بۇركىتشىلەر سايىسىندا استانالىق قۇسبەگى سەرىكبەك كۇنتۋعان جەڭىمپاز اتاندى
قىركۇيەكتىڭ 19-20 كۇندەرى اقمولا وبلىسىندا الىس- جاقىن شەتەلدەردەن كەلگەن قۇسبەگىلەر شەبەرلىك سىناسىپ، جەڭىمپازدار انىقتالدى. «نۇر وتان» پارتياسىنىڭ قولداۋىمەن ۇلتتىق سپورت تۇرلەرى قاۋىمداستىعى ۇيىمداستىرعان شاراعا «سامۇرىق- قازىنا» ۇلتتىق ءال- اۋقات قورى دەمەۋشىلىك كورسەتتى، دەپ حابارلايدى nurotan.kz.
ەكى كۇندىك دودادا استانا قالاسىنىڭ تۇرعىنى سەرىكبەك كۇنتۋعان 1- ورىن السا، جامبىل وبلىسىنىڭ وكىلى جالعاس اكىمبەكوۆ ەكىنشى ورىندى يەلەندى. ءۇشىنشى ورىن اقمولا وبلىسىنىڭ بۇركىتشىسى ولجاس بەكحوجينگە بۇيىردى.
سايىستا 10 مەملەكەتتەن كەلگەن بۇركىتشىلەر باقتارىن سىنادى. اتاپ ايتار بولساق، وزبەكستان، قىتاي، موڭعوليا، رەسەي، قىرعىز رەسپۋبليكاسى سەكىلدى الىس- جاقىن شەتەلدەردەن كەلگەن بۇركىتشىلەر شەبەرلىك جارىستىردى.
جارىس بىرنەشە كەزەڭنەن تۇردى. ءبىرىنشى، بۇركىتشى قىران قۇسىن قويان جانە تۇلكىگە سالىپ اڭشىلىق شەبەرلىگىن كورسەتسە، كەلەسى بولىمدەردە قۇسىن قولىنا قوندىرىپ، كوككە ەركىن ۇشىرۋ سەكىلدى ساتىلاردان ءوتتى.
سونىمەن بىرگە بايقاۋ بارىسىندا ارداگەر سپورتشى قانات احمەتوۆتىڭ 70 جىلدىعى قۇرمەتىنە «بۇركىتشىلىكتى دامىتۋ» تاقىرىبىندا ارنايى عىلىمي كونفەرەنسيا بولدى.
ايتا كەتۋ كەرەك، «نۇر وتان» پارتياسى سوڭعى جىلدارى ۇلتتىق مادەنيەت پەن ونەرگە، سپورت تۇرلەرىنە تۇراقتى تۇردە قولداۋ كورسەتۋدە. ولاردىڭ قاتارىندا «قازاقستان بارىسى»، «التىن تۇلپار» سياقتى جوبالار بار.
