ءۇش نويان. ەلباسىنىڭ سەنىمى اقتالا ما؟
ەكىگە دەپ وتىرعانىم «حالىق» جانە «بيلىك». جاقىندا بولعان «سىرلاسۋدا» بەكبولات تىلەۋحاننىڭ وسى جايىندا ايتقانى بار ەدى. بيلىكتە وتىرعاندار دا - ادام، حالىق بوپ ۇيىسىپ وتىرعاندار دا - ادام. ءبىر-اق ايىرما بار، ول - قۇداي! قالعانى - سونىڭ قۇلى. ەندى اڭگىمەنى توتەسىنەن باستايىق.
حالىق بيلىكتى جامانداپ، بيلىك حالىقتى كىنالاپ ۇيرەنىپ الدى. ءبىر نارسەنىڭ ۇشى كورىنسە، بيلىك جامان، نە حالىق جامان. ءبىر داستارحاننىڭ باسىندا وتىرىپ، ءبىر-بىرىنە تاس لاقتىرىپ وتىرعان بىزگە وسى نە جەتپەيدى؟!
ەلدىڭ ءسوزىن سويلەگەن ەردى كوتەرىپ، ءسوز كوبەيتپەي، ىسپەن-اق تىرلىك تىندىرىپ جۇرگەندەر تاسادا قالىپ قويىپ جاتادى. شىنى كەرەك! سول ەلدىڭ ءسوزىن سويلەگەن، ىسپەن دە كوڭىلدەن شىعا بىلگەن ۇكىمەت باسشىسىنىڭ ورىنباسارى بولعان بەردىبەك ساپاربايەۆ ەدى.
جۇمىسقا كەلە سالعان كۇنى ۇكىمەتتىڭ مازاسىن الىپ، ورىندىقتارىندا مايلانىپ وتىرعانداردى اياقتارىنان تىك تۇرعىزىپ ەدى. ەل قۋاندى. ءبىراق ارتىن سۋىتپاي ەلباسى ۇكىمەت باسشىسىنىڭ ورىنباسارىن اقتوبە وبلىسىنىڭ اكىمى ەتىپ تاعايىندادى. قۋانىپ جاتقان ەلدىڭ مىسى باسىلىپ قالدى. نەگە ونى؟ جالعىز سۇراق وسى ەدى.
الماتىنى ارمان قالاعا اينالدىراعان يمانعالي تاسماعامبەتوۆتى كىم جەك كورسىن؟! ۋاقىتى كەلگەندە ەلباسى ءوزىنىڭ بيلىگىن سول ادامعا تابىستار دەگەن ۇمىتپەن جۇرگەنىمىزدى نەسىن جاسىرايىق. ءسويتىپ جۇرگەنىمىزدە، ەلدىڭ سىيىنا بولەنگەن تاسماعامبەتوۆتى ەلباسى قورعانىس مينيسترلىگىنە اۋىستىرىپ جىبەردى. تاعى دا نەگە ونى؟ جالعىز سۇراق وسى ەدى.
جاس كەلسە ىسكە دەگەن. جاس بولسا دا بيلىك پارتياسىن العا سۇيرەپ كەلگەن باۋىرجان بايبەك كوپ ءىستىڭ باسى-قاسىندا بولدى. ەلباسىنىڭ جانىنان تابىلىپ، جاڭا يدەيالاردىڭ جارشىسى بولار دەپ جۇرگەندە، الماتى قالاسىنىڭ اكىمى بولىپ تاعايىندالدى. تاعى دا نەگە ونى؟ جالعىز سۇراق وسى ەدى.
ءسال كىدىرىس جاساپ بارىپ، ءبىر سۇراققا كوپتەگەن جاۋاپ ىزدەدىك. ويعا قونىمدىسى مىناۋ بولدى.
استانا - قازاقستاننىڭ جۇرەگى. ەلورداسى. ال قالعان وبلىستار مەن قالالار وسى جۇرەكتەن تاراپ جاتقان تامىرلار ىسپەتتى. تامىر اراسىندا قان جۇرمەسە بايلانىس بولمايدى، جۇرەك توقتاپ قالادى. ەندەشە ەلباسىنىڭ كورەگەندىگى بولار، اتالعان ءۇش نوياندى ءۇش جاققا جىبەرسە ولاردىڭ تومەندەگەنى ەمەس، قايتا جاۋاپكەرشىلىك ارتقانى. ءۇش جاق دەپ وتىرعانىمىزدىڭ - ءبىرى باتىس. بۇگىندە باتىستاعى ءدىني احۋال ۋشىعىپ تۇر. اتالعان ماسەلەلەنى شەشۋ ءۇشىن بۇكىل ۇكىمەتتى ەمەس، ۇكىمەت اتقارۋ كەرەك مىندەتتى ءبىر ادامنىڭ مويىنىنا جۇكتەپ بەرگەن ەلباسى، بەردىبەك ساپاربايەۆقا كامىل سەندى. الاڭسىز وتىرىپ جۇرەككە قان جۇگىرتە الاتىنىن اڭعارتتى.
الماتى - ءتۇرلى ۇلتتاردىڭ توعىسىپ وتىرعان قالاسى. ونىڭ ۇستىنە احمەتجان ەسىموۆ كەزىندە ەلدىڭ «جاقسى» دەگەن ۇرانى ءبىر ەستىلمەدى. سودان با ەكەن اق باستى قاريامىزدى قاسىنا الدىرىپ، «كوز الدىمدا ءجۇرسىن» دەگەن ەلباسى، جاستىقتىڭ وتىن الماتىعا اكەلىپ وتىرعىزدى. باۋىرجان بايبەك تە جاقىن ۋاقىتتا، توزىڭقىراپ قالعان قالانىڭ شىرايىنا ءار جۇگىرتەدى دەگەن ۇمىتتەمىز.
ەلباسى مەن ي. تاسماعامبەتوۆتىڭ قۇشاقتاسىپ تۇرعان سۋرەتىن كورگەندەرىڭىز بار بولار. پرەزيدەنتتىڭ تاسماعامبەتوۆتى قورعانىسقا جىبەرسە، ەلدىڭ قاۋىپسىزدىگىن سەنىپ تاپسىرعانى. كەزىندە پاتشالار ەڭ سەنىمدى دەگەن ادامدارىن قولباسشى ەتىپ تاعايىنداعان. يمانعالي تاسماعامبەتوۆ ەلدىڭ ىرگەسىن كۇزەتسە، ەلدىڭ ۇيقىسى تىنىش دەگەن بولار. ءلايىم...
سونىمەن ءۇش نوياننىڭ ەل الدىنداعى قىزمەتى مەن ەلباسى الدىنداعى جاۋاپكەرشىلىگى ارتتى. ادامنىڭ باسى ەكەۋ ەمەس. كەسىلەر كۇنى كەلسە شابىلىپ تۇسەرى حاق. جالعاننىڭ جەتەگىنە ەرىپ، بەس-التى باسپەن ءبىر ءىستى تىندىرا الماي وتىرعانداردى ساباسىنا تۇسىرسەم دەپ نوياندار اتتانىپ كەتتى. ءالى دە كۇتەمىز. نوياندار كوپ. تەك ءپىسسىن، جەتىلسىن. ۋاقىتى كەلسىن. اقىلدى پاتشا الىستاعىن كورىپ كورەگەندىك تانىتسا كەرەك.
مارعۇلان اقان، «ۇلت.ك ز»
