استانادا قازاقستان مەن قىتاي اراسىنداعى ىقپالداستىق ماسەلەلەرى تالقىلاندى
اتالمىش ءىس- شارانى وتكىزۋدىڭ نەگىزگى ماقساتى وقۋ ورنىنىڭ تۇلەكتەرىنە كورشى قىتاي ەلىنىڭ مادەنيەتى مەن تاريحىن ۇعىندىرۋ، قازاقستان مەن قىتاي ەلدەرى اراسىنداعى دوستىقتى تۋ ەتكەن ءتۇرلى سالالارداعى ىقپالداستىق بايلانىستاردى ءتۇسىندىرۋ بولىپ تابىلادى، سونداي- اق قىتاي ءتىلىن ۇيرەنىپ، وسى ەلدە جوعارى ءبىلىم الۋعا ىنتالى جاستاردىڭ قىزىعۋشىلعىن وياتۋدى كوزدەيدى.
جيىن بارسىندا ءسوز العان «نۇر- وتان» ح د پ- نىڭ ساراپتاۋ، جوبالاۋ جانە الەۋمەتتىك ينستيتۋتتار ورتالىعىنىڭ جەتەكشىسى قازبەك قازكەنوۆ ستۋدەنتتەرگە قازاقستان مەن قىتايدىڭ قارىم- قاتىناسى ۇزدىكسىز ءوسۋ جانە نىعايۋ جولىمەن دامىپ كەلە جاتقاندىعىن، تاريحي كورشىلەردىڭ سىيلاستىعى، دوستىعى ارقاسىندا بۇگىنگى كۇنى قوس ەلدىڭ اراسىندا ورتاق ماقساتتار جولىندا تىعىز بايلانىستار ورناپ وتىرعاندىعىن، سونىمەن بىرگە ەلباسى نۇرسۇلتان نازاربايەۆتىڭ «نۇرلى جولى» مەن قىتاي ءتوراعاسى شي جينپيىنىڭ «جاڭا جىبەك جولى» باعدارلاماسىنىڭ ءبىر- بىرىمەن ۇندەسىپ جاتقانىن بايان ەتتى.
القالى باسقوسۋدا «تۇران- پروفي» اكادەمياسىنىڭ رەكتورى مانەن وماروۆ جانە ءبىلىم ورداسىنىڭ بەلسەندى ستۋدەنت جاستارى قىتاي ەلى تۋرالى ءوز ويلارىمەن ءبولىستى. وسى وقۋ ورنىنىڭ وقىتۋشىسى، قىتايدىڭ جوعارى وقۋ ورنىنان ءبىلىم الىپ كەلگەن، جاس قىتاي تانۋشى مامان ءجازيرا ەربول قىزى ءوز بايانداماسىن قىتاي تىلىندە جاساپ جاستاردىڭ قىتاي ءتىلىن ۇيرەنۋگە دەگەن قىزعۋشىلىعىن وياتتى.
ەستەرىڭىزگە سالا كەتەيىك، قىتايدىڭ باستى مەملەكەتتىك مەرەكەسى - قىتاي حالىق رەسپۋبليكاسىنىڭ قۇرىلعان كۇنى - قازاننىڭ 1-ىندە تويلانادى. 1949 - جىلدىڭ 1 - قازانىندا تيانانمەندە ميتينگ ءوتىپ، ماۋ زۇدىڭ قىتاي حالىق رەسپۋبليكاسىنىڭ قۇرىلعانىن جاريا ەتتى. سول جىلدىڭ 2 - جەلتوقسانىندا جاڭا مەملەكەتتىڭ ورتالىق ۇكىمەتى وتىرىسى بولىپ، 1 - قازان - مەملەكەتتىك مەرەكە كۇنى دەپ بەكىتىلدى.
باقىتجول كاكەش
