قىزىلوردادا تۇڭعىش رەت قاۋىن- قاربىز فەستيۆالى ءوتتى - فوتو
ەلىمىزدە قاۋىن- قاربىز ءوندىرىسى جونىنەن سىر ءوڭىرى الدىڭعى قاتاردا كەلەدى. قازىرگى ۋاقىتتا داريا بويىنداعى ديقاندار جىل سايىن 15 مىڭ گەكتارعا جۋىق باقشا داقىلدارىن ەگەدى. ولاردىڭ اراسىندا قاۋىننىڭ قارا كۇلابى، امىرە، اڭگەلەك سياقتى سورتتارى ۇلكەن سۇرانىسقا يە.
بيىل قالا كۇنى مەرەكەسى كەڭ كولەمدە اتالىپ وتىلۋدە. قاۋىن- قاربىز، كونديتەرلىك ونىمدەر جانە بالالار شىعارماشىلىعى فەستيۆالى، جاس اقىندار ءمۇشايراسى، اۋىلشارۋاشىلىق جارمەڭكەسى، سپورتتىق سايىستار ۇيىمداستىرىلىپ، الەۋمەتتىك نىساندار پايدالانۋعا بەرىلدى. فەستيۆالدە ايماق باسشىسى ق. كوشەربايەۆ قىزىلوردالىقتاردى مەرەكەلەرىمەن قۇتتىقتادى.
بۇگىنگى قاۋىن- قاربىز فەستيۆالى - الا جازداي ەگىس دالاسىندا تىنباي ەڭبەك ەتكەن اعايىننىڭ ەڭبەك مەرەكەسى. ايتا كەتەيىك، سوڭعى ءبىر اي بويى قالا تۇرعىندارىن ارزان باعالى ونىمدەرمەن قامتاماسىز ەتۋ ماقساتىندا ءار جەكسەنبى سايىن اۋىلشارۋاشىلىق ونىمدەرىنىڭ جارمەڭكەسى ۇيىمداستىرىلدى.
فەستيۆال ۇلتتىق ويىندارعا جالعاستى. ارقان تارتۋ، اسىق اتۋ، گىر كوتەرۋ، قول كۇرەستە مىقتىلار انىقتالدى. سونداي- اق، «بالالار الەمىنە» ساياحات» بالالار ويىنشىقتارىنىڭ جىلجىمالى شەرۋى ءوتتى. قالا كۇنى ەسترادا جۇلدىزدارىنىڭ قاتىسۋىمەن وتەتىن گالا- كونسەرتپەن قورىتىندىلانادى.
