استانادا «قاڭباق شال» اتتى ءبىرىنشى قازاق بالالار وپەراسىنىڭ پرەمەراسى وتەدى

ۇيىمداستىرۋشىلاردىڭ حابارلاۋىنشا، بالالار فيلارمونياسى بيىلعى جىلى ءبىرىنشى ماۋسىمىن استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ بازاسىندا، كونگرەسس حولل سارايىنىڭ ساحناسىندا وتەتىن بالالارعا ارنالعان «قاڭباق شال» وپەراسىمەن باستايدى.

قاڭباق شال - قازاق ەرتەگىلەرىنىڭ كەيىپكەرى. ونىڭ جەڭىل بولعانى سونشالىق، قويىنىنا تاس سالماسا، جەلمەن ۇشىرىلىپ كەتەتىن. سوندىقتان بارلىعى ونى قاڭباق شال دەپ اتاپ كەتكەن. ءبىراق قاڭباق شال ناعىز كۇش بىلەكتە ەمەس، بىلىمدە دەپ ەسەپتەدى. ونى داۋلەر مەن وتىرىكشى تۇلكىنى جەڭىپ دالەلدەگەن.

كەيبىرەۋلەر قاڭباق شالدى انالارى وقىعان ەرتەگىلەر بويىنشا ەستە ساقتاسا، باسقالارى بۇل كەيىپكەر ويناعان قۋىرشاق سپەكتاكلدەرىن تاماشالاعان، تاعى بىرەۋلەرى رەجيسسەر ا. ءابىلقاسىموۆتىڭ ءمۋلتفيلمىن كوردى. ال 1979 -جىلى كومپوزيتور جولان داستەنوۆ بۇل سيۋجەتكە 1980 -جىلدارى الماتىداعى اباي اتىنداعى وپەرا جانە بالەت تەاترىنىڭ ساحناسىندا تابىستى كورسەتىلگەن ءبىرىنشى قازاق بالالار وپەراسىن جازدى.

جولان (جولدىباي) داستەنوۆ (1943-1991) - قازاق مادەنيەتىنىڭ تانىمال قايراتكەرى. ونىڭ شىعارمالارىنىڭ اراسىندا «مامايەۆ قورعانىندا» وركەستر ءۇشىن پوەما (1969)، ۆيولونچەل ءۇشىن وركەسترمەن كونسەرت (1970)، كامەرالىق وركەسترگە ارنالعان «تاۋدا» سيۋيتاسى (1972)، «ابايدى ەسكە الۋ» اسپاپتىق تريوسى (1972)، بالەت سيۋيتاسى (1973) جانە ت. ب. بار.

ونىڭ مۋزىكاسى - حالىق شىعارماشىلىعىن اكادەميالىق داستۇردە فيلوسوفيالىق ۇعىنۋ. جولان 4 جاسىنان باستاپ دومبىرادا ويناعان، قازاق فولكلورى وعان كىشكەنتاي كەزىنەن تانىس بولدى. ونىڭ مۋزىكاسىندا وزگە دە شىعىس مادەنيەتتەرى - ۇيعىر، تاجىك، وزبەك سارىندارى دا بار.

كومپوزيتورلىق جانە پەداگوگيكالىق جۇمىستان باسقا، جولان داستەنوۆ الماتىداعى رەسپۋبليكالىق تەلەديدار ستۋدياسىنداعى مۋزىكالىق باعدارلامالار رەداكتورى، قازاق فيلارمونياسىنىڭ لەكتورى بولىپ، مۋزىكا تۋرالى 400 دەن استام ءدارىس وقىعان.

وپەرا قازاق تىلىندە ورىندالادى، كورسەتىلىمدەرگە بالالار فيلارمونياسىنىڭ كىشكەنتاي ارتىستەرى قاتىسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى