ابايدىڭ ولەڭدەرى مەن قارا سوزدەرى الەمگە تارادى

قازاقتىڭ ۇلى ويشىلى، اقىن اباي قۇنانباي ۇلىنىڭ 170 -جىلدىعىنا ارنالعان فەستيۆال حالىقارالىق سيپات العان.

سەبەبى، ب ۇ ۇ دامۋ باعدارلاماسىنىڭ الەۋمەتتىك جەلىلەردە ىسكە قوسقان #Abay170 فلەشموبى اياسىندا ا ق ش، ازەربايجان، يتاليا جانە بىرىككە اراب امىرلىكتەرىنەن ابايدىڭ ولەڭدەرى مەن اندەرىن ورىنداپ، ۆيدەو جىبەرگەن ازاماتتار كوپ تىركەلىپتى.

«جالپى، بۇگىن نازاربايەۆ ۋنيۆەرسيتەتىنىڭ ستۋدەنتتەرى ابايدىڭ ولەڭدەرىن وقىپ، اندەرىن شىرقايدى. ونىڭ ۇستىنە، بۇگىن كىشىگىرىم فوتوكورمە دە ۇيىمداستىرىپ وتىرمىز. سۋرەتتەردىڭ بارلىعىن #Abay170 فلەشموبى اياسىندا الەۋمەتتىك جەلىنى بەلسەندى پايدالاناتىن ازاماتتار جىبەرگەن. جانە ءوزىمىز بىلەتىندەي، ليريك اقىن اباي قۇنانباي ۇلىنىڭ جىلدىڭ ءتورت مەزگىلى تۋرالى تاماشا ولەڭدەرى بار. ينتەرنەت پايدالانۋشىلار جىبەرگەن سۋرەتتەر سول جىل مەزگىدەرى تاقىرىبىندا وتە كوپ سۋرەت جىبەرىپ، ءبىزدى قۋانتتى»، - دەيدى ب ۇ ۇ- نىڭ شىعىس قازاقستان وبلىسىنداعى بىرلەسكەن باعدارلاماسىنىڭ قوعاممان بايلانىس جونىندەگى مەنەدجەرى مەيرامگۇل بەيسەنوۆا.

م. بەيسەنوۆا اتاپ وتكەندەي، #Abay170 حەشتەگى تەك قازاقستان بويىنشا عانا ەمەس، شەت مەملەكەتتەردە دە وتە كوپ اقپارات جينالعان حەشتەگكە اينالدى. جالپى، ب ۇ ۇ- نىڭ دامۋ باعدارلاماسى بۇل فەستيۆالدى ويشىلدىڭ تۋعان ولكەسى - سەمەي وڭىرىنەن باستاعان بولاتىن.

حالىقارالىق اكسيا اياسىندا ابايدىڭ ولەڭىن جاتتاپ، قارا ءسوزىن وقىعان ازاماتتار، اقىننىڭ ەسىمىمەن بايلانىستى كەز كەلگەن شاراعا بارعان ادامدار 2 مينۋتتىق ۆيدەو ءتۇسىرىپ، وسى حەشتەگپەن ءوز پاراقشالارىنا جاريالاپ وتىرعان. بۇگىنگى فەستيۆالدە ەڭ ادەمى 15 ۆيدەو كورسەتىلدى. ستۋدەنتتەر بۇل ۆيدەولاردى كورىپ قانا قويماي، ساحناعا شىعىپ، بىرەۋى دومبىرا تارتسا، ەكىنشىسى سول دومبىرا ۇنىنە ەرە ابايدىڭ ولەڭدەرى مەن قارا سوزدەرىن ورىنداپ جاتتى.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى