قازاقتىڭ قارشاداي شاحماتشى قىزى جانسايا ابدىمالىك پەن اناسىنىڭ سۇحباتى

دەگەنمەن شاحماتشى قىزىمىزدىڭ بۇل كورسەتكىشكە كوڭىلى تولمايدى. ويتكەنى ونىڭ كوزدەگەنى تەك التىن تۇعىر. سوندىقتان كۇرەسكەر بۇرىمدىمىز كەلەسى جىلعى چەمپيوناتتا مىندەتتى تۇردە باس جۇلدەنى قورجىنىنا سالاتىندىعىن ايتادى.

- جانسايا، سەنىڭ ناعىز كۇرەسكەر ەكەنىڭدى بىلەمىز. دەگەنمەن التىن مەدال الۋعا نە جەتپەدى؟

- تۋرنيردىڭ ون ءۇش كەزەڭنەن تۇرۋى مەن ءۇشىن اۋىر سوقتى. بۇعان دەيىن ادەتتە توعىز كەزەڭدە باق سىنايتىنبىز. بۇل جولى سول توعىزىنشى كەزەڭنىڭ قورىتىندىسى بويىنشا مەن تۋرنير كەستەسىندە ءبىرىنشى ورىندا تۇردىم. جەتىنشى كەزەڭنەن سوڭ قاتىسۋشىلارعا دەمالۋعا مۇمكىندىك بەرىلدى.

وسى دەمالىستا ءوز-ءوزىمدى تىم جۇكتەپ تاستاعان سياقتىمىن. مۇندايدا ەشتەڭە ىستەمەسەڭ، نەشە ءتۇرلى ويلار كەلە باستايدى. قالاي دا التىن الۋىم كەرەك دەگەن وي تۇردى. ءبىر جاعى پسيحولوگيالىق قىسىم، ەكىنشى جاعىنان شارشاعانىم بار. سوڭعى ويىنداردا بولماشى قاتەلىكتەر جىبەرىپ، كوش تىزگىنىن بوساتىپ الدىم. ايتپەسە، جەتى تۋردان كەيىن جەتى ۇپايدى بۇرىن-سوڭدى ەشكىم الىپ كورمەگەن ەكەن.

بۇل بىرىنشىلىككە تەك التىن ءۇشىن بارعان ەدىم. جەڭىلىسىمە نالىعانىم سونشالىق، ال كەلىپ جىلايىن. اتا-انام قولا جۇلدەنىڭ وزىنە قۋانعانىمەن، باپكەرىم ۆلاديمير چۋچەلوۆ جۇمىستى ۇدەتە ءتۇسىپ، الدا بۇدان دا بيىك ماقسات تۇرعانىن ايتىپ جاتتى.

بۇل - الەم چەمپيوناتىنداعى ەكىنشى جۇلدەم. بىلتىرعى كۇمىسىمدى قوسا ەسەپتەگەندە، ەندى ماعان بىرىنشىلىكتىڭ التىن مەدالى قاجەت. بۇل ماقساتىما كەلەسى جىلى مىندەتتى تۇردە قول جەتكىزەمىن.

- قاتەلەسپەسەم، الدىڭدى وراپ كەتكەن قىزداردىڭ سەنەن جاسى دا ۇلكەن. بۇل دا اسەر ەتپەي قويمايدى عوي...

- مۇمكىن. جالپى، الەم چەمپيوناتىنا بارعانداردىڭ كوپشىلىگى مەنەن ۇلكەن. مۇندايدا تاجىريبەنىڭ ءرولى زور. ولارعا قاراعاندا تەزىرەك شارشايمىن. ونىڭ ۇستىنە جازدا اۋىرىپ قالىپ، فيزيكالىق جاتتىعۋلاردى توقتاتۋعا تۋرا كەلگەن ەدى. سونىم دۇرىس بولمادى-اۋ. ال ءجۇرىس، ءتاسىل جاعىنان قارسىلاستارىمنان دايىندىعىم الدەقايدا جاقسى ەكەنىن سەزدىم.

- شىنىمەن دە، سەنىڭ فيزيكالىق دايارلىققا باسا نازار اۋداراتىنىڭدى ەستىگەنمىن. ال ادەتتە كۇندەلىكتى كەستەڭدى كىم رەتتەپ وتىرادى؟

- شاحماتتان كەيىنگى سۇيىكتى ءىسىم - سۋدا ءجۇزۋ. سەبەبى، ورىندىقتا ۇزاق وتىرۋ ادامنىڭ ومىرتقاسىنا، جالپى دەنە بىتىمىنە كەرى اسەر ەتەدى. كۇندەلىكتى ساباعىم مەن جاتتىعۋىم بار. ودان قالدى اعىلشىن ءتىلىن ۇيرەنۋگە ۋاقىت بولەمىن. شەتەلگە ءجيى شىعاتىندىقتان، ءتىل بىلمەسەڭ، وتە قيىن. كەي-كەيدە دوستارىممەن سەرۋەندەيمىن. قازىر ۋاقىتىمدى ءوزىم جوسپارلاي باستادىم.

الما ءاشىروۆا، جانسايانىڭ اناسى:

جانسايانىڭ بويىندا كوشباسشىلىققا دەگەن «ازارت» پايدا بولدى

- الما حانىم، الەم بىرىنشىلىگى قالاي ءوتتى؟ باستى ماقسات ورىندالدى ما؟

- حانتى - مانسيسكىدە وتكەن 20 جاسقا دەيىنگىلەر اراسىنداعى الەم چەمپيوناتىندا جانسايانىڭ توبىندا 48 شاحماتشى باق سىنادى. جالپى، الەم بىرىنشىلىگىنە 40 ەلدىڭ وكىلدەرى قاتىستى. مۇنىڭ ءوزى تۋرنيردىڭ دەڭگەيىن بىلدىرسە كەرەك. باستاپقىدا جولداسىم ەكەۋمىز قالاي بولادى ەكەن دەپ ۋايىمدادىق. ويتكەنى جازدىگۇنى قىزىمىز سىرقاتتانىپ قالىپ، جاتتىعۋدان ءبىراز قول ۇزۋىنە تۋرا كەلگەن ەدى. سوندىقتان ءبىز بۇل بىرىنشىلىكتى نەگىزىنەن تاجىريبە الاڭى رەتىندە قاراستىردىق. ال جانسايا، كەرىسىنشە، چەمپيوناتقا تەك جەڭىس ءۇشىن بارعان ەكەن. مۇنى ول بىرىنشىلىك اياقتالعاندا ءبىر-اق ايتتى.

- جانسايا العاشقى تۋردىڭ قورىتىندىسى بويىنشا كوش باسىندا تۇر ەدى. قالاي ويلايسىز، التىن الۋىنا نە كەدەرگى بولدى؟

- نەگىزى 7 كەزەڭنەن تۇرعان العاشقى تۋردا ول 7 ۇپايمەن كوش باسىندا كەلە جاتقان. وسىنىڭ ءوزى قىزىمىزدىڭ چەمپيوناتقا تياناقتى دايارلانعانىن اڭعارتسا كەرەك. ءبىرىنشى كەزەڭنەن سوڭ شاحماتشىلارعا دەمالىس بەرىلدى. ونىڭ ءسوزسىز ليدەر ەكەندىگىن تۇسىنگەن ب ا ق وكىلدەرى جان-جاقتان حابارلاسىپ، ءتىپتى، توكيودان گازەت تىلشىلەرى قوڭىراۋ شالىپ: «جانسايا قازاقستانعا ورالعاندا، سۇحبات العىمىز كەلەدى. ازيا قۇرلىعىندا ءدال وسىنداي شاحماتشىنىڭ بار ەكەندىگى ءبىز ءۇشىن ۇلكەن ماقتانىش»، - دەپ جاتتى.

الەمنىڭ تۇكپىر-تۇكپىرىنەن كەلگەن باسىلىمدار مەن تەلەديدار وكىلدەرى دە جەڭىستى الدىن الا جانساياعا بەرىپ قويدى. بالكىم، وسى جايتتار دا اسەر ەتكەن شىعار. بوي جەتىپ تە قالدى، جاۋاپكەرشىلىكتى جەتە تۇسىنە باستادى. قازاقستاندا دا ودان التىن كۇتىپ وتىرعاندىعىن سەزدى. ايتا بەرسەڭ، اسەر ەتۋشى فاكتورلار وتە كوپ. چەمپيوناتتىڭ 13 تۋرعا سوزىلعانى تاعى بار. بۇل الەم بىرىنشىلىگى ءۇشىن دە تىم ۇزاق.

ەكىنشى كەزەڭدە ءبىراز السىرەپ قالعانىن بايقادىم. ءوزىڭىز ويلاڭىزشى، كۇنىنە كەمى 3-4 ساعاتتان وينايدى دا، كىشكەنە تىنىققان سوڭ، كەلەسى كۇننىڭ جارىسىنا دايارلانادى. سوعان قاراماستان بارىن سالىپ باقتى. ەگەر سوڭعى پارتيادا جەڭىسكە جەتكەندە، ونىڭ التىن الارى ءسوزسىز ەدى. وكىنىشكە قاراي، سول كەزدەسۋدە ول تەڭ وينادى دا، التىننىڭ اۋىلى الىستاعانىن سەزىپ، ەكى كوزىنە ەرىك بەرىپ الدى. اكەسى ەكەۋمىز باسۋ ايتىپ، «ءبىز قولانىڭ وزىنە قۋانساق، سەن نەگە جىلايسىڭ؟» دەسەك، «سىزدەر تۇسىنبەيسىزدەر، مەن مۇندا تەك التىن ءۇشىن كەلگەنمىن»، - دەپ وكسيدى.

- «بالاسى جاۋعا شاپقاندا، اناسى تاقىم قىسادى» دەمەكشى، ءسىز ءالى كۇنگە دەيىن جانسايانىڭ جانىنان تابىلىپ، ۋايىمداپ وتىراسىز با الدە بۇل قورقىنىش، ۇرەي بۇگىندە ازداپ سەيىلدى مە؟

- مەنىڭشە، ەشبىر اتا-انا بالاسى بايگەگە شاپقاندا، ۋايىمسىز، جايباراقات وتىرا المايدى. ول سپورتتىڭ قاي تۇرىندە، ءتىپتى، باسقا سالادا بولسىن سولاي. بۇرىندارى جارىستارعا قىزىممەن بىرگە مەن باراتىنمىن. ال قازىر بۇل مىندەت تىكەلەي اكەسىنىڭ موينىندا. بۇل جولى دا حانتى-مانسيسكىگە كۇيەۋىم كەتكەن. ال مەن جارىستىڭ ورتاسىنا قاراي باردىم. ءالى دە كىشكەنتاي عوي، قاراۋسىز قالدىرۋعا بولمايدى. باسقاسىن قويعاندا، شاشىن جۋاتىن ءبىر ادام كەرەك.

- ونىڭىز راس، بار-جوعى 15 جاسار قىزدىڭ بۇرىمىنا نازار اۋدارماۋ مۇمكىن ەمەس. شاشىن ءوسىرۋ تۋرالى شەشىمدى ءوزى قابىلداپ پا ەدى؟

- قىزىما شاش تۋرالى اقىل ايتپايمىن. شاشىن ءوسىرۋ - جانسايانىڭ ءوز شەشىمى. اسىرەسە، شاشىن ءورىپ جۇرگەندى ۇناتادى. ءبىراق ونىڭ بۇل قالپى اكەسى ءۇشىن وتە ماڭىزدى. «قىزىم، سەنىڭ تابيعي سۇلۋلىعىڭ بار، شاشىڭ دا ناعىز قازاق قىزىنا ءتان ۇلگىدە. قيىپ تاستاما» دەپ ايتىپ وتىرادى. ال جانسايا ءبىزدىڭ سوزىمىزگە ۇنەمى قۇلاق اسادى. اكەسىنىڭ ايتقانى زاڭ (جىلى جىميىپ). قايدا بارساق تا بىزدەن كوبىسى «شاشى تابيعي ما؟» دەپ سۇرايدى. جارىستاردا دا بۇرىمىنا قاتىستى ءجيى ماقتاۋلار ەستىگەن سوڭ، قىز بالا عوي، وزىنە نازار اۋدارعاندى، ماقتاۋ ايتقاندى ۇناتاتىن شىعار. قازىر شاش ۇلگىسىن وزگەرتۋ تۋرالى مۇلدە ءسوز قوزعامايدى.

- جانسايانىڭ كيىم كيىسى دە قاراپايىم. ۇنەمى كوستيۋم كيىپ جۇرەدى. كيىم تاڭداۋدا كىممەن اقىلداسادى؟

- ەگەر قانداي دا ءبىر ماڭىزدى ءىس-شاراعا قاتىساتىن بولسا، جەيدە مەن دجينسى شالبارىن كيىپ بارماسى انىق. ونى مەن ءوزىم قاداعالاپ وتىرۋعا تىرىسامىن. ونى قوناق دەپ شاقىرعان سوڭ، كىشكەنتاي بولسا دا، ءىس-شارانى ۇيىمداستىرۋشىلاردى، وعان قاتىسۋشىلاردى سىيلاي ءبىلۋى كەرەك دەپ ويلايمىن. ال جارىسقا كيىمدى ادەتتە ءوزى تاڭدايدى. قالاي دەگەنمەن، ۇستەلدىڭ باسىندا ساعاتتاپ وتىراتىن، ءجۇرىپ-تۇراتىن، جاتتىعۋ جاسايتىن جانسايا عوي. وزىنە نەعۇرلىم ىڭعايلى بولۋى قاجەت. ءبىراق تابيعاتىنان جىلتىراعان نەمەسە جىرتىق دجينسىلاردى كيۋگە قۇشتار ەمەس. قاراپايىم، كلاسسيكالىق ۇلگىدە كيىنگەندى ۇناتادى. بالكىم، شاحماتتىڭ اسەرى شىعار. كويلەك المايتىن.

«سەن قىز بالاسىڭ عوي، كويلەك كيگەن جاراسادى» دەپ ءوتىنىش جاساعانداي بولامىز. ول «جۇرىپ - تۇرعانعا قولايسىز» دەپ مۇلدە كەلىسپەيتىن. جاقىندا كەزەكتى ءبىر تۋرنيرگە بارعاندا دۇكەن ارالاپ ءجۇرىپ ءبىرىنشى رەت كويلەك ساتىپ الىپتى. سونداي كويلەكتى كوپتەن بەرى ارمانداپ جۇرگەنىن ەستىگەن اكەسى بىردەن ساتىپ الىپ بەرگەن (جىميىپ). ونىسىن ءالى كيگەن جوق.

- كىشكەنتاي بولسا دا، جانسايانىڭ بويىندا ادام قىزىعاتىن قاسيەتتىڭ ءبارى بار. ىرىمشىل حالىقپىز عوي. «ءسوز تيەدى»، «كوز تيەدى» دەپ قورقىپ، ۇستاناتىن ارنايى ىرىم-جورالعىلارىڭىز جوق پا؟

- ءوز باسىم ىرىمشىل ەمەسپىن. وندايعا مۇلدە ءمان بەرمەيمىن. كەيدە بايقايمىن، كەيبىرەۋلەر «انا كىسى ماعان باسقاشا قارادى، سۋرەتكە تىم كوپ ءتۇسىردى، اڭدىعانداي كورىندى» دەپ نەشە ءتۇرلىنى ايتىپ جاتادى. ءبىراق ونىڭ بارىنە ءمان بەرە بەرسەڭ، قالاي ءومىر سۇرۋگە بولاتىندىعىن تۇسىنبەيمىن.

ادەتتە سپورتشىلار - ەڭ ىرىمشىل ادامدار. اكەمىز دە ىرىمعا تىم جاقىن. ۇنەمى ۋايىمداپ وتىرادى. ول بالاعا دا اسەر ەتۋى مۇمكىن عوي. سوندىقتان كەيدە باسۋ ايتۋعا تۋرا كەلەدى. مەنىڭشە، ءاربىرىمىزدىڭ ءىس-ارەكەتىمىز، ايتقان ءسوزىمىز جاراتقان اللانىڭ نازارىنان تىس قالمايتىندىعىن ۇمىتپاۋ كەرەك.

ادال، بىرەۋدىڭ الا ءجىبىن اتتامايتىن، نيەتى ءتۇزۋ ادامنان جاماندىقتىڭ دا الىس جۇرەتىنى ءسوزسىز. وسىنى جانساياعا دا ايتىپ وتىرامىن.

- ادەتتە قىزدار سىرىن انالارىنا ايتادى. ال جانسايا كىممەن سىر بولىسكەندى ۇناتادى؟

- اعاسىمەن. ەكەۋىنىڭ اڭگىمەسى جاراسا كەتەدى. اكەسى ەكەۋمىزدەن اقىل سۇراعانىمەن، بار سىرىن ۇلكەن ۇلىمىزعا عانا ايتادى. ەكەۋى شۇيىركەلەسىپ، اعاسى بىزگە نە تۋرالى ايتىپ، نەنى جاسىرىپ قالۋعا بولاتىندىعىنا قاتىستى كەڭەس بەرەدى ەكەن. ەكەۋى ءبىر-ءبىرىن قورعاشتاپ، سىرلارىن اشپايدى. ول دۇرىس تا شىعار. ال اعاسىنان كەيىن اكەسى ەكەۋمىز تۇرامىز.

وتباسىمىزدا ۇل تەك اكەسىنە، قىز بالا تەك اناسىنا جاقىن بولۋى كەرەك دەگەن تۇسىنىك جوق. جانسايا اكەسىنىڭ ءوزىن قانشالىقتى جاقسى كورەتىندىگىن بىلەدى، سەزەدى. بالا كوڭىلىن الداۋ مۇمكىن ەمەس.

- جانسايا قازىر وتپەلى كەزەڭدە. جاسوسپىرىمنىڭ مىڭ قۇبىلاتىن ادەتى عوي. ال قىزىڭىزدىڭ مىنەزىندە قانداي دا ءبىر وزگەرىستەر بايقالا ما؟

- جانسايا بالا كەزىنەن جۋاس بولعاندىقتان با، اشۋعا بوي الدىرعانىن بايقاعان جوقپىن. ءبىراق وزگەرىس بار، جاقسى جاعىنان، ارينە. وسى جولعى چەمپيوناتتا سوعان كوز جەتكىزدىم. شاحماتتاعى ءاربىر ءجۇرىسى، ويلاۋى جانە مۇنداي قادامعا نە سەبەپتى بارعانى، ءبارى-ءبارىن قازىر باسقاشا تۇسىندىرەدى. بۇرىن باپكەرىنىڭ ايتقاندارىن قابىلداۋىندا دا بالا ەكەندىگى سەزىلىپ تۇراتىن. بۇگىندە شاحماتقا دەگەن كوزقاراسى دا وزگەرىپ كەلەدى. جەڭىسكە جەتۋ، العا ۇمتىلۋ دەگەننىڭ دە ماعىناسىن شىن تۇسىنە باستاعان سەكىلدى. بىرىنشىلىكتەگى قولا جۇلدەسىنە بايلانىستى قانشا جەردەن كوڭىل-كۇيى تۇسسە دە، مۇنىمەن توقتامايتىنىن، ۇيگە جەتكەن بويدا جاتتىعۋعا قايتا كىرىسەتىنىن، ناقتىراعى، كۇرەسۋگە دايىن ەكەندىگىن جەتكىزدى.

- جانسايانىڭ چەمپيوناتتا ولجالاعان قارجىسىن قايىرىمدىلىق قورىنا بەرەتىندىگى عالامتوردا قىزۋ تالقىلانۋدا. ال مۇنداي قادامعا بارۋىنا نە اسەر ەتتى ەكەن؟

- تاپقان تابىسىن قايىرىمدىلىق قورىنا اۋدارۋ تۋرالى شەشىم قابىلداعانى ءبىرىنشى رەت ەمەس. بۇعان دەيىن دە مۇقتاج جاندارعا از دا بولسىن كومەكتەسكىسى كەلەتىندىگىن ءبىلدىرىپ جۇرەتىن. شىنىن ايتقاندا، ول بالا كەزىنەن مەيىرىمدى. ادەتتە وتباسىمىزبەن مەشىتكە بارا قالعاندا، قايىر سۇراپ تۇرعانداردىڭ بارلىعىنا اقشا تاراتىپ شىعادى. ونىڭ مەشىتكە تەك سول ماقساتتا باراتىندىعىن دا بىلەمىز ءارى مۇنداي قادامىن قولدايمىز.

شاحمات كوماندالىق سپورتقا جاتپايدى. سوندىقتان بۇل ويىن ادامدى جەكە تۇلعا رەتىندە دامىتادى. بۇل ءوز كەزەگىندە بالانىڭ ەگويست بولىپ وسۋىنە دە اسەر ەتەدى. ءوزى قالاعاندىقتان ەمەس، جاعداي سوعان ماجبۇرلەيدى. كۇرەس، جەڭىسكە جەتۋگە تالپىنىس، اينالاداعىلاردىڭ نازارى، ءبارى-ءبارى. وسىنى بىلگەندىكتەن ءبىز دە ۋايىمدايتىنبىز قالاي بولادى ەكەن دەپ.

قۇدايعا شۇكىر، جەكەلەي سپورت ءتۇرى بولسا دا، جانسايانىڭ بالا كەزىنەن بويىندا بار مەيىرىمىن جويا العان جوق. وعان قۋانامىز.

- دوستارىنىڭ كوپ بولۋى دا وسى مىنەزىنەن شىعار؟..

- ونىڭىز راس. جانسايانىڭ دوستارى وتە كوپ. ەلىمىزدە دە، شەتەلدە دە. ۇنەمى حات-حابار الماسىپ وتىرادى. جارىستارعا بارا قالساق، ءبىر-ءبىرىنىڭ قاسىنان اينالشاقتاپ شىقپاي قالادى. وسى جولى دا قارسىلاس بولعان قىزداردىڭ ءوزى كەلىپ اتا-انالارىنىڭ كوزىنشە: «ءبىز ناعىز جەڭىمپازدىڭ كىم ەكەندىگىن بىلەمىز، ول اتاققا سەن لايىقتىسىڭ، ۋايىمداما. ساعان كەرەگى بۇل چەمپيونات ەمەس، ايەلدەر اراسىنداعى بىرىنشىلىكتىڭ جەڭىسى» دەپ قۇتتىقتاپ، باسۋ ايتىپ جاتىر. مۇندايدى ەستىگەندە، بويىڭدى كادىمگىدەي ماقتانىش سەزىمى كەرنەيدى ەكەن. اكەسى ەكەۋمىز ريزا بولىپ قالدىق. ايتپەسە، سول قىزداردىڭ دا اتاق-دارەجەلەرى ءبىر باستارىنا جەتىپ-ارتىلادى.

- تۇراقتى قولداپ، قولپاشتايتىن دەمەۋشىلەرىڭىز بار ما؟

- بىلتىردان باستاپ جانسايا «سامۇرىق-قازىنا» دەمەۋشىلىك جاسايتىن «استانا» پرەزيدەنتتىك كاسىبي سپورت كلۋبىنىڭ مۇشەسى اتاندى. بۇل كلۋب بىزگە ءبىراز كومەكتەستى. بىلتىرعى تۋرنيرلەردىڭ بارلىق شىعىنىن «سامۇرىق-قازىنا» كوتەردى. باپكەردەن ساباق الدىق، رەيتينگىمىزدى كوتەردىك. ال بيىل اتالمىش كلۋبتا بيۋدجەت قىسقارىپ، سپورتشىلارعا بولىنەتىن قارجى دا ازايعان سىڭايلى. ءبىراق بيىل جارىسقا كوپ قاتىسقان جوقپىز.

ودان قالدى الماتىداعى سپورت باسقارماسىنىڭ دا كومەگى زور. جىل اياقتالۋعا جاقىن. قالعانىن الداعى ۋاقىتتا كورەرمىز.

- جىل سوڭىنا دەيىنگى جوسپارلارىڭىز قانداي؟

- چەمپيونات اياقتالىسىمەن، جانساياعا فرانسيادا وتەتىن تۋرنيردى ۇيىمداستىرۋشىلاردان شاقىرتۋ كەلدى. بۇل دوداعا بار-جوعى سەگىز ادام عانا قاتىسادى. سولاردىڭ ىشىندە اناتولي كارپوۆ پەن جانسايا دا بار. ول قازان ايىنىڭ سوڭىنا جوسپارلانعان. وعان دەيىن شاقىرتۋلار بولىپ جاتسا، كورە جاتارمىز. بولماسا، تىنىعىپ، جاتتىعۋ جاسايدى. جەلتوقساندا كاتارعا بارۋىمىز كەرەك. وعان بىلتىر دا بارعان. شاحمات الەمىنىڭ ەليتاسى قاتىسادى. جاتىن ورىن، ءۇش مەزگىل تاماق ۇيىمداستىرۋشىلاردىڭ ەسەبىنەن.

- اڭگىمەڭىزگە راقمەت!

اڭگىمەلەسكەن - ءمادينا اسىلبەك،

«سپورت» گازەتى
سۋرەتتەر سپورتشىنىڭ الەۋمەتتىك جەلىدەگى پاراقشاسىنان الىندى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى