قازاقستان بارىسى: قازاق كۇرەسىنەن ۇلتتىق قۇراما تارازدا جاتتىعۋعا كىرىستى

وقۋ جاتتىعۋ جيىندارىندا بالۋانداردى مارات جاقىت، جەڭىس بيتكوزوۆ سىندى جاتتىقتىرۋشىلار باپتايدى. بۇل تۋرالى «قازاقستان بارىسى» قازاق كۇرەسىن دامىتۋ قورىنىڭ باسپا ءسوز قىزمەتىنەن حابارلاندى.

«تارازداعى جاتتىعۋ جيىندارى قازان ايىنىڭ سەگىزىنە دەيىن جالعاسادى. بۇدان كەيىن باپكەرلەر كەڭەسى اقىلداسا كەلە بابىندا جۇرگەن بالۋانداردى «ەۋرازيا بارىسى» تۋرنيرىنە ىرىكتەيتىن بولادى. قازىر بەيبىت ىستىبايەۆ، رۋسلان ءابدىرازاق، عاني سەيدىلدايەۆ، مۇحيت تۇرسىنوۆ، ايبەك نۇعىماروۆ، اسىل بارمەنوۆ سىندى «قازاقستان بارىسى» ءتۋرنيرىنىڭ جەڭىمپازدارى مەن جۇلدەگەرى وقۋ- جاتتىعۋ جيىندارىنا قاتىسۋدا»، - دەلىنگەن باسپا ءسوز بايانىندا.

ەسكە سالا كەلەيىك، 9- قازاندا تاراز قالاسىنداعى «تاراز- ارەنا» سپورت كەشەنىندە Ⅲ حالىقارالىق «ەۋرازيا بارىسى» تۋرنيرى وتەدى. وعان ەۋروپا مەن ازيا ەلدەرىنەن سەگىز قۇراما قاتىسادى.

ايتا كەتەرلىگى، بيىلعى «ەۋرازيا بارىسى» تۋرنيرى قازاق حاندىعىنىڭ 550 جىلدىق مەرەيتويىنا ورايلاستىرىلىپ وتكەلى وتىر. بۇعان دەيىنگى ەكى تۋرنيردە بالۋاندار 5 سالماق دارەجەسى بويىنشا كوماندالىق سىنعا تۇسسە، بيىل 7 سالماق دارەجەسى بويىنشا بەلدەسەدى. تۋرنيرگە سەگىز مەملەكەتتەن جالپى سانى 56 بالۋان قاتىسادى. بۇعان دەيىن بالۋانداردىڭ سالماق دارەجەسى 60, 70, 80, 90 جانە + 90 كەلى بولىپ بەلگىلەنسە، بيىلدان وزگەرىس ەنىپ، بالۋاندار 55, 66, 74, 82, 90, 100 جانە +100 كەلى سالماق دارەجەلەرىندە بەلدەسۋگە شىعادى.

تۋرنيردىڭ جالپى جۇلدە قورى  18800000  تەڭگەنى قۇرايدى. جەڭىمپاز اتانعان كوماندالارعا مىناداي اقشالاي سىياقىلار تابىستالادى:

1-ورىن -  9400000  تەڭگە؛

2-ورىن -   5640000 تەڭگە؛

3-ورىن -   3760000 تەڭگە.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى