قۇرىلىس كومپانيالارى دوللاردان باس تارتتى
«قازاقستان قۇرىلىس سالۋشىلار قاۋىمداستىعى» تۇرعىن ءۇي قۇرىلىسىن دەدوللاريزاتسيالاۋ ساياساتىن قابىلدادى. بۇل تۋرالى كەشە رەسمي حابارلاندى.
اتالعان قاۋىمداستىق كەڭەسى وتىرىسىنىڭ قورىتىندىسىندا شارشى مەترلەر باعاسىن دوللارمەن ەسەپتەۋ تاجىريبەسىنەن باس تارتۋ تۋرالى شەشىم شىعارىلعان.
وسى شەشىمگە سايكەس، سالالىق قاۋىمداستىق مۇشەلەرى جىلجىمالى مۇلىكتىڭ قۇرىلىسى جانە ساتىلۋى بارىسىندا دوللاردى تولەم قۇرالى نەمەسە ونىڭ بالاماسى رەتىندە پايدالانۋدان باس تارتۋعا نيەتتى.
ءبىر ايتا كەتەر جايت، اتالعان ۇيىم قۇرامىنا قازاقستاننىڭ 14 الپاۋىت ينۆەستيتسيالىق قۇرىلىس جانە حولدينگتىك كومپانيالارى كىرەدى. دەگەنمەن ەلىمىزدىڭ ءاربىر وڭىرلەرىندە باسقا دا قۇرىلىس كومپانيالارى جەتەرلىك. ولار بۇل ساياساتتى ۇستانا ما؟
- ەندى قاۋىمداستىققا كىرەتىن قۇرىلىس كومپانيالارى جاڭا تۇرعىن ۇيلەردىڭ باعالارىن تەك ۇلتتىق ۆاليۋتادا عانا بەلگىلەيدى! - دەپ ءتۇسىندىردى قاۋىمداستىق كەڭەسىنىڭ ءتوراعاسى ايدىن راقىمبايەۆ. - وسى ساياسات نارىقتىڭ باسقا دا قاتىسۋشىلارىنان تالاپ ەتىلەدى. قاۋىمداستىق قۇرىلىس ماتەريالدارى مەن قىزمەتتەرىن جەتكىزۋشىلەرمەن قارىم- قاتىناستارىن دا قايتا قاراۋدى جوسپارلاپ وتىر. ءبىز ولاردى ءوزارا ەسەپ ايىرىسۋدا ۇلتتىق ۆاليۋتاعا باسىمدىق بەرۋگە يتەرمەلەيمىز.
ساراپشىلاردىڭ ايتۋىنشا، ساۋلەت، ينجەنەرلىك جانە باسقا دا ءبىرقاتار جۇمىستار مەن قىزمەتتەردى نەگىزىنەن، شەتەلدىكتەر ورىندايتىندىقتان، بۇل سالۋشى شىعىنىنىڭ ارتۋىنا سوقتىرۋى مۇمكىن. ويتكەنى دوللار بولسا، «باسقا شاۋىپ، توسكە ورلەۋدە» .
«قۇرىلىس ماتەريالدارى مەن قىزمەتتەرىن جەتكىزۋشىلەردى تاڭ-
داۋدا باعاسى دوللارعا قۇرىلماعان جانە بارىنشا قازاقستاندىق مازمۇنعا يە كومپانيالارعا ارتىقشىلىق، باسىمدىق بەرىلەتىن بولادى» دەپ سەندىرەدى ا. راقىمبايەۆ.
ول قازاقستاننىڭ جاڭا نەسيەلىك- قارجىلىق ساياساتقا كوشۋى جانە تەڭگەنىڭ ەركىن باعامىنىڭ ەنگىزىلۋى ءوز كەزەگىندە جاڭا تۇرعىزىلاتىن تۇرعىن ۇيلەردىڭ قۇنىن قىمباتتاتىپ جىبەرگەنىن جاسىرمادى: تامىزدا، شىلدە ايىمەن سالىستىرعاندا، 4,5 پايىزعا ءوسىپتى. ءبىراق ەكسپەرتتەردىڭ ايتۋىنشا، بۇل «كوپىرشىك» شەتسىز- شەكسىز وسە المايدى، ءبىر كۇنى جارىلادى. ويتكەنى داعدارىس كۇشەيگەن سايىن ەلدىڭ ساتىپ الۋ قابىلەتى تومەندەيدى. دەمەك، قۇرىلىس كومپانيالارىنا كۇندەردىڭ ءبىر كۇنىندە جاڭا اكتسيا- ناۋقاندارعا بارىپ، ءوز باسپانالارىنا ۇلكەن جەڭىلدىكتەر جاريالاۋىنا تۋرا كەلمەك.
ەلدوس سەنباي
«ايقىن»
