جەڭىمپازداردى تۇتىنۋشى انىقتايدى
ونى قولداۋ ءۇشىن اعىمداعى جىلدىڭ مامىرىندا «حالىق ماركاسى» اتتى جالپىۇلتتىق بايقاۋ ءوز جۇمىسىن باستادى. وسىناۋ كونكۋرستىڭ ەرەكشەلىكتەرى تۋرالى جوبا جەتەكشىسى ريمما تاجىبايەۆا اڭگىمەلەيدى.
- ريمما داناباي قىزى، بيىل تۇڭعىش رەت وتاندىق ازىق- تۇلىك وندىرۋشىلەرگە ارنالعان «حالىق ماركاسى - 2015» بايقاۋى باستالدى. اتالعان سىياقىنىڭ وزگەشەلىگى نەدە؟
- ايتا كەتەيىك، ۇلتتىق بايقاۋ «EXPO MILANO - 2015» حالىقارالىق كورمەسىنە، ياعني 148 ەلدىڭ سالت- ءداستۇرى، تاماق ءوندىرۋ سالاسىنداعى شىعارماشىلىعى مەن يننوۆاتسياسى كورىنىس تاپقان شاراعا ورايلاستىرىلعان.
جوبامىزدىڭ باستى ماقساتى - وتاندىق تاۋار ءوندىرۋشىنىڭ مۇمكىندىكتەرىن ونىمدەردىڭ تانىمالدىعىن ارتتىرۋ ارقىلى كەڭەيتۋ، سونداي- اق ناقتى ءبىر تاۋار نەمەسە قىزمەتتەردىڭ تانىمالدىعىن كەشەندى تۇردە باعالاپ، اراسىنان كوشباسشىلارىن انىقتاۋ.
اتالعان كەڭ اۋقىمدى شارا ەل يميدجىنە وڭدى اسەر ەتەدى دەپ ويلايمىن. ويتكەنى بايقاۋعا قاتىسۋ ارقىلى وڭىرلىك كومپانيالار ءوز ءونىمىنىڭ باسەكەگە قابىلەتتىلىگىن دالەلدەۋ ۇستىندە جانە تۇتىنۋشىلاردىڭ جاڭا توپتارىنىڭ سەنىمىن جاۋلاپ الۋعا مۇمكىندىك الدى. ال تۇتىنۋشى ءوزى تاڭداعان ءونىمنىڭ ساپاسىن تىكەلەي پايىمداۋعا مۇمكىندىك الدى.
مۇندا وڭىرلىك اكىمدەردىڭ دە زور ءرول اتقارعانىن اتاپ وتكەن ءجون. ولاردىڭ كۇردەلى دە جاۋاپتى قىزمەتىنىڭ ارقاسىندا بۇگىندە كونكۋرسقا استانا مەن الماتى قالالارىنان عانا ەمەس، بارلىق ايماقتاردىڭ ماركالارى دا قاتىسۋدا.
- بايقاۋ جەڭىمپازى قالاي انىقتالادى؟
- بۇگىندە 70 تەن اسا ءوندىرۋشى بايقاۋعا قاتىسۋ ءۇشىن ءار الۋان اتالىم بويىنشا 100 گە جۋىق تاماق ماركاسىن ۇسىندى. تاۋارلار دياپازونى شەكتەلمەگەن. سوندىقتان دا، شاي، ۇن، جۇمىرتقا، ەت، تەڭىز ونىمدەرى مەن تاعى دا باسقا تاۋارلار قاتىسۋدا.
جەڭىمپازداردى تۇتىنۋشىلاردىڭ وزدەرى انىقتايدى. ولار ءوزىنىڭ سۇيىكتى ءونىمىن www.halykmarkasy.kz سايتى ارقىلى تاڭداي الادى. ءبىر سوزبەن ايتقاندا، حالىقتىق ونلاين داۋىس بەرۋ 9 -قىركۇيەكتە باستالسا، ءالى دە اعىمداعى جىلدىڭ 8 -قازانىنا دەيىن جالعاسادى.
- «حالىق ماركاسى» بايقاۋىنىڭ جەڭىمپازدارى قانداي مۇمكىندىكتەرگە يە بولادى؟
- ەڭ الدىمەن، جوعارى ساپا كورسەتكىشىن دالەلدەي العان جەڭىمپازدار ءوز تاۋارىنىڭ قاپتاماسىنا نەمەسە ەتيكەتكاسىنا ەكى جىل كولەمىندە «حالىق ماركاسى» حالىقتىق ساپا بەلگىسىن ورنالاستىرۋعا مۇمكىندىك الادى. سونىمەن قاتار ولار استانادا وتەتىن «ەكسپو - 2017» كورمەسىن ۇيىمداستىرۋشىلار تاراپىنان كوپشىلىككە ىلگەرىلەتىلىپ، ۇسىنىلاتىن بولادى.
- قاشان جانە قايدا ماراپاتتاۋ ءراسىمى وتەدى؟
- بايقاۋدىڭ ءاربىر تارماعى بويىنشا جەڭىمپازداردى ماراپاتتاۋ سالتاناتى الەمدىك ازىق- تۇلىك كۇنىن مەرەكەلەۋ اياسىندا بۇۇ جانىنداعى ازىق- تۇلىك جانە اۋىل شارۋاشىلىعى ۇيىمىمەن بىرگە اعىمداعى جىلدىڭ 19-21 -قازانىندا ميلان قالاسىندا وتەتىن «EXPO - 2015» كورمەسىندە وتەتىن بولادى.
بايقاۋعا قاتىسۋشىلاردىڭ بارلىعىنا ساتتىلىك تىلەيمىن. ويتكەنى جەڭىمپاز بولۋعا اركىم دە لايىقتى!
ايتا كەتەيىك، «نۇر وتان» پارتياسى بيزنەستى جۇرگىزۋگە قولايلى جاعداي تۋعىزۋ جانە شاعىن جانە ورتا كاسىپكەرلىككە اقپاراتتىق قولداۋ كورسەتۋگە باعىتتالعان «مىقتى بيزنەس - قۋاتتى مەملەكەت» جوباسىن ىسكە اسىرۋدا. مۇنىڭ ىشىندە، وتباسىلىق بيزنەسكە باسا ءمان بەرىلگەن. ايتالىق، اعىمداعى جىلدىڭ العاشقى جارتىسىندا جوبا اياسىندا كاسىپكەرلىكتى قولداۋعا قاتىستى زاڭ جوباسىنا 10 وزگەرىس ەنگىزىلىپ، 600 ادام بيزنەس نەگىزدەرى مەن ساۋاتتى ءىس جۇرگىزۋگە باۋلۋ ماشىقتارىنان ءوتىپ، 40 سەمينار، 205 جەكە قابىلداۋ وتكىزىلدى.
«ايقىن»
