ۇلتتىق مۋزەيدە «تۇركىمەن سۋرەتشىلەرىنىڭ الەمى» اتتى كوركەمونەر تۋىندىلارى كورمەسى اشىلدى - فوتو
سالتاناتتى شاراعا ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ، ۇلتتىق مۋزەي ديرەكتورى دارحان مىڭباي، تۇركىمەن رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ماگتىمگۋلى اكمىرادوۆ قاتارلى لاۋازىمدى تۇلعالار جانە ونەر مەن مادەنيەت قايراتكەرلەرى قاتىستى، دەپ حابارلايدى مۋزەيدىڭ باسپا ءسوز قىزمەتىنەن.
«بۇل - بىزگە جاقىن تۋىسقان حالىق. سوناۋ تاريحتار قويناۋىنان بەرى قاراي ەكى ەل دە ءبىر- بىرىمەن تىعىز قارىم- قاتىناستا بولىپ كەلەدى. تۇركىمەنستان مەن قازاقستاننىڭ اراسىندا ورتاق شەكارامىز دا بار. سونىمەن قاتار مادەنيەت پەن ونەرىمىز دە ءارقاشان ساباقتاسىپ دامىپ كەلەدى. تۇركىمەن سۋرەتشىلەرىنىڭ بىزگە كەلىپ اشىپ جاتقان كورمەسى ءبىزدىڭ رۋحاني جانە مادەني ومىرىمىزگە سەرپىن بەرەتىن يگى ءىس دەپ ويلايمىن»، - دەدى جيىندا ءسوز العان ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ.
بۇل شارا ۇلتتىق مۋزەيدىڭ «الەمدىك مادەنيەت جانە زاماناۋي كەسكىندەمە» جوباسى اياسىندا ۇيىمداستىرىلىپ وتىر.
جيىندا ءسوز سويلەگەن ۇلتتىق مۋزەي ديرەكتورى دارحان مىڭباي بىلاي دەدى: «بۇگىنگى كورمە تۇرىكمەن رەسپۋبليكاسىنىڭ بەيتاراپتىلىعىنىڭ 20 جىلدىعىنا ارنالىپ وتىر. كورمەدەگى ونەر تۋىندىلارى ءار ءتۇرلى جانردا كەسكىندەلگەن. وسى كورمە تۇرىكمەن حالقىنىڭ رۋحاني بايلىعىن، تالانتتى ادامدارىنىڭ ەڭبەگىن كورسەتەدى. ەكى تۋىسقان حالىقتى بىرىكتىرەتىن رۋحاني، مادەني، تاريحي دۇنيەلەر وتە كوپ. ەكى ەل دە ارعىماق اتتى وتە جوعارى باعالايدى. ولاردىڭ دا بىزدەگى سياقتى كۇيشىلىك ونەر بار. مۇنىڭ بارلىعى ەكى ەلدى بايلانىستىرىپ جاتقان رۋحاني ءجىپ دەپ ايتۋعا بولادى. بۇگىنگى كورمە رۋحاني الەمىمىزدى ودان سايىن جاقىنداستىرا تۇسەدى دەگەن ويدامىز».
«تۇركىمەن سۋرەتشىلەرىنىڭ الەمى» كورمەسىن ق ر مادەنيەت جانە سپورت مينيسترلىگى، تۇركىمەن رەسپۋبليكاسىنىڭ قازاقستانداعى ەلشىلىگى جانە ق ر ۇلتتىق مۋزەيى ۇيىمداستىرىپ وتىر. سالتاناتتى شارادا ءسوز العان تۇركىمەن رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ماگتىمگۋلى اكمىرادوۆ ۇلتتىق مۋزەي قابىرعاسىنان تۇرىكمەن سۋرەتشىلەرىنە ورىن بەرىپ، كورمە ۇيىمداستىرعان قازاق حالقىنىڭ تۋىسقاندىق ىزگى نيەتىنە راحمەتىن ايتتى.
كورمەگە تۇركىمەن سۋرەتشىلەرىنىڭ 40 تان استام كەسكىندەمە جانە دەكوراتيۆتى- قولدانبالى ونەر تۋىندىلارى قويىلعان.
كورمە 23 -قازانعا دەيىن جالعاسادى.
