سالەم، جەمقورلار
نە دەگەن باقىتتى ەلمىز! ءۇشىنشى عارىشكەرىمىز ايدىن ايىمبەتوۆ كۇنى كەشە عارىشقا ۇشتى ەمەس پە؟ عارىشتا ءجۇرىپ، جەرگە، تالعات مۇسابايەۆقا تەلەفون سوقتى عوي! بۇل شىندىق ەندى. ال وتىرىك بولسا دا، استارىندا شىندىعى بار اڭگىمەنى باستاپ كەپ جىبەرەيىن. اسپاندا جۇرگەن اسىل ازاماتىمىز ايدىن ايىمبەتوۆ جەردەگى جەمقورلارعا ۇيالى تەلەفونمەن حابارلاسسا، ءيا؟ قىزىق بولار ەدى. ماسەلەن، ءبىر جەمقور كابينەتىندە كەرىلىپ وتىر ەدى، تەلەفونى قويانشىق سياقتى شىرىلداي جونەلسە.. .
- الوۋ؟
- ءبالاۋ، ءبارىن كورىپ قويدىم!
- نەنى؟
- جەپ جاتقانىڭىزدى. پارا العانىڭىزدى.. .
- قايدان؟
- عارىشتان.
- «كاك» عارىشتان؟
- مەن ايدىنمىن عوي، عارىشقا ۇشقان. جەردەگى جەمقورلارعا جالىندى سالەم!
- ويباي.. .
مىنە، وسىلاي بولسا، ءا؟ جەمقورلار جەر بولار ما ەدى؟ ءاي، قايدام، ءبىز ءوزى ماقتانشاقتاۋ حالىقپىز عوي، دەرەۋ دوسىنا بارىپ، اڭگىمەنىڭ اۋانىن تۇرلەندىرىپ جىبەرەتىن شىعار؟
- دوسىم- اۋ، قىزىق بولدى!
- ايتساڭشى، قانداي قىزىق؟
- قىزىق بولعاندا، عارىشتان عارىشكەرىمىز ايدىن مىرزا تەلەفون سوقتى!
- قويشى؟
- ءيا، «ليچنو» وزىمە!
- ارالاس- قۇرالاسىڭ بار ما ەدى؟
- جوعا. ءبىراق ايتتى، «ءوزىڭدى سىرتتاي تانيتىن ەدىم، تۋعان كۇنىڭ قۇتتى بولسىن!» دەدى..
- مىناۋ كەرەمەت قوي!
- «قىزمەتىڭ وسە بەرسىن، دۇشپاندارىڭ كوشە بەرسىن» دەدى عوي!
- ءماسساعان! كەرەمەت! تاعى نە دەدى؟
- ءسىز قازىر دالاعا شىقتىڭىز.. .توبەڭىز تاز ەكەن عوي، ءبارىن كورىپ تۇرمىن دەگەنى.. .
- ويباي؟
- اسپانعا الاقتاپ قارادىم. دىم جوق.
- عارىشتان اپپاراتتار ارقىلى كورىپ تۇرعان عوي! تاعى نە دەدى؟
- «ەدينيتساسى» ءبىتىپ قالدى- اۋ دەيمىن. «ايدىن ۆنە زونە.. » دەگەن حابارلامانى وقىدىم.. .
قيال شىركىندى قايشىمەن «قىرقىپ» تاستاماساڭىز، وسىلاي كەتە بەرەدى. ال جەردەگى جىبىرلاعان جەمقورلاردىڭ ىشىندە شىمكەنتتىك جەمقورلاردىڭ ءبىر- ەكەۋىن اتايىن. شىمكەنت قالاسى ءال- فارابي اۋدانى بويىنشا مەملەكەتتىك كىرىستەر باسقارماسىنىڭ زاڭ جانە سالىق زاڭناماسىن ءتۇسىندىرۋ ءبولىمىنىڭ باس مامانى ر. ادەتبەكوۆ جامان ادەتكە سالىپ ا. دەگەن ازاماتتان 56 مىڭ تەڭگە پارا الدى دەگەن كۇدىكپەن ۇستالدى.
ول ا. دەگەن ازاماتتىڭ مەملەكەت بيۋدجەتىنە بۇرىن تولەنگەن 113 مىڭ 400 تەڭگە ايىپپۇلدى كەرى قايتارىپ بەرۋگە ىقپال جاسايمىن دەپ، بۇل قىزمەتىنە اتالعان سومانىڭ تەڭ جارتىسىن سۇراپ قويماپتى! ال د. يسايەۆ سوت ساراپتاما ينستيتۋتىنىڭ ساراپشىسى لاۋازىمىن اتقارا ءجۇرىپ، جۇمىس بابىن كەرەمەت پايدالانىپ، اسا ءىرى كولەمدە سالماعى 435,84 گرامم گەروين زاتىن جىمقىرىپ، زاڭسىز يەمدەنىپ ساقتاعان. ءسويتىپ، د. يسايەۆ ءوزىنىڭ ا. ەسىمدى سىنىپتاسىنا گەروين زاتى بار ەكەندىگىن ايتىپ، ساتىپ الۋشى ادام تاۋىپ بەرۋىن، اۆتوكولىككە ايىرباستايتىنىن سىبىرلاپ ايتقان. ال سىنىپتاسى ناعىز ازامات ەكەن، ۇستاتىپ جىبەردى! مىنە، جەردەگى جەمقورلاردىڭ سيقى وسىنداي! سالەم، جەمقورلار!
مۇحتار شەرىم،
شىمكەنت قالاسى
«ايقىن»
