ن. نازاربايەۆ جاڭا ەكونوميكالىق جاعدايلاردى ەسكەرىپ، يندۋستريالاندىرۋ جوسپارىن قايتا قاراۋدى تاپسىردى

اقوردانىڭ باسپا ءسوز قىزمەتى حابارلاعانداي، كەڭەستە ينۆەستيتسيالار جانە دامۋ ءمينيسترى ءا. يسەكەشوۆ، «قازمۇنايگاز» ۇ ك» ا ق باسقارماسىنىڭ ءتوراعاسى س. مىڭبايەۆ، «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ا. مىرزاحمەتوۆ بايانداما جاسادى.

شارا بارىسىندا مەملەكەت باسشىسى قازاقستانداعى ونەركاسىپتىك ونىمدەردىڭ جارتىسى ەلدىڭ باتىس وڭىرىندەگى ءتورت وبلىستا وندىرىلەتىنىن اتاپ ءوتتى.

«بۇل وبلىستاردىڭ دامۋىنىڭ بۇكىل ەكونوميكامىز ءۇشىن ماڭىزى زور. جەر اۋماعىنىڭ ۇلكەندىگىنە بايلانىستى ەلدىڭ ءار ءوڭىرىنىڭ وزىندىك ەرەكشەلىگى بار. باتىس مۇناي وندىرۋگە جانە وڭدەۋگە ماماندانعان. سوعان بايلانىستى ءبىز ناق وسى سالانىڭ دامۋىنا مول ينۆەستيتسيا سالىپ جاتىرمىز»، - دەدى قازاقستان پرەزيدەنتى.

بۇل ورايدا نۇرسۇلتان نازاربايەۆ وڭىردە ينفراقۇرىلىمدىق قۇرىلىس اۋقىمىن كەڭەيتۋ قاجەتتىگىنە توقتالدى.

«جاڭا ەكونوميكالىق احۋال ءبىزدىڭ يندۋستريالىق باعدارىمىزدىڭ دۇرىستىعىن تاعى كورسەتتى. سول سەبەپتى مەن بۇگىن كابەل وندىرەتىن جانە مۇناي سالاسىنا ارنالعان اۋىر جابدىقتار شىعاراتىن ەكى زاۋىتتى بارىپ كوردىم، بۇلار - ماڭىزدى ءارى قاجەتتى نىساندار»، - دەدى مەملەكەت باسشىسى.

قازاقستان پرەزيدەنتى اكىمدەردىڭ نازارىن مۇناي- گاز سالاسىنىڭ اينالاسىندا شاعىن جانە ورتا بيزنەستى دامىتۋ قاجەتتىگىنە اۋداردى.

«اتىراۋ وبلىسىندا شاعىن جانە ورتا بيزنەس ۇلەسى 8 پايىزعا، ماڭعىستاۋ جانە اقتوبە وبلىستارىندا 17 پايىزعا تەڭ. ءبىراق اتالعان مۇنايلى وڭىردە شىعارىلاتىن ءونىم كولەمىن ۇلعايتۋعا دەن قويعان ءجون. سونىڭ ەسەبىنەن جۇمىس ورىندارى اشىلادى»، - دەدى نۇرسۇلتان نازاربايەۆ.

 ەلباسى ءوندىرۋشى كاسىپورىنداردىڭ قاجەتتىلىكتەرىن قامتاماسىز ەتۋ ءۇشىن يندۋستريالىق ايماق قۇرۋ ماسەلەسىن قوزعادى.

«مىسال رەتىندە شيەۆرون كومپانياسىن ايتۋعا بولادى، ونىڭ جۇمىسىن ارماتۋرا جانە قۇبىر شىعاراتىن زاۋىتتار قامتاماسىز ەتەدى، سايكەسىنشە ءوڭىردىڭ الەۋمەتتىك دامۋىنا قاجەتتى قاراجات تۇسۋدە»، - دەدى مەملەكەت باسشىسى.

نۇرسۇلتان نازاربايەۆ سونداي- اق يندۋستريالاندىرۋ جانە ينفراقۇرىلىمدار قۇرىلىسى جونىندەگى جوسپارلاردى جاڭا ەكونوميكالىق جاعدايدى ەسكەرە وتىرىپ قايتا قاراۋدى تاپسىردى.

«داعدارىس كەزىندە تۇراقتى جۇمىس ورىندارىنىڭ سانى قىسقارادى، بۇل بۇكىل الەمگە ءتان وزەكتى ماسەلە. «نۇرلى جول» باعدارلاماسىن ءار وڭىردە ءىرى وندىرىستەن قىسقارىپ قالعاندار ءۇشىن جۇمىس ورىندارىن اشۋعا بەيىمدەۋ كەرەك دەپ ويلايمىن. ءبىز مۇنداي تاجىريبەنى 2008-2009 -جىلدارداعى داعدارىس كەزىندە قولدانعانبىز»، - دەدى قازاقستان پرەزيدەنتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى