الماتىدا «توقال» فيلمىنىڭ ءتۇسىرىلىمى اياقتالدى
ءتۇسىرىلىم تامىز جانە قىركۇيەك ايلارىندا الماتىدا جانە لوس- انجەلەستە ءوتتى. كارتينانىڭ نە جايىندا ەكەنى اتىندا تۇر. «توقال» الەۋمەتتىك دراماسىندا وتباسىلىق قۇندىلىقتار، اۋلەت قارىم- قاتىناستارى تۋرالى ماسەلە كوتەرىلەدى. فيلمنىڭ پروديۋسەرى ءارى باستى رولدەردىڭ ءبىرىن سومداعان گاۋھار نۇرتاستىڭ مالىمدەۋىنشە، ونىڭ لەنتاسى قازاقستان ءۇشىن عانا ەمەس، ءبىرقاتار ەلدە وزەكتى بولىپ وتىرعان پروبلەما جونىندە سىر شەرتەدى.
«توقال دەگەنىمىز كىم - التىن توردا وتىرعان ادەمى قۇس پا، ادام با، وعان كوپ نارسە بايلانىستى. جاعدايى جاقسى ەر ادامدار وپاسىزدىقتارىن زاڭداستىرۋعا نەلىكتەن تالپىنادى؟ وتباسىن ساقتاپ قالۋ ءۇشىن ول ەر ادامنىڭ ايەلى نە ىستەۋى كەرەك؟ رەجيسسەر ەۆگەني چەلتسوۆپەن بىرگە وسى درامالىق جاعدايعا قاتىستى ءوز كوزقاراسىمىزدى كورسەتتىك. كينودا بۇل تاقىرىپتى قوزعاۋعا بولمايدى دەگەندى كوپ ەستىدىم، سەبەبى ول ەلدىڭ يميدجىنە كەرى اسەر ەتۋى مۇمكىن. ءبىراق مەن 10 جىلدان اسا ۋاقىتتان بەرى گولليۆۋدتا جۇمىس ىستەپ ءجۇرمىن جانە مىقتى كارتينا ءۇشىن وتكىر تاقىرىپتىڭ كەرەك ەكەنىن بىلەمىن»، - دەدى گاۋھار نۇرتاس.
ۇزاققا سوزىلعان كاستينگتەردەن كەيىن باستى رولدەرگە گاۋھار نۇرتاستان بولەك جانەل ماقاجان مەن تۇڭعىشباي جامانقۇلوۆ بەكىتىلدى. باستاپقى كەزدە جەلىدە گولليۆۋدتىق اكتەر مارك داكاسوستىڭ قاتىسۋىمەن تۇسىرىلگەن تيزەر پايدا بولدى. الايدا كەيىن ەر ادامنىڭ باستى ءرولىن سومداۋدى قازاقستاندىق بەلگىلى اكتەر ەرىك جولجاقسىنوۆقا بەرۋ تۋرالى شەشىم قابىلداندى. «توقال» پروديۋسەرىنىڭ مالىمدەۋىنشە، ونى قازاقستاندىقتار عانا كورمەيدى، فيلمدى الەمدىك پروكاتقا شىعارۋ جوسپارلانىپ وتىر.
