قازاقستاندا سال اۋرۋىنا قارسى قۇرىلعى جاسالدى
بۇل - سال اۋرۋىنا شالدىققان بالالار ءۇشىن تاپتىرماس قۇرىلعى.
ءوندىرىس جولعا قويىلعانىنا نەبارى 1 اي عانا ۋاقىت بولعان. الايدا وسى مەرزىم ىشىندە «جارايسىڭ» دەگەن اتاۋمەن قۇراستىرىلىپ جاتقان ۆەرتيكاليزاتور استاناداعى №1 بالالار اۋرۋحاناسىنا تەگىن بەرىلىپ كەلگەن. تۋعاننان ناۋقاس ءتورت جاستاعى ايشا بىرەۋدىڭ كومەگىنسىز اياققا تۇرا المايدى. ءبىراق دارىگەرلەر ءبىر جىلدان سوڭ ايشا ءوز اياعىن نىق باساتىنىنا كۇمان كەلتىرمەيدى. قازىردە ول جالپى ەمنەن بولەك مىنا قۇرىلعىدا جاتتىعادى.
ەلەنا كۋچەرەنكو، №1 قالالىق بالالار اۋرۋحاناسىنىڭ دارىگەرى:
- گيمناستيكادان كەيىن ءبىز ناۋقاس بالالاردى قۇرىلعىعا وتىرعىزامىز. ونداعى ماقساتىمىز - ناۋقاس بالالاردىڭ بۋىن بۇلشىق ەتىن قالىپتاستىرۋ. جاتتىعۋدى قايتالعان سايىن بالانىڭ ميى سول قالىپتى كۇيدى ساقتاپ قالادى. كەيىننەن، ارينە، ءجۇرىپ كەتۋىنە دە زور ىقپال ەتەدى.
قازىردە اۋرۋحانادا ەم قابىلداپ جاتقان 10 شاقتى بالا بار. «ەگەر ۆەرتەكاليزاتوردى ءتيىمدى پايدالانسا، ءۇش جىلدان كەيىن ولاردىڭ كوبى ساۋىعىپ كەتەدى»، - دەيدى دارىگەرلەر. ال بۇل - سول قۇرىلعى قۇراستىرىلىپ جاتقان سەح. ءوندىرىستى ءوز كۇشىمەن اشقان - بانۋ ىسقاقوۆا. ازىرگە شاعىن كاسىبىندە ءتورت ادام جۇمىس ىستەيدى. ۆەرتەكاليزاتوردىڭ قىر- سىرىن رەسەيدە وقىپ كەلگەن ولار وسى ۋاقىتقا دەيىن 10 شاقتى جاتتىعۋ قۇرالىن جاساعان. ولاردىڭ بارلىعىن بانۋ قالالىق اۋرۋحاناعا تەگىن ۇلەستىرىپتى.
بانۋ ىسقاقوۆا، «جارايسىڭ» ج ش س ديرەكتورى:
- ءبىز ءبىر جىلداي دايىندالدىق. قازىر سەحتان 6 ءتۇرلى قۇرىلعى شىعادى. بولاشاقتا ونىڭ سانىن 16-عا دەيىن جەتكىزسەك دەپ وتىرمىز.
بۇعان دەيىن وسىنداي قۇرالدى تەك شەتەلدەن قىمباتقا اكەلەتىن اتا- انالار ءۇشىن بۇل، ارينە، قۋانىشتى جاڭالىق. قازاقستاندا جاسالعاندىقتان ەمدىك اپاراتتىڭ قۇنى بىرنەشە ەسە ارزان بولارى ءسوزسىز.
