اباي جانە دۋلات شىعارماشىلىعىنداعى ۇندەستىك
اباي ءوزىنىڭ ءبىرىنشى قارا سوزىندە: «بۇل جاسقا كەلگەنشە جاقسى وتكىزدىك پە، جامان وتكىزدىك پە، ايتەۋىر ءبىرتالاي ءومىرىمىزدى وتكىزدىك: الىستىق، جۇلىستىق، ايتىستىق، تارتىستىق - اۋرەشىلىكتى كورە- كورە كەلدىك. ەندى جەر ورتاسى جاسقا كەلدىك: قاجىدىق، جالىقتىق؛ قىلىپ جۇرگەن ءىسىمىزدىڭ بايانسىزىن، بايلاۋسىزىن كوردىك، ءبارى قورشىلىق ەكەنىن بىلدىك. ال، ەندى قالعان ءومىرىمىزدى قايتىپ، نە قىلىپ وتكىزەمىز؟ سونى تابا الماي ءوزىم دە قايرانمىن»، - دەيدى. ال دۋلات: كۇنام جويقىن، تاۋبەم از، تىرشىلىكتەن نە تاپتىم! دۇنيە - جەمتىك، مەن - توبەت، سونى باقپاي، نە باقتىم؟ ىرىلداسىپ، اركىممەن، نە قاپقىزدىم، نە قاپتىم؟ - دەي وتىرىپ، ابايدىڭ ويىن جالعاعانداي بولادى.
دۋلاتتىڭ: «ازعان ەلدىڭ ىشىنەن، قازاق بۇزار ءۇي تەنتەك، كوردىك شىققان باتىردى» دەگەن جولدارى ابايدىڭ ون ءتورتىنشى قارا سوزىمەن ۇندەسەدى. اباي: «قازاق تا ادام بالاسى عوي، كوبى اقىلسىزدىعىنان ازبايدى، اقىلدىڭ ءسوزىن ۇعىپ الارلىق جۇرەكتە جىگەر، قايرات، بايلاۋلىلىقتىڭ جوقتىعىنان ازادى. ءبىلىمدى بىلسە دە، ارسىز، قايراتسىزدىعىنان ەسكەرمەي، ۇستاماي كەتەدى. جامانشىلىققا ءبىر ەلىگىپ كەتكەن سوڭ، بويىن جيىپ الىپ كەتەرلىك قايرات قازاقتا كەم بولادى. وسى جۇرتتىڭ كوبىنىڭ ايتىپ جۇرگەن مىقتى جىگىت، ەر جىگىت، پىسىق جىگىت دەپ ات قويىپ جۇرگەن كىسىلەرىنىڭ ءبارى - پالەگە، جامانشىلىققا ەلىرتپەك ءۇشىن، ءبىرىن- ءبىرى «ايدا، باتىرلاپ!» قىزدىرىپ الادى دا، ارتىن ويلاتپاي، ازعىراتۇعىن سوزدەرى. ايتپەسە قۇدايعا تەرىستىكتەن، نە ار مەن ۇياتقا تەرىستىكتەن سىلكىنىپ، بويىن جيىپ الا الماعان كىسى، ۇنەمى جامانشىلىققا، ماقتانعا سالىنىپ، ءوز بويىن ءوزى ءبىر تەكسەرمەي كەتكەن كىسى، ءتاۋىر جىگىت تۇگىل، اۋەلى ادام با ءوزى؟» - دەيدى.
massaget.kz
