اقمولالىق كاسىپورىن ۇندى ەگيپەت پەن قىتايعا ەكسپورتتاماق

قازىرگى تاڭدا كاسىپورىن ۇن تيەلگەن ۆاگونداردى اۋعانستانعا جونەلتۋدە، تاياۋ ارادا ەگيپەت، تاجىكستان مەن قىتايعا ەكسپورتتاۋدى جوسپارلاپ وتىر. بۇل تۋرالى چەحيا وڭتۇستىك موراۆيا ايماعىنىڭ رەسمي دەلەگاتسياسىنىڭ ساپارى بارىسىندا ءوندىرىس وشاعىنىڭ باس ينجەنەرى سانسىزباي مۇقيتانوۆ ءمالىم ەتتى، دەپ حابارلايدى BNews.kz ءتىلشىسى.

ەستەرىڭىزگە سالىپ كەتسەك، «اقمولا ءبيداي» 2013-جىلى نەگىزى قالانعان جاس كومپانيا. وتكەن جىلى بۇل جەردە ءداندى جانە ماي داقىلدارىن وڭدەۋ جانە ساقتاۋمەن اينالىساتىن كاسىپورىن قۇرىلىسى باستالعان بولاتىن. كاسىپورىندا ديىرمەن، دايىن ءونىم ساقتالاتىن قويما، استىق قويماسى بار.

«قۋاتى تاۋلىگىنە 200 توننا ءبيدايدى قۇرايتىن ديىرمەن جىلىنا 57 مىڭ توننا ۇن شىعارۋعا قاۋقارلى. بىزدە ءبىرىنشى، ەكىنشى جانە جوعارى سۇرىپتى ۇن وندىرىلەدى. سونىمەن قاتار 4 مىڭ توننا ۇن سىياتىن دايىن ءونىم قويماسى بار. استىق قويماسى دا قاراستىرىلعان، ونىڭ سىيىمدىلىعى 30 مىڭ توننا. ديىرمەن مەن ءبيداي قويماسى تۇركيا جانە رەسەيدەن جەتكىزىلگەن جابدىقپەن جاراقتاندىرىلعان»، - دەيدى باس ينجەنەر.

وبلىس اكىمدىگىنىڭ باسپا ءسوز قىزمەتىنەن تولىقتىرعانداي، «اقمولا ءبيداي» وندىرگەن ءونىمىنىڭ 90 پايىزىن شەت ەلدەرگە ەكسپورتتايدى. بۇگىندە كومپانيانىڭ يەلىگىندە 20 مىڭ گەگتار ەگىس القابى بار. مۇقيتانوۆتىڭ ايتۋىنشا، قازىرگى تاڭدا ۇن اۋعانستانعا جونەلتىلۋدە.

«بيىل مىسىر، تاجىكستان مەن قىتايعا دا ەكسپورتتاۋدى كوزدەپ وتىرمىز. ءبىزدىڭ ۇننىڭ ساپاسى جورعارى، سەبەبى ىسكەرلىك سەرىكتەستەرىمىز ونىمگە جوعارى تالاپ قويادى»، - دەيدى باس ينجەنەر.

بۇگىندە كاسىپورىندا 80 گە تارتا ادام ەڭبەك ەتەدى، ولاردىڭ ورتاشا جالاقىسى ايىنا 105 مىڭ تەڭگەنى قۇرايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى