ايجۇلدىز ادايبەكوۆا، اكتريسا: انام جانار ايجانوۆا دومبىرانىڭ قۇلاعىندا ويناعانىمەن، ەڭ قىزىعى، مەن دومبىرا شەرتە المايمىن
ءبىراق، ول سوڭعى ۋاقىتتا ءوزىنىڭ ونەرىمەن دە جۇرتتى ءسۇيسىنتىپ ءجۇر. قازىر ەل ونى جاس اكتريسا رەتىندە تاني باستادى. جۋىردا ساتىبالدى نارىمبەتوۆتىڭ «امانات» فيلمىنە تۇسكەن ايجۇلدىز ادايبەكوۆانى كەزىكتىرىپ قالىپ، ءبىراز سوزگە تارتتىق.
ۇلان: ايجۇلدىز، اڭگىمەنى قانداي وقۋشى بولعانىڭنان باستايىقشى...
ايجۇلدىز: مەن الماتى قالاسىندا كۇلاش بايسەيىتوۆا اتىنداعى دارىندى بالالارعا ارنالعان مۋزىكا مەكتەبىندە 13 جىل ءبىلىم الدىم. مەكتەپتە جاراتىلىستانۋ پاندەرىنە قىزىعۋشىلىعىم تومەندەۋ بولدى. ماتەماتيكا، حيميا پاندەرىمەن «دوس» ەمەس ەدىم. سولفەدجيو، تەوريا، گارمونيا سەكىلدى پاندەردى ءسۇيىپ وقىدىم. سول پاندەرگە قاتىستى اسپاپتاردى مەڭگەردىم. مەكتەپ قابىرعاسىنداعى قىزىقتى ساتتەرىم ءبىر ساتكە دە ەسىمنەن شىققان ەمەس. ءبىر قىزىعى، بارلىق وقۋشىلار ەمتيحاننان قورقىپ جاتسا، مەن سول ەمتيحان تاپسىراتىن كۇندى اسىعا كۇتەتىنمىن. ءوزىمدى كورسەتۋگە، ءبىلىمىمدى دالەلدەۋگە اسىعاتىنمىن.
ۇلان: قانداي جانرداعى كىتاپتاردى جاقسى كورەسىڭ؟
ايجۇلدىز: ءوزىم وتە ارمانشىل بولعاندىقتان با، فانتاستيكالىق شىعارمالاردى جاقسى كورەمىن. كىتاپ وقىعاندا تابيعات اياسىندا وتىرعان ۇنايدى.
ۇلان: سەنىڭ پىكىرىڭشە، قازىرگى قوعامداعى قازاق قىزىنىڭ بەينەسى قانداي بولۋى كەرەك؟
ايجۇلدىز: مەنىڭ ويىمشا، كەز كەلگەن قىزدىڭ سىرت كەلبەتىنە قاراپ، «مىنە، قازاق قىزى» دەپ ايتۋعا بولمايدى. ەڭ بىرىنشىدەن، قازاق قىزى دەگەن اتقا لايىق جاندار جان-دۇنيەسىمەن قازاق بولۋى كەرەك. ادامگەرشىلىگى جوعارى، يمانى بار قۇربىلارىمدى قۇرمەتتەيمىن. قانداي جاعداي بولسا دا، تازا جۇرەكتى كىرلەتىپ الماۋعا تىرىسايىق.
ۇلان: تەاترعا ءجيى باراسىڭ با؟
ايجۇلدىز: ارينە، مۇمكىندىگىنشە ءجيى بارۋعا تىرىسامىن. سوڭعى رەەت ع. مۇسىرەپوۆ اتىنداعى بالالار مەن جاسوسپىرىمدەر تەاترىندا ساحنالانعان «قىزىل ورامالدى شىنارىم» قويىلىمىن تاماشالاۋعا باردىم. كوپ جاعدايدا انامنىڭ ارىپتەسى ايگۇل يمانبايەۆا وينايتىن قويىلىمداردان قالماۋعا تىرىسامىن. ويتكەنى، ول كىسىنىڭ سومداعان رولدەرى ۇنايدى. ءبىر قويىلىمدى كورسەڭىز، ءبىر كىتاپ وقىعانمەن بىردەي. سوندىقتان رۋحاني ازىق الىپ تۇرۋ ءۇشىن، ايىنا ءبىر رەت بولسا دا تەاترعا بارىپ تۇرۋدى ادەتكە اينالدىرعىم كەلەدى.
ۇلان: قانشا ءتىل بىلەسىڭ؟ جالپى، تىلگە دەگەن قىزىعۋشىلىعىڭ قالاي؟
ايجۇلدىز: اللاعا شۇكىر، انا ءتىلىم مەن ءۇشىن ءبىرىنشى ورىندا تۇرادى. ءوز انا تىلىمدە ساۋاتتى سويلەپ، قاتەسىز جازا الامىن، ويىمدى انىق جەتكىزەمىن. ورىس ءتىلى مەن اعىلشىن ءتىلىن دە ەركىن مەڭگەرگەنمىن. قازىر اراب، تۇرىك تىلدەرىنە قىزىعۋشىلىعىم ويانىپ ءجۇر.
ۇلان: ايگىلى تاريحشىمىز ەرمۇحان بەكماحانوۆ تۋرالى «امانات» فيلمىنە قالاي تاپ بولدىڭ؟ كاستينگ ارقىلى ءوتتىڭ بە، الدە ارنايى شاقىرىلدىڭ با؟
ايجۇلدىز: «امانات» فيلمىنىڭ رەجيسسەرى ساتىبالدى نارىمبەتوۆ اعامىز مەنى عالامتوردان كورىپ، ءوزى ارنايى «قازاقفيلمگە» شاقىردى. اعامەن العاش كەزدەسكەندە- اق تەز ءتىل تابىسىپ كەتتىك. ءتۇسىرۋشى توپ شاشىم مەن قاسىمدى ۇناتتى. ساتىبالدى اعا مەنى «كوشپەندىلەر» فيلمىندەگى اكتريسا ايانات ەسماعامبەتوۆاعا ۇقساتتى. فيلمگە تۇسپەستەن بۇرىن ءبىراز سىناقتان ءوتتىم.
ۇلان: ءوزىڭدى ەكراننان كورگەننەن كەيىن ءبىر «اتتەگەن-اي» دەپ وكىنگەن ساتتەر بولعان شىعار؟..
ايجۇلدىز: ارينە، ونداي ساتتەر كوپ بولادى. مەن ەشقاشان ءوزىمدى ماقتاعىم كەلمەيدى. وزىمە كوڭىلىم تولمايتىن ساتتەر ءجيى بولادى. مەن سومداعان ءرولدىڭ قالاي شىققانىن اينالامداعىلاردان سۇراۋ كەرەك شىعار. سولار باعالاپ، سىناي جاتار... «دوس جىلاتىپ، دۇشپان كۇلدىرىپ ايتادى» دەگەندەي، اينالامداعى ادامدار مەنىڭ بار كەمشىلىگىمدى بەتىمە ايتادى. ولاردىڭ پىكىرلەرىن تىڭداپ، بولاشاقتا قاتەلىكتەر جىبەرمەۋگە تىرىسامىن. «سىرت كوز - سىنشى» دەگەن قاعيدامەن ءومىر سۇرەتىن جانداردىڭ قاتارىنانمىن.
ۇلان: وسى فيلمگە ارقاۋ بولعان كەنەسارى حان مەن ەرمۇحان بەكماحانوۆتى قانشالىقتى تاني الدىڭ؟
ايجۇلدىز: شىنىمدى ايتايىن، فيلمگە دەيىن بەكماحانوۆ جايلى ەشتەڭە بىلگەن جوقپىن. رولگە بەكىتىلگەننەن كەيىن رەجيسسەر بىزگە تۇسەتىن كينومىزدىڭ مازمۇنىن قىسقاشا بايانداپ بەردى. بەكماحانوۆتىڭ ومىرىمەن، ازاماتتىق تۇلعاسىمەن تانىستىرىپ ءوتتى. ونىڭ قازاق قوعامىندا الاتىن ورنىن دا ناقتىلاپ ايتتى. جازعان ەڭبەكتەرىمەن تانىستىردى. وسى فيلمنىڭ ارقاسىندا مەن تاريحشى بەكماحانوۆتىڭ ومىرىمەن تانىستىم. الاساپىرانعا تولى ءومىرىنىڭ كولەڭكەلى تۇستارىن دا تۇسىنگەندەيمىن. بۇگىنگى كۇنى تاريحي كينولار كوپ بولۋى كەرەك. كىتاپ وقۋعا قۇلىقسىز جاستاردى تاريحي كينولار ارقىلى ۇلتجاندىلىققا، وتانسۇيگىشتىككە شاقىرا الامىز.
ۇلان: ەستۋىمىزشە، انشىلىك، ارتىستىك، جۇرگىزۋشىلىكپەن قاتار، قارىنداشتىڭ كومەگىنسىز، كوسمەتيكالىق بوياۋلارمەن سۋرەت سالاتىن دا ونەرىڭ بار ەكەن. كوسمەتيكالىق بوياۋلارمەن سۋرەت سالۋ قيىن ەمەس پە؟ قايدان ۇيرەنىپ ءجۇرسىڭ؟
ايجۇلدىز: ول - مەنىڭ حوببيىم. كىشكەنتاي كۇنىمنەن باستاپ سول ونەرگە بەيىمدەگەن اپكەم امانگۇل بولاتىن. 2 جاسىمنان باستاپ، سول كىسى سۋرەت سالۋدىڭ قىر-سىرىن ۇيرەتتى. قاسىنا وتىرعىزىپ، نەشە ءتۇرلى بالاپان مەن بوتالاردىڭ بەينەسىن سالعىزاتىن. سودان باستاپ سۋرەت ونەرىنە دەگەن قىزىعۋشىلىعىم وياندى. كوسمەتيكالىق بوياۋلاردىڭ كومەگىمەن سالاتىن سۋرەتتەردى عالامتوردان ءبىلىپ، ۇيرەنىپ الدىم. قازىر ت. جۇرگەنوۆ اتىنداعى ونەر اكادەمياسىندا سۋرەتشى جانە كيىم ديزاينەرى ماماندىعى بويىنشا ءبىلىم الىپ جاتىرمىن. تاڭداعان ماماندىعىم، تۇسكەن ۋنيۆەرسيتەتىم وزىمە ۇنايدى. ارماندارىمنىڭ بارلىعى بىرتىندەپ ورىندالىپ كەلەدى.
ۇلان: الەۋمەتتىك جەلىلەردىڭ قايسىسىن قولداناسىڭ؟
ايجۇلدىز: شىنى كەرەك، تەلەديداردى كوپ قارامايمىن، ەسەسىنە الەۋمەتتىك جەلىلەردەن پايدالى اقپاراتتاردى كوپ الامىن. مىسالى، مەن whats'App پەن Instagram جەلىسىندە تىركەلگەنمىن. اراسىندا مەنىڭ اتىمنان اشقان جالعان پاراقشالار دا بار. ءبىراق، مەن ءۇشىن الەۋمەتتىك جەلى ەرىككەننىڭ ەرمەگى ەمەس.
ۇلان: كوپتەگەن مۋزىكالىق اسپاپتاردا ويناي الادى ەكەنسىڭ...
ايجۇلدىز: سانامالاپ ايتسام، شاڭقوبىز، گيتارا، سازسىرناي، فلەيتا، بلوگ-فلەيتا، باراباندا ويناي الامىن. مەنىڭ انام جانار ايجانوۆا دومبىرانىڭ قۇلاعىندا وينايدى. ەڭ قىزىعى، مەن دومبىرا شەرتە المايمىن. بولاشاقتا وسى ولقىلىقتىڭ ورنىن تولتىرعىم كەلەدى.
ۇلان: سپورتپەن شۇعىلداناسىڭ با؟
ايجۇلدىز: 5 جاسىمنان باستاپ بيگە باردىم، 9 جاسىمنان بەرى يوگامەن اينالىسىپ كەلەمىن. كوبىنە قوعامدىق كولىكتەرگە مىنبەي، جاياۋ جۇرەمىن. سەبەبى، سپورتپەن اينالىسۋدىڭ ەڭ جەڭىل ءتۇرى - جاياۋ ءجۇرۋ. ول دەنساۋلىققا وتە پايدالى. وقۋ ورنىمىزدان ۇيگە دەيىن جاياۋ ءجۇرۋ مەن ءۇشىن تۇك ەمەس. دەنساۋلىعىمدا ازداپ كەمشىلىكتەر بولعان سوڭ سونى قالپىنا كەلتىرۋ ءۇشىن يوگامەن اينالىسۋىما تۋرا كەلدى.
ۇلان: اڭگىمەڭە راحمەت، ايجۇلدىز!
سۇحباتتاسقان گۇلدانا نۇرلىحانوۆا
(«ۇلان»، №39, 29 -قىركۇيەك 2015 -جىل)
گازەتتەگى تاقىرىبى: شاشىم مەن قاسىمدى ۇناتىپتى...
