قىتايدا بولاتىن «نامىس دودا» ويىنىنىڭ جاڭا ماۋسىمى «قازاقستان» تەلەارناسىنان بەرىلەدى - فوتو

وسى جىلى جوبا ەرەجەلەرى وزگەردى. ەندى قاتىسۋشىلار ءاربىر ويىنعا جانە ءاربىر سايىسقا قاتىسۋعا مىندەتتى. بۇدان بۇرىن «چەمپيون قابىرعاسى» ويىنى ۇپاي سانىن تۇگەندەۋ كەزىندە شەشۋشى ءارى ماڭىزدى كەزەڭ بولاتىن. ال وسى ماۋسىمدا ۇپاي سانى ءار ويىن اياقتالعاننان كەيىن ەسەپتەلىپ، ەڭ سوڭىندا بارلىق كەزەڭدەر بويىنشا جالپى ۇپاي سانى شىعارىلادى.

ەستەرىڭىزگە سالا كەتەيىك، «نامىس دودا» ويىنىنىڭ تۇسىرىلىمدەرى العاش رەت حاينان ارالىعىندا ورنالاسقان قىتايدىڭ حايكوۋ قالاسىندا وتكىزىلدى. قازاقستان قۇراماسىنىڭ قارسىلاستارى قىتاي، ۆەنگريا، فرانسيا جانە الجير.

بۇل رەتتە، 2007 -جىلى وتكىزىلگەن تۋرنيردە قازاقستان ءتورتىنشى ورىندى، 2008 -جىلى جۇلدەلى ەكىنشى ورىندى يەلەنسە، ال 2012 -جىلى جەڭىمپاز اتانىپ، باس جۇلدەنى ۇتىپ العان بولاتىن.

بۇل ماۋسىمداعى قازاقستاندىق قۇرامانىڭ باس باپكەرى - ارالاس جەكپە- جەك بويىنشا الەمنىڭ ءۇش دۇركىن چەمپيونى، ەۋرازيا جانە ازيا چەمپيونى، م م ا بويىنشا الەم كۋبوگىنىڭ يەگەرى ارداق نازاروۆ.

قاتىسۋشىلاردىڭ قۇرامىندا قازاقستاننىڭ بەلسەندى جانە تانىمال وكىلدەرى: وليمپيادا چەمپيوندارى، ءارتۇرلى سپورت تۇرلەرى بويىنشا الەم چەمپيوندارى، ونەر زيالىلارى جانە باسقالارى دا قاتىسادى.

قازاقستاننىڭ قۇرامىندا ەل نامىسىن قورعايتىندار نەگىزىنەن ءتۇرلى جەكپە-جەك وكىلدەرى. مىسالى، سايىستارعا قازاقستاننىڭ بوكس بويىنشا بىرنەشە دۇركىن الەم چەمپيونى جانە لوندوندا وتكەن وليمپيادا قاتىسۋشىسى سايدا حاسەنوۆا، جاس كاسىپقوي بوكسشى جانقوش تۇراروۆ، قازاقستاننىڭ جاستار قۇراماسىنىڭ ۆولەيبولشىسى ءاليا باتقۇلدينا، سامبو بويىنشا ەكى دۇركىن الەم چەمپيونى رايسا بايليەۆا جانە تاعى باسقالارى. سونداي- اق، ويىنعا قاتىسۋشىلارعا قازاقستاندىق تانىمال ونەر جۇلدىزدارى قولداۋ كورسەتتى.

جوبانىڭ اۋديتورياسىن وليمپيادا ويىندارىمەن سالىستىرۋعا بولادى. ويىن اۋديتورياسى ەكى ميلليارد ادامدى قۇرايدى. بۇل - تەلەۆيزيا دامۋىنىڭ بارلىق الەمدىك تەندەنتسيالارىنا سايكەس كەلەتىن ۇلكەن كولەمدەگى جانە جوعارى ساپاداعى وتاندىق تەلەۆيزياداعى جالعىز شوۋ. ەلىمىزدىڭ وسىنداي كولەمدەگى حالىقارالىق جوباعا قاتىسۋى رەسپۋبليكامىز ءۇشىن ءىرى وقيعا بولىپ سانالادى.

«نامىس دودا» جوباسىنىڭ پروديۋسەرى التىنبەك راحمەتوۆ: «ويىننىڭ باستالۋىنا ەكى اپتا قالعاندا قاتىسۋشىلاردىڭ قۇجاتتارىن (ولاردىڭ جالپى سانى توقسانعا جۋىق) راسىمدەۋدەن باستاپ، قىتايعا بارعانعا دەيىن ءبىرشاما قيىندىقتار تۋىندادى. جالپى، قىتايعا ۇشۋ ءارتۇرلى جەرلەردە توقتاۋمەن ون بەس ساعات ۋاقىتىمىزدى الدى. «نامىس دودانىڭ» ءتۇسىرىلىمى رامازان ايىندا ءوتتى. ويىنعا قاتىسۋشىلاردىڭ تەڭ جارتىسى ورازا تۇتقان ەدى. حاينان ارالىندا

كولەڭكەنىڭ وزىندە تەمپەراتۋرا 50 گرادۋس ىستىق بولدى. بۇل جولى قارسىلاستارىمىز ءبارىمىزدى قاتتى تاڭقالدىردى. ويىنعا جاقسى دايىندالعاندارى كورىنىپ تۇردى. الايدا، ەشبىر قيىندىقتارعا قاراماستان، ءبىزدىڭ قاتىسۋشىلارىمىز ەل نامىسىن قولدان بەرمەۋگە بارىن سالدى. كوپتەگەن كۇردەلى كەزەڭدەر، قىزىقتى ويىندار بولدى. ءوز تاراپىمىزدان كورەرمەندەرگە توسىن سىي جاسادىق، ءبىراق بۇنى تەلەارنا ەفيرىنەن بىلە الاسىزدار»، - دەدى.

«نامىس دودا» تەلەجوباسىن «قازاقستان» تەلەارناسىنىڭ ەفيرىنەن 2 -قازاننان باستاپ جۇما كۇندەرى ساعات 21.05 تە، جەكسەنبى كۇنى ساعات 15.00 دە قايتالاۋىن تاماشالاي الاسىزدار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى