونى تەكسەرۋدەن وتكىزۋگە ودان سوڭ ونەتىن دارەجەسىنە جەتكەنگە دەيىن ءبىر جىل كۇتىپ- باپتاۋعا، سوسىن وتىرعىزىپ 4 جىل قامقورلىقتا ۇستاۋعا كوپ ەڭبەك، رەت-رەتىمەن جۇمىس جالعاسادى. ناۋقان كەزىندە تۇقىمباققا ۋاقىتشا جۇمىسشىلار الىنادى. جۇمىسىمىز جەمىسسىز ەمەس، - دەيدى تەمىرلىك ورمانشىلىعىنىڭ ورمانشىسى بەرىك كوشەكبايەۆ.
مۇنداعى ورمانشىلار دا ارنايى كيىممەن، بايلانىس قۇرالدارىمەن، كولىكپەن تولىقتاي قامتاماسىز ەتىلگەن. ورمانشىلار قىسى- جازى تۇراتىن اينالىمدارداعى كاردوندار تالاپقا ساي كۇردەلى جوندەۋدەن وتكىزىلگەن. بيىل №44-اينالىمداعى ورمان كۇتۋشىلەرىنىڭ ءۇيى اعىمداعى جوندەۋدەن وتكىزىلىپتى.
- اۋا- رايىنىڭ ءتۇرلى قۇبىلىستارىن، اۋىرتپالىقتارىن باستان وتكەرىپ جاتامىز. قاراماعىمىزداعى ورمان الابى تۇراقتى نازارىمىزدا. ەڭبەكاقىمىز از بولسا دا جۇمىستىڭ قيىندىعىن موينىمىزبەن كوتەرىپ، جاۋاپكەرشىلىگىن سەزىنىپ، ابىرويمەن ەڭبەكتەنىپ كەلەمىز. كوز قۋانىش، جان جۇبانىشىنداي ورمانىمىزدى جاس كوشەتپەن مولايتىپ، ورتتەن قورعاپ، كەمەل كەلەشەگىن قامداۋ - باستى مۇراتىمىز، - دەيدى تەمىرلىك ورمانشىلىعىنىڭ جاسىل كيىمدى ورمانشىلارى.
