جاس جازۋشىلاردىڭ دەنى «ولىممەن» ويناپ ءجۇر
سوڭعى بىرنەشە جىلدىڭ ىشىندە ونىڭ حيكاياتتارى، اڭگىمەلەرى ادەبي پورتالداردا جاريالانىپ تا ۇلگەردى. كوركەم شىعارمالارى جارىق كورگەنىمەن، ادەبي ورتا ونى قالاي قابىلدادى؟ بەيىمبەتتى ۇلگى تۇتاتىن ەسبولاتتىڭ كوركەم شىعارماسى ءا دەگەننەن نەگە سىنالدى؟ ءبىزدىڭ اۆتورعا قويعان ساۋالىمىز وسى.
- ەسبولات، بەلگىلى سىنشى ايگۇل كەمەلبايەۆا ءسىزدىڭ «ازاپ پەن مازاق» اڭگىمەڭىزگە «ادام پسيحولوگياسىن زەرتتەۋدەن گورى ءوزى جيناعان روبوت وبرازدارىن قىزىقتاپ كەتەتىنى ايقىن» دەپ باعا بەرىپتى. كەيىپكەرلەر شىنايى بولماسا، قيالدان تۋعان دۇنيەمەن وقىرماندى الداي الامىز با؟
- ارينە، ءوز شىعارماما ادۆوكات بولعىم جوق، مۇمكىن، كەيىپكەرلەردىڭ جان دۇنيەسىنە تەرەڭدەپ ەنە الماي جاتقان شىعارمىز، مۇمكىن، شەبەرلىك جەتىسپەگەن بولار. ءبىراق بۇل شىعارما شىنايىلىقتان الىس، ونداعى سيۋجەت پەن وبرازدار ويدان شىعارىلعان دەگەن پىكىرمەن كەلىسپەيمىن، كەرىسىنشە، كوركەمدىگى ازداۋ، شىنايىلىعى باسىم دەسەڭىزدەر، قۇلاققا كىرەدى.
بۇل اڭگىمەنى جازعاندا سوزگە سونشالىقتى ءمان بەرمەدىم، وقيعانىڭ شيەلەنىسىنە باسا كوڭىل اۋداردىم. انىعىن ايتقاندا، «ازاپ پەن مازاقتا» جازىلعان جايتتىڭ 80 پايىزى شىندىق. تۇرمە، سوتتالعان قىز، اباقتى ىشىندەگى بالالار باقشاسى، ءتىپتى سول بالالار باقشاسىنىڭ الدىنداعى قاراعاشتى مەكەندەگەن قارا قارعالارعا دەيىن ومىردە بار. جاۋعاشتىعا بارىپ كورسەڭىز بولادى. سوندىقتان دا ءبىر وقىعاندا پۋبليتسيستيكالىق لەپ ەسەتىنى انىق. ايگۇل كەمەلبايەۆانىڭ «اڭگىمە ەمەس، وچەرككە كەلىڭكىرەيدى» دەگەنى سودان بولسا كەرەك.
- بۇگىنگى قازاق پروزاسىنىڭ دا اقسايتىن ەڭ وسال تۇسى وسى ەمەس پە، ياعني پروزادا پۋبليتسيستيكانىڭ سارىنى باسىم بولۋى. كەلىسەسىز بە؟
- پۋبليتسيستيكالىق سارىندى ءمان بەرىپ قاراساڭىز، مۇحتار ماعاۋيننەن باستاپ، ءبىرسىپىرا جازۋشىلاردىڭ ەڭبەگىنەن تاۋىپ الۋعا بولادى. ءبىز ۇلگى الاتىن باتىس ادەبيەتىنەن دە جولىقتىراسىز. بالكىم، قالامگەرلەردىڭ دەنى جازۋشىلىققا جۋرناليستيكانىڭ اۋىلىنان كەلگەندىكتەن شىعار... دجەك لوندون ايگىلى «مارتين يدەن» رومانىندا «رەداكتورلىق جۇمىس جازۋشى ءۇشىن ادەبي ءولىم» دەيدى. ال بۇگىنگى پروزايكتەردىڭ اراسىنان رەداكتور ەمەسىن تاۋىپ كورىڭىزشى. دجەك لوندوننىڭ فورمۋلاسىنا سالساق، ءبىزدىڭ بۇگىنگى جاس جازۋشىلاردىڭ دەنى «ولىممەن ويناپ ءجۇر».
- ءوزىڭ ايتقان دجەك لوندوننىڭ ءبىر اڭگىمەسىن التى ءجۇز رەت قايتارىپ بەرگەنى تۋرالى وقىپ ەدىك. ءبارىبىر كلاسسيك رەتىندە ونىڭ اتى قالدى. «جەتى رەت ولشەپ، ءبىر رەت كەسۋ» دەگەن وسى شىعار. بىزدە نەگە مۇنداي ادەبي ءۇردىس جوق؟
- نەگە جوق دەپ كەسىپ-پىشەمىز. بىزدە وزىنە قاتال تالاپ قوياتىن قالامگەرلەر جەتەرلىك. جاقىندا عانا اقتوبەلىك ەرتاي اشىقبايەۆ دەگەن اقىن اعامىزدىڭ جاريالانباعان ولەڭدەرىن ورتەپ جىبەرگەنىن ەستىدىم. «نەگە؟» دەپ سۇراعاندارعا ايتقانى: «كەيبىر اقىندار ولگەن سوڭ، تۋىستارى «اتامىزدىڭ جاريالانباعان ولەڭدەرى ەدى» دەپ باستىرىپ جاتادى، وقىپ قاراساڭ، اقىننىڭ ءتىرى كەزىندە جاريالانعان شىعارمالارىنان ءالسىز. ويتكەنى اقىن وزىنە ۇناماعان سوڭ، ەشكىمگە كورسەتپەي ساقتاپ قويعان. ونى بالالارى تاۋىپ الىپ جاريالاپ جاتادى. مەنىڭ دە وزىمە ۇنامايتىن ولەڭدەرىم بار، ولاردى جاريالامايمىن، «ەرتاي اشىقبايەۆ وسىنداي ناشار ولەڭ جازىپتى» دەگەن اتقا قالماس ءۇشىن قازىردەن كوزىن قۇرتقانىم جاقسى» دەگەندەي جاۋاپ بەرىپتى. مىنە، ءسوز. ادەبيەتكە ادالدىق، ىشكى سەنزۋرا دەگەن وسى. مەنىڭ قاتارلاستارىم ۋاقىت وتە كەلە سونداي دەڭگەيگە جەتەدى دەپ ويلايمىن.
- «ءاربىر سىن پىكىردى باستان ۇرعان دويىر ەمەس، ساۋىرعا سالعان قامشى دەپ بىلەيىك» دەيسىز. ايگۇل كەمەلبايەۆانىڭ سىنى سىزگە قالاي اسەر ەتتى؟
- ءار ادامنىڭ قابىلداۋى، تالعامى ءارتۇرلى. ول سىننان وزىمە كەرەگىن الدىم. كەلىسپەيتىن تۇسىم دا بارشىلىق. اقىرى سۇرادىڭىز، ايتايىنشى، بەينەلەپ سويلەگەندە، ءاربىر شىعارما ماۋەلى ءبىر اعاش سەكىلدى. ءوزىنىڭ تامىرى، دىڭگەگى بار، بۇتاعى- جاپىراعى، جەمىسى بار. سول جەمىستەردىڭ ىشىندە ۋىلجىپ پىسكەنى بولادى، پىسپەگەنى بولادى جانە شىرىك شالعانى بولادى. ايگۇل اكپەمىزدىڭ سىنى ماعان وسى جەمىستىڭ ىشىندەگى ەڭ شىرىگىن تاڭداپ الىپ، جەپ كورگەن سوڭ، بۇل اعاشتىڭ جەمىسىن جەۋگە جارامسىز دەپ ءپاتۋا بەرە سالعان باعبانعا ۇقساپ كەتتى. ال ول اعاشتىڭ باسىندا جاقسى جەمىسى بار شىعار، ونى نەگە كورگىسى كەلمەيدى؟
پىسپەگەنىن ءپىسىرۋ كەرەك شىعار، وعان نەگە ءمان بەرمەيدى؟ ءتىپتى قۇرت شالعانىنىڭ ءوزى كادەگە جارايتىن شىعار، ول جاعى نەلىكتەن ەسكەرىلمەيدى؟ كونسپيرالوگيالىق ويلارعا بەرىلىپ، قارا كۇيە جاعا بەرگەنشە، ماعان وسىنداي كەڭەسىن قوسا ايتقاندا، وشپەندىلىكپەن ەمەس، جاناشىرلىقپەن سىناعاندا، مەنىڭ داۋىم بولماس ەدى.
كەيبىر جەرلەرىن تۇسىنۋگە تىرىسپاعان. بىرىنشىدەن، شىعارمادا باعىم اكەسىمەن توسەكتەس بولدى دەگەن ءسوز جوق. ولاردىڭ قانعا بويالىپ، ءبىر توسەكتە جاتقانى عانا ايتىلادى. ەكەۋىنىڭ اراسىندا نە بولعانى جازىلماعان. اڭگىمەدە قىزدىڭ «مەنىڭ اكەم مەن شەشەم قىلمىس، مەنىڭ بويىمدا تالاي ايەلدىڭ كوز جاسىنا قالعان ازاپتىڭ قانى اعىپ جاتىر» دەگەن ءسوز بار. بۇل ادامنىڭ وزىنەن-ءوزى جيىركەنۋى.
ونداي جاعدايداعى ادام ومىردەن تۇڭىلمەگەندە نە ىستەيدى؟ مەن باعىمدى اكەسىمەن تابىستىرىپ، تۇرمەدەن باقىتتى قىلىپ شىعارسام، انىق جاساندىلىق سوندا بولماي ما؟ ەكىنشىدەن، شىعارماداعى كەيىپكەر ەسىمى - مەن ءۇشىن شارتتى ۇعىم. ول قىزدىڭ اتىن باعيلا، ساعيلا، ءتىپتى گۇلزينا دەپ قازىر-اق وزگەرتە سالسام بولادى. وندا تۇرعان ەشتەڭە جوق. باعىم دەگەن ات ويىما كەلدى، جازدىم، سولاي كەتتى. وعان كەلىپ، «قىزدىڭ ەسىمى نەگە باعىم، باسقا دەرەكسىز ات قۇرىپ قالدى ما؟»، «قازاقتىڭ باعىنا قارعىس ايتىپ وتىرسىڭ، ەلىڭنىڭ كەلەشەگىنە جارىقشاق سالىپ وتىرسىڭ» دەگەندەي ويلارمەن تۇنشىقتىرۋ، اۆتوردى ۇلتقا جامانات تىلەۋشى قىلىپ كورسەتۋ نە ءۇشىن كەرەك بولدى؟ مەنىڭشە، كەيىپكەردىڭ ەسىمىنە جارماسۋ - كەڭەس وكىمەتىنەن قالعان دەرت.
كەزىندە جازۋشىلارىمىز باس كەيىپكەرلەرىن ازات، ەركىن دەپ اتاۋدان قورىققان، «سەن ازاتتىقتى اڭساپ ءجۇرسىڭ» دەپ بالە قىلاتىن. ءتىپتى «اقجول» گازەتىنە بۇلاردىڭ ءدىني استارى بار، «اق جول» دەگەنى «حاق جول» دەپ تيىسكەنىن بىلەسىز. جالپى العاندا، سىندى سالقىنقاندى قابىلدادىم. ول كىسىنىڭ ايەل ادام رەتىندە كەيىپكەرگە جانى اشىپ، ەموتسياعا كوبىرەك بەرىلگەنىن ءتۇسىندىم.
- «ادەبيەتتە تارپاڭدىق، ءتۇز تاعىسىنداي ەركىندىك رۋح بولماسا، ونىڭ سالتاناتى دەگدارلىعى، جەتكەن بيىگى بولمايدى. مىقتى تالانت ەشقاشان جەردە قالمايدى». ادەبيەتتىڭ ەركىندىگى دەگەندى قالاي ۇعاسىز؟
- ارينە، بۇل ءسوز ورىندى، كەلىسەمىن. بىزگە ءبارى كەرەك، تارپاڭدىق تا، سىپايىلىق تا، ەركىندىك تە كەرەك. ادەبيەت قانا ەمەس، جالپى قوعامدا بىزگە باۋىرجان مومىش ۇلىنىڭ تارپاڭدىعىمەن قاتار، ءازىلحان نۇرشايىقوۆتىڭ بيازىلىعى دا جەتىسپەي جاتقانىن بايقاپ قالامىز. مىقتى تالانت ەشقاشان جەردە قالمايدى دەگەنى دە ءجون ءسوز. ءبىراق ءبىز اينالاعا قارايىقشى. تالانتتارىمىز قايدا ءجۇر؟ نەگە كۇنى كەشە ومىردەن ءوتىپ كەتكەن تالاسبەك اسەمقۇلوۆ پەن ءامىرحان بالقىبەكتى دۇرىس باعالاي المادىق؟ نەگە كەزىندە قاسىم، مۇقاعاليلاردى سىرتقا تەپكەن قوعامنىڭ قاتەلىگىنە قايتادان كەلىپ ۇرىنامىز؟
تالاسبەك اعادان ءبىر-ەكى رەت تەلارناعا سۇحبات الىپ، ءامىرحان بالقىبەكپەن ءبىر مارتە كولىك ىشىندە سويلەسىپ قالعانىم بولماسا، جاقىن ارالاسقان ەمەسپىن. ول ەكەۋى ومىردەن وتكەندە ەلدىڭ ءبارى ەستەلىك ايتۋدان جارىستى. سول «ەستەلىك ايتقىشتاردىڭ» دەنى اتاقتىڭ بىرنەشەۋىن بوكتەرىپ جۇرگەن، اجەپتەۋىر قىزمەتتەگى ادامدار. ءبىراق سولار الگى ەكى ازاماتتى تىرىسىندە نەگە ەلەپ-ەسكەرمەدى؟ نەگە ءامىرحان جۇمىسسىز قالدى؟ نەگە ءتۇرلى ادەبي سىيلىقتاردى «ءاي وسىلاردىڭ ەڭبەگى بار، سولار السىن» دەمەدى؟ نەگە امىرحانمەن قاتارلاس ءبىر اقىن ادەبيەتتى قويىپ، جۋرناليستەرگە بەرىلەتىن سىيلىققا دەيىن سىپىرىپ جۇرگەندە، وعان تۇك بۇيىرمادى.
مەنىڭشە، ايگۇل اپكەمىز ايتقان كوپ كەرەكتىڭ قاتارىنا قالامگەرلەر اراسىنداعى مارتتىكتى دە قوسۋ كەرەك. وسى رەتتە 70-جىلدارى ادەبي ورتادا كوپ ايتىلاتىن ورىس قالامگەرى وزەروۆتىڭ:
- ۋجە داۆنو پورا سكازات،
پروستىمي، ياسنىمي سلوۆامي:
تالانتام نادو پوموگات.
بەزدارنوستي پروبيۋتسيا سامي، - دەگەن ولەڭى ەسكە تۇسەدى.
- ادەبيەتتىڭ ەركىندىگى تۋرالى جاۋاپ قالىپ قويعان سەكىلدى.
- مەنىڭ ۇعىمىمداعى ادەبي ەركىندىك - وي ەركىندىگى. كوكەيدەگىنى بۇكپەسىز ايتا ءبىلۋ، تۇساۋلى اتشا تاپىراقتاماي، كوسىلىپ جازىپ، كوركەم شىعارما تۋدىرۋ. «ايتىپ وتكەن اقىندا ارمان بارما، جۇرەگىنىڭ تۇبىنە كىر جاسىرماي» دەيدى مۇقاعالي. بۇدان اسىرىپ، ەشتەڭە دەمەي-اق قويايىن.
- ال وندا ادەبيەتتەگى تاقىرىپ جايلى نە ايتاسىز؟ ءبىزدىڭ جاس پروزايكتەر نەگە ميستيكاعا، اۋىل تاقىرىبىنا ۇيىرسەك؟
- الەم ادەبيەتىندە نەگىزى ايتىلماعان ءسوز، جازىلماعان تاقىرىپ جوق. ءبىراق ەشكىم بارلىعى جازىلدى، ەندى جازۋدى توقتاتىپ، تەك وقۋمەن عانا اينالىسايىق دەمەيدى. سوندىقتان «ءبىزدىڭ جاستار اۋىلدى توڭىرەكتەپ ءجۇر، جازۋشىلارىمىز تاريحي رومانداردان اسا المايدى» دەگەن پىكىرلەرمەن كەلىسە المايمىن. «بىزگە ينتەللەكتۋالدىق پروزا كەرەك، انانى جازۋ كەرەك، مىنانى جازباۋ كەرەك» دەگەن ويلارعا دا قارسىمىن. بىزگە ءبارى كەرەك. اۋىل مۇعالىمىنەن باستاپ، استاناداعى شەنەۋنىكتىڭ پسيحولوگياسى، ءتىپتى اسپانداعى جۇلدىزدار تۋرالى جازعىڭ كەلسە جازا بەر، تەك عابيت مۇسىرەپوۆ ايتقانداي «قىزىعا جاز، قىزا جاز، قىزدىرا جاز، قىزىقتىرا جاز».
اۋىل تاقىرىبى دەيسىز، بۇگىنگى اۋىل بۇرىنعىدان وزگەرەك، ادامدارى، ولاردىڭ پسيحولوگياسى، دۇنيەتانىمى باسقا. ەندەشە، نەگە جازباسقا! ينتەللەكتۋالدىق پروزاعا قۇمار، ءوزىنىڭ يكەمى بار قالامگەرلەر بولادى، ونىمەن سولار اينالىسسىن، سەنىڭ جانىڭا نە جاقىن، سونى جاز! ماسەلەن، ماعان ءدىن قايراتكەرى تۋرالى جازۋ قيىن، وعان ءدىني ءبىلىمىم جەتپەيدى. سوندىقتان ول تاقىرىپقا جولامايمىن ازىرگە. بىرەۋ قالانى، بىرەۋ دالانى، ەندى ءبىرى تاريحتى، فانتاستيكانى جازىپ جاتىر. جازا بەرسىن! سولاردىڭ ىشىنەن مىقتىلارى سۇرىپتالىپ شىعادى. «ادەبيەتتىڭ مىندەتى ءومىر شىندىعىن ونەر شىندىعىنا اينالدىرۋ» دەگەندى بەلينسكي مە ەدى ايتقان، كىم ايتسا دا، ءجون ءسوز. ءبىز ءومىردى جازۋىمىز كەرەك!
- بەيجىڭدە ءجۇرىپ، بىرنەشە حيكايات-اڭگىمە جازدىڭىز. بەيجىڭ ءسىزدىڭ شىعارماشىلىعىڭىزعا وڭ باعدار بەرگەن سەكىلدى. تەلەارنادا جۇرگەنىڭىزدە كوركەم ادەبيەتپەن اينالىسۋعا مۇمكىندىك بولمادى ما؟
- تەلەارنانىڭ جۇمىسى قاۋىرت. وندا بىردەڭە جازباق تۇگىلى، وقۋعا ۋاقىت تابا الماي قالاسىڭ. بەيجىڭگە بارعالى بىردەڭەلەردى تۇرتكەندەي بولدىق، كوپشىلىگى ult.kz سايتىندا جاريالاندى.
- «سۇلىكقارا»، « قىزىل ساقا»، «قامشى ۇستار» سەكىلدى اڭگىمەلەرىڭىز بالالارعا ارنالعان سەكىلدى. جالپى، ءبىزدىڭ بالالار ادەبيەتى زامانا كوشىنەن قالىپ قويعان جوق پا؟
- ۇلتتىق ارنادا «دارابوز» دەگەن رەاليتي- شوۋ بولعان. ءبىر كۇنى سونى قاراپ وتىرسام، باعدارلاماعا قاتىسقان جىگىتتەر اتتىڭ مىنەر جاعى مەن قامشىلار جاعىن اجىراتا الماي داعدارىپ قالدى، اقىرى بىرەۋى اتقا تەرىسىنەن مىنە جازدادى. اسىق تۋرالى، ات پەن قامشى جايلى اڭگىمەلەرگە وسى ءبىر كورىنىس تۇرتكى بولدى.
شىنىمەن، ءبىز ءبىرسىپىرا دۇنيەنى ۇمىتتىق، قازىر مەنىڭ اۋىلىما بارساڭىز، جاباعى ۇيرەتكەن، تايعا ءمىنىپ، جارىسىپ جۇرگەن بالالاردى تاپپايسىز. بارلىعىنىڭ قولىندا ءبىر- ءبىر ايفون، سمارتفون، تەلەفون. وسى قاپتاعان «فونداردىڭ» تاساسىندا ءبىزدىڭ قازاقى قالپىمىز جۇتىلىپ بارادى. نە ىستەۋىمىز كەرەك، وسىلاي كەتە بەرەمىز بە، الدەبىر قارەكەت قىلامىز با؟ جاۋاپ بىرەۋ - ءبىز ءوزىمىزدىڭ ۇلتتىق قۇندىلىقتارىمىزدى ادەبيەت، تەلەارنا، گازەت ارقىلى تۇسىندىرە بىلسەك، ۇتامىز. ال ونى قالاي تۇسىندىرەمىز؟
- باسە، قالاي تۇسىندىرەمىز، ايتىڭىزشى؟
- بالالار ادەبيەتىنىڭ ۇلى مىندەتى - تاربيە. ول ارقىلى بالا بويىنداعى ۇلتتىق يممۋنيتەت قالىپتاسادى. ال ۇلتتىق يممۋنيتەتى بەرىك ازامات قازاق ءۇشىن قاسقالداقتىڭ قانىنداي قاجەت. ياعني ادەبيەت - ءبىزدىڭ جاھاندانۋعا قويار باستى قارۋىمىز. ءبىراق ءبىزدىڭ قارۋىمىز جاۋلاۋشى تاراپتىڭ قارۋىنان السىزدەۋ. نەگە؟ ءبىز ا ق ش باستاعان الپاۋىتتاردىڭ اۋىر ارتيللەرياسىنا جالاڭ قىلىشپەن قارسى شىعىپ جاتىرمىز، شىنىن ايتقاندا. ءبىز يدەولوگيالىق سوعىستا جەڭىلىپ قالدىق، ءبىزدى جان-جاقتان توپەلەپ بومبالاپ جاتىر، ال ءبىز وكوپتا جاتىپ الىپ، قۇر ايقايلاپ وتىرمىز. ءبىزدىڭ بۇل مايدانداعى باستى قارۋىمىز - بالالار ادەبيەتى دەسەك، وندا نەگە وسى سالانى دامىتپايمىز؟ نەگە قارۋدىڭ ءتۇر-ءتۇرىن شىعارمايمىز؟ نەگە ۇلتتىڭ يممۋنيتەتىن قالىپتاستىراتىن سالاعا ينۆەستيتسيا سالمايمىز؟ الگى سۇراعىڭىز ورىندى، بالالار ادەبيەتى زامان تالابىنا ىلەسە الماي كەلەدى. مەنىڭ الگى جازعان ءۇش اڭگىمەم، تۋراسىن ايتقاندا، دالاعا اتىلعان وق. ونى ءسىز وقيسىز، مەن وقيمىن، ال ءسىز بەن ءبىزدىڭ بالامىز وقىمايدى. وقىسا دا، تۇسىنبەيدى. ويتكەنى ءبىز سۋرەتتەگەن بالالارمەن قازىرگى پلانشەتپەن ويناعىش بالانىڭ دۇنيەتانىمى باسقا.
ولاردى اسىق، قامشى، تايجارىس دەگەن دۇنيەلەردەن گورى روبوتتاردىڭ سوعىسى تارتىپ تۇرادى. تاعى دا سۇراق تۋىندايدى، نە ىستەۋىمىز كەرەك؟ ءبىز ۇلتتىق قۇندىلىقتارىمىزدى شەتەلدىك دۇنيەلەردىڭ قورابىنا سالىپ ۇسىنۋىمىز كەرەك سەكىلدى. الگى اسىقتى پلانشەتتىڭ ىشىنە كىرگىزىپ جىبەرۋىم كەرەك، ءبىزدىڭ تايلارىمىز اۆتوكولىكتەرمەن جارىسسىن. قولىنا سمارتفون ۇستاعان بالانىڭ بىلەگىندە سالاڭداپ قامشى ءجۇرسىن...
بۇل رەتتە فانتاستيكا مەن ەرتەگى جانرى العا شىعۋى كەرەك، بار ماسەلەنى بالالار ادەبيەتىمەن اينالىساتىن از عانا جازۋشىعا ىسىرىپ قويماي، ءاربىر قالامگەر وسى جانرلاردىڭ جاندانۋىنا اتسالىسۋى كەرەك. بۇگىن ەرتەگى وقيتىن ۇرپاق تاربيەلەي الماساق، ەرتەڭ ونىڭ زاردابىن تارتاتىن قالامگەردىڭ ءوزى. ونىڭ جازعان روماندارىن وقيتىن ادام بولماي قالادى ءارى-بەرىدەن كەيىن. سوندىقتان مەملەكەتتىڭ ارالاسۋىن كۇتپەي-اق، جازۋشىلار وداعى باس بولىپ، ءبىر جىلدى «بالالار ادەبيەتى جىلى» دەپ جاريالاسا... دەمەۋشىلەر تاۋىپ، قالاماقىسىن بەلگىلەپ، بارلىق اقىن-جازۋشىعا سالماق سالسا، كوزى ءتىرى كلاسسيكتەرگە دەيىن ءبىر-ءبىر دۇنيەنى دومالاتىپ تاستار ەدى. ال زامان تالابىنا ساي دۇنيەنى بەزەندىرىپ كىتاپ قىلۋ - باسپاگەرلەردىڭ، ودان مۋلتفيلم شىعارۋ - انيماتورلاردىڭ مىندەتى.
اڭگىمەلەسكەن گۇلزينا بەكتاس
«ايقىن گازەتى»
