ماماندار الداعى ۋاقىتتا ءۇي باعاسىنىڭ قانداي بولاتىنىن ايتتى
ق ر دەلدالدارىنىڭ بىرلەسكەن ۇيىمىنىڭ ۆيتسە- پرەزيدەنتى نينا لۋكيانەنكونىڭ حابارلاۋىنشا، قۇرىلىس كومپانيالارى حالىقتىڭ ساتىپ الۋ مۇمكىندىكتەرىنە قاراي بەيىمدەلىپ، ءتىپتى ولاردىڭ باسىم بولىگى جاڭا قۇرىلىس نىساندارىن سالۋدى توقتاتۋى مۇمكىن. ول نارىقتاعى قازىرگى جاعدايدىڭ ءۇي ساتىپ الامىن دەۋشىلەر ءۇشىن ناعىز قولايلى ۋاقىت ەكەنىنە سەنىمدى.
جىلجىمايتىن مۇلىك بويىنشا كەڭەس بەرۋشى رۋسلان ۋنگەفۋگتىڭ مالىمدەۋىنشە، قازىرگى تاڭدا قۇرىلىس كومپانيالارىنىڭ كوپشىلىگى جەڭىلدىكتەر جاساپ جاتىر - قويىلعان باعادان 10-15 پايىزعا دەيىن، ونىڭ باعامدىق ايىرماشىلىققا تەڭ بولىپ تۇرعانى بەلگىلى. "ساتىپ الۋشىلاردى تارتۋ ماقساتىندا قۇرىلىس كومپانيالارى اكسيالار وتكىزەدى، ولار بەلگىلى ءبىر بونۋستاردى، ءبولىپ تولەۋ ۋاقىتىن ۇزارتۋدى، پاركينگتى نەمەسە تاعى دا باسقانى ۇسىنادى"، - دەيدى ساراپشى.
سونىمەن قاتار، اڭگىمەلەسۋ بارىسىندا ماماندار مەملەكەتتىڭ تاياۋداعى مونەتارلىق ساياساتىندا بولعان وزگەرىستىڭ جىلجىمايتىن مۇلىك نارىعىنا قالاي اسەر ەتكەنىنە جالپى باعا بەردى. "باعانى بۇرىنعى قالىپتا ۇستاپ تۇرا العان باستاپقى نارىقتاعى ءىرى قۇرىلىس كومپانيالارى ساتىلىمدى ۇلعايتتى، ال ۇستاپ تۇرا الماعانداردىڭ ساۋداسى قۇلدىرادى. سونداي- اق، قايتالاما نارىقتا دا تىنىشتىق بايقالادى"، - دەپ سۋرەتتەدى قازىرگى جاعدايدى نينا لۋكيانەنكو. ونىڭ سوزىنە قاراعاندا، قازىر وزگەلەردەن وزا شىعىپ، ساتىپ الۋشىلار ءۇشىن تارتىمدى باعانى قويعاندار ۇتادى.
رۋسلان ۋنگەفۋگ تا جىلجىمايتىن مۇلىك نارىعىندا ساتۋ- ساتىپ الۋ مامىلەلەرىنىڭ قىسقارعانىن راستادى. ساتىپ الۋشىلار ءارى قاراي نە بولاتىنىن كۇتىپ وتىر، سونىمەن قاتار، كوپشىلىك پاتەرلەر باعاسىنىڭ تومەندەيتىنىنە سەنىمدى. بولاشاققا بولجام جاساعان مامان ساۋدا كولەمىنىڭ ايتارلىقتاي تومەندەيتىنى تۋرالى وي ءتۇيدى. سونىمەن قاتار، ول ادامداردىڭ نىساندى تاڭداۋدا دامەلى بولا باستاعاندارىن بايقاپتى. بارلىعىنان ەكونوم كلاسستاعى باسپانالار از زارداپ شەگەدى، ءبىراق بۇل بۋىندا دا ساۋدانىڭ ازاياتىنى بەلگىلى.
Kn.kz جىلجىمايتىن مۇلىك پورتالىنىڭ مالىمەتتەرىنە قاراعاندا، تەڭگە باعامى قۇبىلمالى بولا باستاعان ساتتەن قايتالاما نارىقتا مامىلە سانى قىسقارعان - استانادا 13 پايىز، الماتىدا - 25, قاراعاندىدا - 22 پايىز. كەلىسىمدەردىڭ سانى استانا مەن قاراعاندىدا 15 پايىزعا تومەندەدى، الماتىدا - 17 پايىز. "سۇرانىس ارزان باسپانا جاعىنا قاراي ىعىستى. ساتىپ الۋشىلاردىڭ ارتىنان ساتۋشىلاردىڭ دا ءبىر بولىگى نارىقتى تاستاپ كەتە باستادى. جەكە ينۆەستورلار اعىمى ساتۋدان جالعا بەرۋگە قاراي جىلجىعان. بانكتەردەگى جاعداي دا بەلگىلى - ولاردىڭ باسىم بولىگى تەڭگە نەسيەسىن قىسقارتىپ، تالاپتى كۇشەيتتى. حالىقتىڭ تازا تابىسى قىسقاردى"، - دەپ ءتۇسىندىردى اننا شاتسكايا.
ايتا كەتەيىك، قازىرگى جاعدايعا بايلانىستى تالداۋ جاساعان مامان وتكەن داعدارىستا دا باسپانا باعاسىنىڭ تومەندەگەنىن ايتتى.
ەسكە سالا كەتەيىك، بيىل 20 - تامىزدا تەڭگە ەركىن اۋىتقۋ باعامىنا ءوتىپ، ۆاليۋتا شامامەن 35 پايىزعا قۇنسىزداندى. ۇلتتىق ۆاليۋتانىڭ دوللارعا قاتىستى باعامىنىڭ تومەندەۋىنە بايلانىستى قازاقستان قۇرىلىس كومپانيالارى قاۋىمداستىعىنىڭ مۇشەلەرى جىلجىمايتىن مۇلىك باعاسىن دوللارمەن كورسەتۋدەن باس تارتۋعا نيەتتەنىپ وتىر.
