ا ق ش- تا سوتتالعان ءتاجاياقوۆ پەن قادىربايەۆتى ەلگە قايتارۋعا مۇمكىندىك پايدا بولدى

كونۆەنتسياعا سايكەس، ءبىر قاتىسۋشى مەملەكەتتە ەكىنشى قاتىسۋشى مەملەكەتتىڭ ازاماتىنا قاتىستى شىعارىلعان ۇكىمدى سوتتالعان ادام ءوزى ازاماتى بولىپ تابىلاتىن مەملەكەتتە وتەي الاتىن مۇمكىندىكتەر قاراستىرىلادى. بۇل رەتتە سوتتالعان ادامدى ءبىر مەملەكەتتەن ەكىنشى مەملەكەتكە بەرۋ ۇكىم شىعارعان مەملەكەتتىڭ سۇراۋ سالۋى، قابىلداۋشى مەملەكەتتىڭ سۇراۋ سالۋى نەمەسە سوتتالعان ازاماتتىڭ ءوزىنىڭ سۇراۋ سالۋى نەگىزىندە جۇرگىزىلەدى. بۇل رەتتە سوتتالعانداردى بەرۋ تۋرالى سۇراۋ سالۋدى ورتالىق ورگاندار قاراۋعا ءتيىس نەمەسە ونداي ورگاندار بولماعان كەزدە كونسۋلدىق، ديپلوماتيالىق ارنالار ارقىلى قارالۋعا ءتيىس.

«قازاقستان امەريكا ەلدەرىنىڭ كوپجاقتى كونۆەنتسيالارىنا قوسىلا باستادى، وتكەن جولى وسىنداي قىلمىستىق قۋدالاۋ سالاسىنداعى ءبىر كونۆەنتسيانى سەنات قابىلداعان بولاتىن. بۇگىنگى كونۆەنتسيا - سوتتالعانداردى بەرۋ تۋرالى قۇجات. ونىڭ ماقساتى - امەريكا ەلدەرىندە سوتتالعان ازاماتتارىمىزدى قايتارىپ، قالعان جازانى ەلىمىزدە وتەۋگە مۇمكىندىك بەرۋ»، - دەدى باس پروكۋرور ورىنباسارى جاقىپ اسانوۆ.

ونىڭ ايتۋىنشا، سوتتالعانداردى ەلىمىزگە اكەلۋ ءۇشىن ءبىرقاتار تالاپتار بولۋى شارت. اتاپ ايتقاندا، بىرىنشىدەن، سوتتالعاننىڭ ءوزى سونى قالاۋى قاجەت. ەكىنشىدەن، قازاقستاننىڭ دا، ا ق ش- تىڭ دا ءتيىستى ورگاندارىنىڭ كەلىسىمى كەرەك. بۇدان بولەك، سوت ۇكىمى ءولىم جازاسىنا قاتىستى بولماۋى قاجەت جانە قالعان جازانىڭ مەرزىمى كەمىندە التى اي بولۋى شارت. بۇدان كەيىن، ا ق ش سوتتالعان قازاقستان ازاماتىن بەرۋگە دايىن بولسا، وندا قازاقستاننىڭ سوتى ەلىمىزدىڭ قىلمىستىق كودەكسىنە سايكەس جازانى تاعايىندايدى. ول جازا امەريكالىق سوتتىڭ جازاسىنان اۋىر بولماۋى كەرەك. امەريكا جاعى قازاقستان سوتىنىڭ شەشىمىنە قاناعاتتانسا، وندا سوتتالعاندى قازاقستانعا بەرە الادى.

تۇيىندەي ايتقاندا، امەريكاارالىق كونۆەنتسياعا قوسىلسا، بۇعان دەيىن ا ق ش- تا سوتتالعان ازامات ءتاجاياقوۆ پەن دياس قادىربايەۆتى ەلگە قايتارۋعا قۇقىقتىق مۇمكىندىك پايدا بولادى. «ول ءۇشىن سوتتالعاننىڭ ءوزىنىڭ جانە تاراپتاردىڭ كەلىسىمى قاجەت. بۇگىنگى كۇنى قادىربايەۆتىڭ اناسىنان ءوتىنىش ءتۇستى. باس پروكۋراتۋرا ونى ەكى اي بۇرىن ا ق ش- تىڭ ادىلەت دەپارتامەنتىنە جولدادى. ەكى ەل اراسىندا قاجەتتى كەلىسىم بولماعاندىقتان، ول ءوتىنىش قارالماۋى دا مۇمكىن. ال بۇل كونۆەنتسيانىڭ كۇشى امەريكا مەملەكەتتەرى ۇيىمىنىڭ باس حاتشىسىنا راتيفيكاتسيالاۋ گراموتاسىن تاپسىرعاننان كەيىن وتىزىنشى كۇنى قازاقستانعا تاراي باستايدى. تەك سودان كەيىن عانا اقش ءبىزدىڭ وتىنىشتەرىمىزدى قاراۋعا مىندەتتى بولادى»، - دەدى باس پروكۋرور ورىنباسارى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى