مايرا مۇحامەد قىزى مەن سالتانات احمەتوۆا «اباي» وپەراسىندا شىرقايدى

قويۋشى رەجيسسەر دجانكارلو دەل موناكو ورىنداۋشىلار قۇرامىن بەكىتتى.

باس پارتيانى ورىندايتىندار - ق ر ەڭبەك سىڭىرگەن قايراتكەرلەرى سۇندەت بايعوجين، تالعات مۇسابايەۆ. اجاردىڭ رولىندە - پاريجدىك «گراند وپەرا» تەاترىندا قازاقستاننان تۇڭعىش جانە جالعىز سوليست بولعان ق ر ەڭبەك سىڭىرگەن قايراتكەرى، ق ر مەملەكەتتىك سىيلىعىنىڭ يەگەرى مايرا مۇحامەد قىزى، سونداي-اق كوپتەگەن حالىقارالىق كونكۋرستاردىڭ لاۋرەاتى سالتانات احمەتوۆا. ايدار - ق ر ەڭبەك سىڭىرگەن قايراتكەرى جان ءتاپين جانە حالىقارالىق كونكۋرستاردىڭ لاۋرەاتى مەيىر باينەشوۆ. جيرەنشە - ەۆگەني چاينيكوۆ، قازىبەك دوسمۇحامبەتوۆ.

قازاقتىڭ مۋزىكالىق ونەرىنىڭ ۇزدىك تۋىندىسىن ا. جۇبانوۆ پەن ل. حاميدي، ۇلى جازۋشى مۇحتار اۋەزوۆتىڭ ليبرەتتوسىنا جازعان. سيۋجەتتە قازاقتىڭ اقىنى، اعارتۋشىسى، فيلوسوفى ابايدىڭ ءومىرى باياندالادى. شاكىرتى ايداردىڭ سۋسىنىنا باقتالاستارى ۋ قوسىپ بەرگەنى جانە جالىنداعان ماحاببات ساتتەرى بەينەلەنەدى.

قويىلىمنىڭ يدەياسىنىڭ وزەگى - قازاقتىڭ اسا كورنەكتى اقىنى، اعارتۋشىسى جانە فيلوسوفى اباي قۇنانباي ۇلىنىڭ (1845-1904) تۇلعاسى. سونىمەن قاتار، بۇل ادامنىڭ جاقسى مەن جامان جاقتارىن سۇزگىدەن وتكىزەتىن ەسكىشىلدىك پەن جاڭاشىلدىقتىڭ بىتپەس كۇرەسى، قوس جاستىڭ - ايدار مەن اجاردىڭ رومانتيكالىق جانە تراگەديالىق ماحابباتىنىڭ تاريحى. ەسكى داستۇرگە اباي مەن ونىڭ شاكىرتى ايدار قارسى شىعادى. تاماشا مۋزىكا كەيىپكەرلەردىڭ سۇيىسپەنشىلىگىن دە، سوت كورىنىسىندەگى ۇرەيدى دە، توي-دۋمان كەزىندەگى شاتتىقتى دا، قازانىڭ شەرىن دە جەتكىزەدى، دەگەنمەن سوڭىندا ءۇمىت اۋەنى ەستىلەدى جانە ول ابايدىڭ بەينەسىمەن بايلانىستى ەدى.

قويىلىمنىڭ ەرەكشەلىگى سەنوگرافيادا تەحنيكانىڭ سوڭعى مۇمكىندىكتەرى پايدالانىلىپ، مۋزىكالىق تۋىندى سيۋجەتىنىڭ زاماناۋي نۇسقادا ۇسىنىلعاندىعىندا. «استانا وپەرا» باس ديريجەرى الان بورىبايەۆتىڭ ويىنشا، «اباي» وپەراسى - جالپى جازىلعان مۋزىكالىق شىعارمالار ىشىندەگى اسا كورنەكتىسى.

قويىلىمدى ازىرلەگەن شىعارماشىلىق توپ: قويۋشى ديريجەر - ايگىلى قازاقستاندىق ديريجەر، «استانا وپەرا» تەاترىنىڭ باس ديريجەرى، ق ر ەڭبەك سىڭىرگەن قايراتكەرى، كومپوزيتور ا. جۇبانوۆتىڭ شوبەرە- جيەنى - الان بورىبايەۆ. قويۋشى رەجيسسەر - اتاقتى وپەرا ءانشىسى ماريو دەل موناكونىڭ ۇلى، يتاليالىق رەجيسسەر دجانكارلو دەل موناكو، كەڭەس بەرۋشى رەجيسسەر - ق ر ەڭبەك سىڭىرگەن ءارتىسى، تاۋەلسىز «تارلان» سىيلىعىنىڭ يەگەرى، «پاراسات» وردەنىنىڭ كاۆالەرى، پروفەسسور ەسمۇحان وبايەۆ.

سپەكتاكلدىڭ سەنوگرافيالىق بەزەندىرىلۋىن قازاقستاندىق جانە يتاليا شەبەرلەرى - زامانىمىزدىڭ اسا كورنەكتى سەنوگرافى ەتسيو فريدجەريو مەن كوستيۋم جونىندەگى سۋرەتشى «وسكار» سىيلىعىنىڭ يەگەرى فرانكا سكۋارچاپينو ازىرلەدى. جارىق سۋرەتشىسى - ۆينيچو كەلي، ال پروەكتسيا ديزاينەرى - سەردجيو مەتاللي.

قويۋشى حورەوگرافتار ق ر ەڭبەك سىڭىرگەن قايراتكەرلەرى تۇرسىنبەك نۇرقاليەۆ جانە عاليا بورىبايەۆا.

ەكى اكتىدەن تۇراتىن سپەكتاكل 19:00 دە باستالادى، بيلەت باعاسى 500 تەڭگەدەن جوعارى.
massaget.kz

سۋرەت الەۋمەتتىك جەلىدەن الىندى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى