مەديتسينالىق ساقتاندىرۋدىڭ تيىمدىلىگى نەدە؟

 مەديتسينالىق ساقتاندىرۋ - حالىقتىڭ ارنايى قورعا جينالعان قاراجات ەسەبىنەن تەگىن مەديتسينالىق كومەك الۋىن قامتاماسىز ەتەتىن جۇيە.

وعان سايكەس ساقتاندىرۋ جارنالارىن جۇمىس ىستەيتىن ازاماتتاردىڭ جۇمىس بەرۋشى مەكەمەلەرى تولەپ وتىرادى، ال جۇمىسسىزدار مەن ەڭبەككە جارامسىز ادامدار ءۇشىن جارنا مەملەكەتتەن اۋدارىلادى.

سونداي-اق، ەڭبەككەر ازاماتتار ءوز جالاقىلارىنان ماقساتتى سالىمدار اۋدارىپ وتىرادى. بۇل جۇيە حالىقتىڭ بارلىق توپتارى ءۇشىن مەديتسينالىق جانە ءدارى- دارمەكتىك كومەكتىڭ تەڭ كولەمى مەن ساپاسىن قامتاماسىز ەتەدى. ياعني، مەديتسينالىق قىزمەت جاس پەن كارىگە، باي مەن كەدەيگە بىردەي كولەمدە، تەڭ دارەجەدە كورسەتىلەدى.

مىنە، نەگىزگى ماقسات تا سول - ازاماتتار مەن جۇمىس بەرۋشىلەردىڭ دەنساۋلىققا دەگەن ورتاق جاۋاپكەرشىلىگىن ارتتىرۋ. قازىرگى ۋاقىتتا بۇل جاۋاپكەرشىلىك تەك مەملەكەتكە جۇكتەلگەن. ءاربىر ادام ءوز دەنساۋلىعىن كۇتىپ، سالاۋاتتى ءومىر سالتىن ۇستانۋى، ال جۇمىس بەرۋشى ءاربىر جەتەكشى ءوز قىزمەتكەرىنىڭ دەنساۋلىعىن ساقتاۋعا مۇددەلى بولۋى كەرەك. ويتكەنى، قىزمەتكەر - كەز كەلگەن كاسىپورىن ءۇشىن تابىس كوزى ەكەنى بەلگىلى. وسىنداي ورتاق جاۋاپكەرشىلىك تەتىكتەرى ساقتاندىرۋ مەديتسيناسى كەزىندە بارىنشا ناقتى جۇمىس ىستەيتىن بولادى.

مىندەتتى مەديتسينالىق ساقتاندىرۋ ءتۇرى بويىنشا ازاماتتاردىڭ قورعا اۋداراتىن جارناسىنىڭ مولشەرى مەملەكەت كولەمىندە بەكىتىلەدى. ول ءار ەلدە ءارقيلى مولشەردە بەلگىلەنگەن. ماسەلەن، فرانتسيا تۇرعىندارى جالاقىسىنىڭ - 16، يتالياندار - 13، نيدەرلاندىلىقتار - 9 جانە جاپوندار - %7 ىن تۇراقتى تۇردە اۋدارىپ وتىرادى. ال قازاقستاندا جۇمىس بەرۋشىلەر جارناسىنىڭ كولەمى كىرىستىڭ %5 ىن قۇرايتىن بولادى. ال قىزمەتكەرلەر جارناسىنىڭ مولشەرلەمەسى تابىستىڭ %2 ىن قۇراماق. بۇل ورايدا، ولار 2019 -جىلدان - 1 پايىز، 2020 -جىلدان باستاپ - 2 پايىز مولشەرىندە قارجى اۋدارا باستايتىنىن ايتا كەتۋ كەرەك.

مامانداردىڭ ايتۋىنشا، مىندەتتى مەديتسينالىق ساقتاندىرۋ جۇيەسى مەديتسينا سالاسىنداعى قىزمەت كورسەتۋ مادەنيەتىن كوتەرەدى. سونداي-اق، دەنساۋلىق ساقتاۋ جۇيەسىندە قوردالانعان ماسەلەلەردى ءتيىمدى شەشىپ، كەمشىلىكتەردى جويادى. س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى، مەديتسينا عىلىمدارىنىڭ دوكتورى ايقان اقانوۆ دارىگەر رەتىندە بۇل جۇيەنىڭ ءتيىمدى تۇستارى كوپ ەكەنىن ايتادى.

«جاڭا جۇيەدە ءۇش قاتىسۋشى بولادى. ولار: مەملەكەت، ەمدەلۋشى جانە جۇمىس بەرۋشى. بۇل جۇيە تۇرعىنداردىڭ قاجەتتىلىگىنە دە جاۋاپ بەرەدى. سونداي- اق، جۇمىسشىلاردىڭ دەنساۋلىعىن قورعاۋ سالاسىندا جۇمىس بەرۋشىنىڭ ساياساتىن دا ايقىنداپ بەرەدى. بۇگىنگى دەنساۋلىق ساقتاۋ مودەلىن پايدالانىپ جاتقان مەملەكەتتەردىڭ بارلىعى ۇتىلىپ جاتىر. تۇرعىندار ساپاسىز قىزمەتتەر الادى، دارىگەرلەر مەن مەدبيكەلەر جۇمىستىڭ ساپاسىن ارتتىرۋعا اسا ىنتالى ەمەس. سوندىقتان، مەديتسينالىق كومەك كورسەتۋدى ۇيىمداستىرۋ جۇيەسىن وزگەرتۋ قاجەت- اق. سونىڭ ارقاسىندا دەنساۋلىق ساقتاۋ جۇيەسى جاڭا ساپاعا كوشەدى» دەيدى ا. اقانوۆ.

ال «ۇلتتىق عىلىمي- مەديتسينالىق ورتالىق» ا ق ديرەكتورى اباي بايگەنجيننىڭ ايتۋىنشا، ول دەنساۋلىق ساقتاۋدى رەسۋرستىق قامتاماسىز ەتۋدى ارتتىرۋعا، ەكونوميكالىق قىزىعۋشىلىقتى جانە مەديتسينالىق ۇيىمدار مەن مەديتسينالىق قىزمەتكەرلەردىڭ ءوز قىزمەتىنىڭ سوڭعى ناتيجەسىنە جاۋاپكەرشىلىكتى ارتتىرۋعا مۇمكىندىك بەرەدى. كاسىپكەرلەر جۇمىسكەرلەرىنىڭ دەنساۋلىعىن ساقتاۋعا مۇددەلى بولادى. «بارلىق دامىعان ەلدەردە قولدانىلىپ جۇرگەن مىندەتتى مەديتسينالىق ساقتاندىرۋدى قولدايمىن، - دەيدى اباي قاباتاي ۇلى. - ءار ازامات ءوز دەنساۋلىعىنا ءوزى جاۋاپتى ەكەنىن ءتۇسىنىپ، ول ءۇشىن بەلگىلى ءبىر سالىمدار جاساپ تۇرۋى ءتيىس».

الەمدىك تاجىريبەدە مىندەتتى مەديتسينالىق ساقتاندىرۋ جاقسى ناتيجە بەرگەنى بەلگىلى. ماسەلەن فرانتسيادا حالىقتىڭ - 80، گەرمانيادا - 90، بەلگيادا - %98 ى مىندەتتى مەديتسينالىق ساقتاندىرۋ جۇيەسىمەن قامتىلعان.

جانات قاپالبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى