باس پروكۋراتۋرا شەنەۋنىكتەرگە پارا العىزباۋدىڭ ءبىر جولىن ۇسىندى
«ادامدار بولىپ جاتقان وقيعانى كامەراعا ءتۇسىرىپ، ينتەرنەتكە، الەۋمەتتىك جەلىلەرگە سالىپ، پوليتسيا مەن مەملەكەتتىك ورگانداردىڭ ماسەلەنى قاراۋىن تالاپ ەتەدى. اقپارات لەزدە تاراپ، داۋلى ماسەلە بولىپ شىعا كەلەدى. كوشەلەردەگى كامەرالار ادامداردى تارتىپكە سالادى. سوت ىستەرى اۋديوعا جانە ۆيدەوعا جازىلادى. جول پوليتسەيلەرى قازىردىڭ وزىندە ۆيدەو تىركەگىشتەردى تاعىپ ءجۇر. ءبىز تۇرمەلەردە دە قىزمەتكەرلەردىڭ عانا ەمەس، كوپشىلىككە قولجەتىمدى ورىنداردىڭ بارلىعىن وسىنداي تەحنيكامەن جابدىقتاۋدى تالاپ ەتىپ وتىرمىز»، - دەدى جاقىپ اسانوۆ ق ر «اقپاراتقا قولجەتىمدىلىك تۋرالى» زاڭى تالقىلانعان حالىقارالىق ءماسليحات بارىسىندا.
«مۇنىڭ بارلىعى شەنەۋنىكتەر جۇمىسىنىڭ ۇنەمى قوعام نازارىندا ەكەنىن جانە ولاردىڭ بۇرىنعىداي ماسەلەنى «شەشە» المايتىنىن تۇسىنۋگە ماجبۇرلەيدى»، - دەدى باس پروكۋروردىڭ ورىنباسارى.
ونىڭ مالىمەتىنشە، قازىرگى تاڭدا قۇقىقتىق ستاتيستيكا جانە ارنايى ەسەپ مالىمەتتەر بازاسىندا شامامەن 50 مىڭ ادام تۇر، ولار جەمقورلىق ءۇشىن جازالانعاندار. «ولار ەشقاشان مەملەكەتتىك قىزمەتتە ىستەي المايدى. جەمقورلاردىڭ ءتىزىمى جىل سايىن 3 مىڭ ادامعا ارتىپ وتىرادى. قانشاما سوت، مەملەكەت ولاردى دايىنداۋ ءۇشىن قانشاما قارجى جۇمسايدى، ارالارىندا ءوز ءىسىنىڭ قانشاما مامانى بار، ولاردىڭ قابىلەتى سول سياقتى كورىنەدى. اقپاراتتىڭ قولجەتىمسىز بولۋى، ولاردىڭ جۇمىسىنىڭ تاسالانۋى ولاردى وسىنداي ارەكەتكە ۇرىندىردى. ءبىر بولىگى قارماققا ءىلىندى. ەگەر ولاردىڭ ءىسى اشىق، قوعامنىڭ باقىلاۋىندا بولعاندا، ولار مۇنداي زاڭ بۇزۋشىلىققا بارمايتىن ەدى. تۇيىقتىقتا ازعىرۋشىلىق كوپ بولادى، ەگەر ءبىز بۇل زاڭدى قابىلداساق، كوپشىلىكتى قۇتقارىپ، ساقتاپ قالامىز. بۇل ارتىقشىلىقتاردىڭ بىرەۋى عانا»، - دەدى اسانوۆ.
باس پروكۋروردىڭ ورىنباسارى «اقپاراتقا قولجەتىمدىلىك تۋرالى» زاڭ جوباسىن قوعامعا قاجەت دەپ ەسەپتەيدى. «قۇزىرلى ورگاننىڭ وكىلى رەتىندە مەن ءۇشىن مىنا ماسەلە ماڭىزدى - بۇل زاڭ ەرتەڭ قانشالىقتى ءتيىمدى جۇمىس ىستەيدى؟ وندا اقپاراتتى قولجەتىمدى ەتەتىن قۇرالدار جەتكىلىكتى مە؟ مەنىڭشە، ءيا. وندا قاجەتتى مەحانيزمدەر بار-جوعارى تۇرعان ورگاندا شاعىمدانۋعا، پروكۋراتۋرامەن بايلانىسۋعا جانە سوتقا دا بىردەن وتۋگە بولادى»، - دەدى باس پروكۋروردىڭ ورىنباسارى.
