ەرتەڭ - اراپا كۇنى
سول كۇنى جاسالعان ىزگى امالداردىڭ ساۋابى بىرنەشە ەسەلەنىپ بەرىلەدى.
بۇل كۇنى قاجىلىق پارىزىن وتەۋگە بارعان كىسىلەر ءتۇس اۋعاننان كەيىن ەرتەڭگى (ايت كۇنى) تاڭ نامازىنا دەيىنگى ارالىقتا ارافات تاۋىنا ءبىر مەزەت تۇراقتايدى.
اراپا اراب تىلىندەگى ءبىلۋ، ءتۇسىنۋ دەگەن ماعىناعا ساياتىن «ارافا» ەتىستىگىنەن شىققان. بۇل كۇننىڭ «اراپا» دەپ اتالۋىنىڭ سەبەبى، ءزۇل-حيججا ايىنىڭ سەگىزى كۇنى يبراھيم پايعامبار تۇسىندە قۇرباندىققا بالاسىن يسمايىلدى شالۋ جايىندا ءتۇس كورەدى. العاشقىدا كورگەن ءتۇسىن «جاي ءتۇس پە الدە ايان با» دەپ ويلاعان ول ەرتەسىنە (ايدىڭ توعىزىنا) تاعى كورەدى. وسىدان كەيىن ونىڭ اللادان كەلگەن ايان ەكەنىن بىلەدى. وسى سەبەپتى بۇل كۇندى «ارافا (اراپا)» دەپ اتاپ كەتكەن دەسەدى.
ارافا كۇنى قاجىلىققا بارماعان كىسىنىڭ ورازا ۇستاپ، ءناپىل نامازدار وقىپ، اللادان دۇعا تىلەۋى ساۋاپتى. ويتكەنى ساحيح مۋسليمدە ريۋايات ەتىلگەن ءبىر حاديستە ارداقتى پايعامبارىمىز (س. ا. ۋ): «...اراپا كۇنگى ورازا ءۇشىن وتكەن جىلعى جانە كەلەر جىلعى (ەكى جىلدىق كىشى) كۇنالارىن كەشىرۋدى اللادان ۇمىتپەن تىلەيمىن...» - دەپ بۇل كۇنگى ورازانىڭ ماڭىزدىلعىن باسا ايتۋدا.
تاعى ءبىر حاديسىندە: «دۇعالاردىڭ ەڭ قايىرلىسى - اراپا كۇنى جاسالعان دۇعا...» - دەگەن.
ءبىزدىڭ ەلدە اراپا كۇنى ەرتەسى بولاتىن ايت كۇنىنە شەلپەك- باۋىرساق ءپىسىرىپ، داستارحان ازىرلىگى جاسالىپ جاتادى. سونىمەن قوسا، ءبىر كۇن ورازا ۇستاعان دا دۇرىس بولادى.
