بالەت ءبيى ادام دەنساۋلىعىنا قالاي اسەر ەتەدى؟
بۇل سايىستا قاتىسۋشىلاردىڭ دايىندىعىنان بۇرىن دەنساۋلىعىنا كوپ ءمان بەرىلەدى. تاجىريبەلى دارىگەر كارلو باگۋتتي سايىسكەرلەردىڭ جاراقات العاننان كەيىنگى جاعدايىنا، السىزدىگى مەن تاماقتانۋ تارتىبىنە قاتاڭ باقىلاۋ جۇرگىزەدى.
«Prix de Lausanne» (لوزاننا سىيلىعى» ) - حالىقارالىق دەڭگەيدە وتەتىن، ەڭ ماڭىزدى سايىستاردىڭ ءبىرى. وعان الەمدەگى بارشا جاس تالانت قاتىسىپ، باعىن سىنايدى. 1973-جىلدان باستاپ وتكىزىلىپ كەلەدى. كوپشىلىك مۇنى مانساپ جولىن كاسىبي ءارى حالىقارالىق دەڭگەيدە باستاۋ مۇمكىندىگى دەپ بىلەدى. بالەتپەن اينالىسىپ، اتالعان سايىسقا قاتىسۋ ءۇشىن توزىمدىلىك پەن دەنساۋلىق قاجەت.
كارلو باگۋتتي (Carlo Bagutti) 15 جىلدان بەرى «Prix de Lausanne» سايىسىنىڭ باس دارىگەرى قىزمەتىن اتقارادى. ول بالەتتىڭ ادام دەنساۋلىعىنا قانشالىقتى پايدالى جانە زيان ەكەنىن جاقسى بىلەدى. كەزەكتى ماتەريالىمىزدا شەتەلدىك ارىپتەستەرىمىزدىڭ كارلومەن بولعان سۇحباتىن اۋدارىپ بەرۋدى ءجون كوردىك.
- بالالاردىڭ دەنساۋلىعىندا كوبىنەسە قانداي «اقاۋلار» بولادى؟
- اعزانىڭ فيزيكالىق كۇيىمەن بايلانىستى قيىندىقتار كوپ كەزدەسەدى. بۇل ارقاعا، ومىرتقاعا، اياققا جانە تىزەگە بايلانىستى ايتىلىپ جاتىر. قاتىسۋشىلار ءبي كەزىندە تەحنيكالىق قاتەلەر جىبەرىپ، دەنساۋلىعىنا زاقىم كەلتىرەدى. بۇدان وزگە اعزانىڭ ۇزدىكسىز جاتتىعۋلاردان شارشايتىن كەزى بولادى. جاراقاتى ومىرىنە قاۋىپ توندىرمەس ءۇشىن ولاردى سايىستان دەر كەزىندە شىعارۋعا تىرىسامىز.
- سىرتقى كەلبەتىمىزدىڭ سۇلۋلىعى جەيتىن تاماعىمىزعا بايلانىستى ەكەنى راس. ەگەر بيشىلەردىڭ تاماقتانۋ ءتارتىبى دۇرىس بولسا، ولاردىڭ دەنساۋلىعى دا ساۋ بولعانى ما؟
- «Prix de Lausanne» كونكۋرسىنا قاتىسۋشىلار الەمنىڭ تۇكپىر-تۇكپىرىنەن كەلەدى. ولاردىڭ ءارقايسىسىنىڭ تاماقتانۋ ءتارتىبى دە ءارتۇرلى. مىسالى، اۋستراليالىق قاتىسۋشىنىڭ تاماقتانۋ ءتارتىبى برازيالىق جانە كورەيالىق قاتىسۋشىدان وزگەشە بولۋى مۇمكىن. سوندىقتان بارىنە ورتاق ديەتا جوق. اس ءمازىرى قاتىسۋشىنىڭ قالاۋىنا بايلانىستى تاعايىندالادى. ءبىراق ولار دايىندىق بارىسىندا جوعالتقان كالوريانى قايتادان قالپىنا كەلتىرىپ وتىرۋى ءتيىس. بيشىلەر دە، سپورتشىلار دا وسىلاي جاسايدى.
- ءسىز قاتىسۋشىلاردىڭ مادەنيەتىندەگى ايىرماشىلىق تۋرالى ايتىپ ءوتتىڭىز. ياعني قاتىسۋشىلارعا ءوز وتانىندا تۇتىناتىن ازىق-تۇلىكتەردەن اس ازىرلەپ بەرەسىزدەر مە؟
- مىسالى، كومىرسۋدى الايىق. ازيالىق قاتىسۋشى ونىڭ كۇرىشتىڭ قۇرامىندا، ال امەريكالىق جۇگەرىنىڭ قۇرامىنداعى بولعانىن قالايدى. اس ءمازىرىن دايىندايتىن كەزدە ولاردىڭ جەكە قالاۋى دا ەسكەرىلەدى. بۇدان وزگە ءسۇتتى ۇناتپايتىن سايىسكەرلەر بولادى. ولارعا اعزاداعى كالتسيدىڭ ورنىن تولتىراتىن ازىق-تۇلىك ىزدەۋىمىزگە تۋرا كەلەدى. قىسقاسى بارلىعىنا ورتاق ديەتا جوق.
massaget.kz
