تۇركيادا قۇربان ايتقا وراي ءبىر اپتا دەمالىس جاريالاندى
مىسالى، جەرگىلىكتى كاسىپكەرلەر اپتا باسىنان بەرى ءداستۇرلى «قۇربان ايت جەڭىلدىكتەرىن» جاساپ، ساۋداسىن قىزدىرۋدا. سونىڭ ارقاسىندا ىشكى نارىقتا كيىم- كەشەك پەن تۇرمىستىق تەحنيكاعا سۇرانىس ايتارلىقتاي ارتقان.
الايدا كوپشىلىكتى قۇرباندىققا شالىناتىن مال باعاسى ەرەكشە الاڭداتادى. ويتكەنى ونىڭ قۇنى قازىر شارىقتاپ تۇر. ايت قارساڭىندا ىستامبۇلدىڭ ءار اۋدانىندا ۋاقىتشا مال بازارلارى قۇرىلىپ، 10 كۇننەن بەرى حالىققا قىزمەت كورسەتۋدە. مەيرام كۇنى بازاردا قىزۋ قاربالاس بولاتىنىن بىلەتىندەر ەرتە قامدانىپ، قۇرباندىققا شالاتىن مالىنا ەن سالىپ كەتۋدە. ىستامبۇل تۇرعىنى مەحمەت شاكير قولىنداعى 720 مىڭ تەڭگەگە ءبىر ءىرى قارا ساتىپ الۋ ءۇشىن بۇگىندىككە 3 مال بازارىن ارالاپ شىقتى. ونىڭ ايتۋىنشا، باعا بىلتىرعىمەن سالىستىرعاندا كەمى % 20- عا قىمباتتاعان.
مەحمەت شاكير، ىستامبۇل تۇرعىنى:
- مەن 7-8 مىڭعا مال الام دەپ كەلىپ ەدىم، ءبىراق بازارداعى باعا ويىمداعىدان 2 مىڭعا ارتىق شىقتى. ارينە، ولاردىڭ سۇراعان اقشاسىن بەرە سالايىن دەپ تۇرعانىم جوق. سوندىقتان مالشىنىڭ دا، ساۋداگەردىڭ دە اقىسىن جەمەي، شىنايى نارىقتىق باعاسىنا دەيىن ساۋدالاسامىن.
ىستامبۇل بازارىندا ۇساق مالدىڭ باعاسى 400-1400 ليرا ارالىعىندا. تەڭگەگە شاققاندا 35 مىڭ مەن 125 مىڭنىڭ اراسى. ال ءىرى قارا مال 255 مىڭ تەڭگەدەن باستالىپ، ميلليوننان اسىپ جىعىلادى. مىسالى، كاستامونۋ جايلاۋىنان كەلگەن بۇقانىڭ باعاسى 820 مىڭ تەڭگەنى قۇرايدى. باعاسىنىڭ مۇنشالىقتى قىمبات بولۋىنا قاراماستان، بازارداعى مالدىڭ %80- ى ساتىلىپ كەتىپتى. يىلماز قاراباقال بازارعا بيىل 60 وگىز شىعاردى. ءىرى قارانىڭ كوبى العاشقى اپتادا- اق ساتىلىپتى. جايىلىمدا جۇرگەن مالعا سۇرانىس ءارقاشان جوعارى دەيدى ول. ونىڭ پىكىرىنشە، مال باعاسىنا جول شىعىنى مەن بازارداعى جالعا الاتىن ورىننىڭ كۇرت قىمباتتاۋى اسەر ەتىپ وتىر.
يىلماز قاراباقال، ساتۋشى:
- 60 وگىز سياتىن قورانى 5 مىڭعا جالعا الدىق. ونىڭ ىشىنە مالىمىزدىڭ ون كۇندىك جەم- ءشوبى مەن اۋلانى تازالاۋ قىزمەتى كىرەدى ەكەن. ءبىراق سوعان قاراماستان، ءبىز ءۇشىن بۇل تىم قىمبات. امالسىز شىعىندارىمىزدى مال باسىنا بولەمىز. ناتيجەسىندە ونىڭ قۇنى دا ءوسىپ شىعا كەلەدى.
تۇركيادا قۇربان ايت - كوپشىلىك تاعاتسىزدانا كۇتەتىن ايتۋلى مەرەكە. بيىل تۇرىك ۇكىمەتى مەيرامعا وراي ءبىر اپتا رەسمي دەمالىس جاريالادى. ۇلىق مەرەكەنى ءماندى وتكىزۋ ءۇشىن جەرگىلىكتى بيلىك پەن قوعامدىق ۇيىمدار ءارتۇرلى قايىرىمدىلىق شارالارىن ۇيىمداستىرۋدا. مىسالى، حالىقتىڭ ەركىن ءجۇرىپ- تۇرۋى ءۇشىن قوعامدىق كولىكتەرگە % 50 جەڭىلدىك جاسالدى. يگىلىكتى ىستە تۇرىك كاسىپكەرلەرى دە توبە كورسەتۋدە.
نازميە اقگۇل، ساتۋشى:
- مەيرام الدىنداعى اراپا كۇنى ساۋدامىز قىزا تۇسەدى. سەبەبى ول كۇنى كوپشىلىك ءبىر- بىرىنە جاسايتىن سىيلىقتارىن ازىرلەيدى. ءبىز بالالار كيىمىن ساتامىز. تۇتىنۋشىلارىمىزدىڭ دەنى - وتباسىلى ادامدار. بيىل قۇربان ايت قارساڭىندا زاتتارىمىزعا %50- عا دەيىن جەڭىلدىك جاسادىق. سوندىقتان كوپشىلىك قاۋىم مەرەكەلىك جەڭىلدىكتەردى پايدالانىپ، بالالارىنا كۇزگى كيىمدەردى وتە ىڭعايلى باعادا ساتىپ الۋىنا مۇمكىندىك جاساپ وتىرمىز.
«قۇربان» ءسوزىنىڭ ءتۇپ توركىنى «جاقىنداسۋ» دەگەن ماعىنانى بەرەدى. ياعني ادامزات ايتتا شالعان مالى مەن ىزگى نيەتى ارقىلى جاراتقانعا جاقىنداسا، ال ادامدار ءبىر- بىرىنە كورسەتكەن سىي- قوشەمەتىمەن، مەيىرىم- شاپاعاتىمەن جاراساتىن كورىنەدى.
www.24.kz
