د. تۇرلىبەكتىڭ «ءماشھۇر- ءجۇسىپ» دەرەكتى فيلمىن كورەرمەن سىنعا الدى
ال دەرەكتى فيلم جونىنە كەلسەك، بىرىنشىدەن، «تۇركى الەمى» دۇنيەجۇزىلىك فەستيۆالىنە الىپ باراتىنداي ماعىنالى وي مەن مازمۇن كورە المادىق. ەرەكشە جوعارى اسەر الاتىنداي، سول العان اسەرى ويدان كەتپەيتىندەي فيلم كەرەك، دەپ جازادى egemen.kz.
الداعى قازان ايىندا تۇركيانىڭ شاشما قالاسىندا تۇركى تىلدەس حالىقتاردىڭ دۇنيەجۇزىلىك تەلەفەستيۆالى وتەتىن كورىنەدى.
ءبىزدىڭ ەلىمىزدەن الماتىداعى «تۇركى الەمى» تەلەستۋدياسى قاتىسادى ەكەن. تەلەستۋديا «ايتەكە ءبيدىڭ اق جولى» جانە «ءماشھۇر- ءجۇسىپ» اتتى دەرەكتى فيلمدەرىمەن فەستيۆالعا قاتىسپاقشى بولىپتى.
سۋبتيترىمەن تۇرىك تىلىنە دە اۋدارىلىپتى. جۋىقتا فيلم اۆتورى، «تۇركى الەمى» تەلەستۋدياسىنىڭ ديرەكتورى، جازۋشى دوقتىرحان تۇرلىبەك كەرەكۋ وڭىرىنە كەلىپ، العاشقى بەتاشار كورسەتىلىمىن كورسەتتى.
دوقتىرحان تۇرلىبەكتىڭ ايتۋىنشا، فەستيۆالدا جۇلدەلى ورىنعا يە بولعان فيلم تۇركىتىلدەس 26 ەلدىڭ تىلىنە اۋدارىلادى ەكەن. ولاردان باسقا اعىلشىن، يسپان جانە ورىس تىلدەرىنە دە ءتارجىمالانادى.
جازۋشىنىڭ عۇلامانى تۇركى الەمىنە تانىستىرۋدى قولعا العان تانىمدىق عيبراتى مول يماندىلىق ءىسى ساۋاپتى بولسىن دەيىك.
ءبىراق، شەرحان اعامىز ايتقانداي، وسىندايدا ءبىر كەم دۇنيەنىڭ الدىڭنان شىعاتىنى وكىنىشتى.
- ءبىزدىڭ ماقسات - ءماشھۇر- ءجۇسىپتى تۇركى الەمىنە تانىستىرۋ. ءوزىمىز دە ءالى بىلە بەرمەيمىز. عۇلاما قازاققا عانا ەمەس، جالپى تۇركى دۇنيەسىندەگى ايتۋلى تۇلعا ەكەنىن وسى فيلم ارقىلى تانىستىرعىمىز كەلدى. ءبىراق، فيلمدى الدىمەن جەرلەستەرىنە كورسەتىپ الايىن، نە دەر ەكەن دەپ اكەلىپ ەدىم. ءبىراز ورىندى سىندار ايتىلدى. سوندىقتان، قايتادان تولىقتىرۋ قاجەتتىگىن ءتۇسىندىم، - دەدى اۆتور.
ارينە، ءماشھۇر اتامىز تۋرالى شەتكە كينو شىعارىپ، اپارىپ كورسەتۋ - ۇلكەن رۋحاني- عىلىمي، ادەبي-مادەني ىزدەنىستى تالاپ ەتەدى. عۇلامانىڭ مۇراسى ول ءوزى ءبىر تۇڭعيىق الەم.
بۇل - ءبىر تاۋسىلماس شەجىرە. تەك ۇڭىلە ءبىل. ءتۇسىنۋ - پارىز. شىعارمالارى وتە كۇردەلى، ۇلكەن فيلوسوفيالىق- ەستەتيكالىق، پوەتيكالىق وي ارقاۋلارىنا قۇرىلعان قۇبىلىس.
ادامعا رۋحاني وي-سانا بەرەتىن قۋاتتى قۇرال. اۋليەلىك قاسيەتى، ءدىني قايراتكەرلىگى جانە بار. سوندىقتان دا ءبىز ءماشھۇر مۇرالارىن ءالى تولىق تانىپ بولعان جوقپىز. ال دەرەكتى فيلم جونىنە كەلسەك، بىرىنشىدەن، «تۇركى الەمى» دۇنيەجۇزىلىك فەستيۆالىنە الىپ باراتىنداي ماعىنالى وي مەن مازمۇن كورە المادىق. ەرەكشە جوعارى اسەر الاتىنداي، سول العان اسەرى ويدان كەتپەيتىندەي فيلم كەرەك. عۇلامانىڭ مۇراسىن زەرتتەۋشىلەر، جەرگىلىكتى جەردەگى ءماشھۇرتانۋشى عالىمدار، جازۋشىلار، جالپى اتالارىنىڭ جازعان-سىزعاندارىن ساقتاپ، سارالاپ، جاتقا بىلەتىن سوڭىنداعى ۇرپاقتارىمەن اقىلداسىپ، كەڭەسىپ بارىپ دەرەكتى فيلم ءتۇسىرۋ قاجەت ەدى.
كەمشىن تۇستاردى دوقتىرحان اعامىز دا ءتۇسىندى. فيلمدى ءماشھۇر اتانىڭ جەرلەستەرىنە كورسەتىپ العانى تىپتەن-اق جاقسى بولدى. عۇلاما اتامىزدى وزگەلەرگە باعالاتا بىلەتىن دە ءوزىمىز عوي. كوپشىلىك ايتقان سىني پىكىرلەرى، جاناشىر كوزقاراستارى قايتا فيلم «تۇركى الەمىنە» جول ءجۇرىپ كەتپەي جاتىپ ايتىلعانى جاقسى بولدى.
كەلەسى جولى عۇلاما جايلى كوپشىلىكپەن كەڭەسكەن، عىلىمي-ادەبي سىنداردان وتكەن مازمۇندى شىعارما ۇسىنىلاتىن بولار دەپ سەنەمىز. وتكەندى ءبىلۋ، عيبراتىن ءتۇسىنۋ - پارىز. ال ءماشھۇر- ءجۇسىپ كوپەي ۇلى تۋرالى دەرەكتى فيلم ءتۇسىرۋ ءۇشىن دە وسىنداي رۋحانيات تالاپتارى قاجەت ەكەنى ءسوزسىز.
