قازاقستان دۇنگەندەرىنىڭ دەلەگاتسياسىن گانسۋ پروۆينتسياسىنىڭ ءبىرىنشى حاتشىسى قابىلدادى - فوتو
بۇل تۋرالى «قازاقپارات» ح ا ءا- ءنىڭ تىلشىسىنە «قازاقستان دۇنگەندەرىنىڭ قاۋىمداستىعى» دەلەگاتسياسىن باسقارىپ وتىرعان «جاڭا جىبەك جولى» حالىقارالىق اكادەمياسى» ق ق پرەزيدەنتى حۋسەي داۋروۆ حابارلادى.
«قازاقستان دۇنگەندەرىنىڭ قاۋىمداستىعى» دەلەگاتسياسىن ق ك پ گانسۋ پروۆينتسياسىنىڭ ءبىرىنشى حاتشىسى ۆون سانيۋن مىرزا قارسى الدى. گانسۋ پروۆينتسياسىنىڭ باسشىسى قازاقستان دۇنگەندەرىنىڭ قاۋىمداستىعىنا ەكىجاقتى قاتىناستاردىڭ دامۋىنا قوسقان ۇلەسى ءۇشىن العىسىن ءبىلدىردى. بۇدان باسقا، گانسۋ پروۆينتسياسىنىڭ جوعارى وقۋ ورىندارىندا ءبىلىم الىپ جۇرگەن دۇنگەن جاستارىنا قولداۋ كورسەتۋ ۋادە ەتىلدى»، - دەپ باياندادى ح. داۋروۆ.
قازاقستاندىق مەكتەپتەر تۇلەكتەرىن قىتاي ج و و- نان ءبىلىم الۋ ءۇشىن جىل سايىن جىبەرىپ وتىرعانى بەلگىلى، سولاردىڭ اراسىندا كوبى - دۇنگەن دياسپوراسىنىڭ وكىلدەرى.
«قازاقستان دۇنگەندەرىنىڭ قاۋىمداستىعى» باسشىسىنىڭ ايتۋىنشا، وتكەن ونجىلدىقتىڭ ىشىندە قىتايدىڭ جەتەكشى ج و و - سولتۇستىك- باتىس ۋنيۆەرسيتەتى، شيان شەتەل تىلدەرى ۋنيۆەرسيتەتى، لانجوۋ ۋنيۆەرسيتەتى جانە تاعى باسقالارىنا گرانتتاردىڭ جەڭىلدىك باعدارلاماسى بويىنشا ءبىلىم الۋعا قازاقستاننىڭ مىڭداعان جىگىت- قىزدارى جىبەرىلدى.
قابىلداۋ بارىسىندا گانسۋ مەن قازاقستان اراسىنداعى ىنتىماقتاستىق جوبالارى تالقىلاندى. ح. داۋروۆ وتكەن عاسىردىڭ 80- جىلدارىنىڭ سوڭىنان بەرى قازاقستاننىڭ دۇنگەن اۋىلدارى مەن قىتايدىڭ گانسۋ پروۆينتسياسىمەن ەكونوميكالىق جانە مادەني ىنتىماقتاستىق سالاسىندا بايلانىستار جولعا قويىلىپ، دامىپ وتىرعانىن اتاپ ءوتتى.
حۋسەي داۋروۆتىڭ ايتۋىنشا، قازاقستان دۇنگەندەرىنىڭ قاۋىمداستىعى قازاقستان حالقى اسسامبلەياسىنىڭ بەلسەندى مۇشەسى بولىپ تابىلادى. قازاقستان ۇكىمەتى دۇنگەندەرگە ۇلتتىق ءتىل، مادەنيەت، داستۇرلەرى مەن جازۋدى دامىتۋدا ۇلكەن كومەك كورسەتىپ وتىر. قازاقستاندا جۇرگىزىلىپ وتىرعان ساياساتتىڭ ارقاسىندا، دۇنگەندەر وزدەرىنىڭ كوركەم كونە مادەنيەتىن ساقتاپ قالدى.
بۇگىندە ورتالىق ازيادا 130 مىڭعا جۋىق دۇنگەن تۇرىپ جاتقانى بەلگىلى. ولاردىڭ كوبى قازاقستان، قىرعىزستان جانە وزبەكستاندا تۇرىپ جاتىر. 130 جىلدان استام ۋاقىت بۇرىن وسىندا قونىستانعان دۇنگەندەر وزدەرىنىڭ ءتىلىن، ادەت- عۇرىپتارىن، سالت- داستۇرلەرىن، قىتايداعى مانجۋريالىق چيڭ اۋلەتى بيلگىنىڭ سوڭعى كەزەڭىندەگى تۇرمىسىن ساقتاپ قالدى. قازاقستان اۋماعىندا 50-60 مىڭعا جۋىق دۇنگەن تۇرادى، ولاردىڭ كوبىنىڭ اتا- بابالارى قىتايلىق شانشي، گانسۋ جانە نيڭشيا پروۆينتسيالارىنىڭ تۋمالارى. ولار 138 جىل بۇرىن بۇل پروۆينتسيالاردا چيڭگە قارسى شارۋالار كوتەرىلىسىنىڭ باسىلۋىنان كەيىن وسىندا قاشىپ كەلگەن. جامبىل وبلىسىندا 35 مىڭنان استام دۇنگەندەر تۇرىپ جاتىر، دەپ اتاپ ءوتتى ح. داۋروۆ.
