ن.نازاربايەۆ ب ۇ ۇ-نىڭ يادرولىق قارۋدان ازات الەمگە قول جەتكىزۋ جونىندەگى جالپىعا ورتاق دەكلاراتسياسىن قابىلداۋدى ۇسىندى
بۇگىن ب ۇ ۇ باس اسسامبلەياسى 70- مەرەيتويلىق سەسسياسىنىڭ جالپى پىكىرتالاسىندا ءسوز سويلەگەن ەلباسى نۇرسۇلتان نازاربايەۆ وسىلاي دەدى.
«حيروسيما مەن ناگاساكيدى اتوم قارۋىمەن بومبالاۋدان سوڭ 70 جىل وتكەندە يادرولىق قارۋسىز الەم قالىپتاستىرۋ ءىسىن ادامزاتتىڭ 21 عاسىرداعى باستى ماقساتى ەتۋگە شاقىرامىن. بىرىككەن ۇلتتار ۇيىمىنىڭ يادرولىق قارۋدان ازات الەمگە قول جەتكىزۋ جونىندەگى جالپىعا ورتاق دەكلاراتسياسىن قابىلداۋدى ۇسىنامىن»، - دەدى ن.نازاربايەۆ.
ەلباسى ءوز سوزىندە قازاقستان - يادرولىق پوليگوندى جاپقان جانە اۋقىمى جاعىنان ءتورتىنشى يادرولىق قارۋ-جاراقتان باس تارتقان، سونداي-اق ورتالىق ازيادا يادروسىز ايماق قۇرعان تاريحتاعى تۇڭعىش ەل ەكەندىگىن باسا اتاپ ءوتتى.
«يادرولىق قارۋسىز ايماقتى الەمنىڭ وزگە وڭىرلەرىندە، سونىڭ ىشىندە تاياۋ شىعىستا دا قۇرعان ءجون. يادرولىق دەرجاۆالار يادرولىق قارۋعا يەلىك ەتۋدەن باس تارتقان بارلىق ەلدەرگە كۇش قولدانباۋعا كەپىلدىك بەرۋگە ءتيىس»، - دەپ اتاپ ءوتتى ق ر پرەزيدەنتى.
اۆتور: مارلان جيەمباي
