قازاقستان مەن ا ق ش جەمقورلىققا قارسى كۇش بىرىكتىرمەك
بۇل تۋرالى ا ق ش- تا رەسمي ساپارمەن جۇرگەن ەلىمىزدىڭ مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى اليك شپەكبايەۆ مالىمدەدى.
ۆاشينگتوندا ۆەدومستۆو باسشىسى فەدەرالدى تەرگەۋ بيۋروسى جانە ادىلەت مينيسترلىگىنىڭ ءبىرقاتار لاۋازىمدى تۇلعالارىمەن كەزدەستى. اليك شپەكبايەۆ امەريكالىقتارعا قازاقستان ۇكىمەتىنىڭ جەمقورلىقپەن كۇرەس جولىندا اتقارىپ جاتقان جۇمىستارى جايىندا جان- جاقتى بايانداپ بەردى.
ال «World Justice Project» ۇيىمىنىڭ باس ديرەكتورى الەحادرو پونسپەن بولعان كەزدەسۋدە تاراپتار قازاقستان پرەزيدەنتىنىڭ جارلىعىمەن ازىرلەنگەن «2015-2025 - جىلدارعا ارنالعان جەمقورلىققا قارسى ستراتەگيا» توڭىرەگىندە تالقىلاۋ جاسادى.
اليك شپەكبايەۆتىڭ ايتۋىنشا، قۇجاتتا مەمەكەتتىك قىزمەت، سوت، قۇقىق قورعاۋ ورگاندارىنداعى جەمقورلىقتى جويۋ، مەملەكەت پەن جەكە سەرىكتەستىكتەگى جەمقورلىققا توسقاۋىل قويۋ، قوعامدىق باقىلاۋ، شەت مەملەكەتتەرمەن ارىپتەستىكتى كۇشەيتۋ سياقتى نەگىزگى باعىتتارعا باسىمدىق بەرىلگەن.
الەحادرو پونس، World Justice Project ۇيىمىنىڭ باس ديرەكتورى:
- ءسىزدىڭ بۇعان دەيىن دە سينگاپۋر، كورەيا، گونكونگ سياقتى ەلدەردە بولىپ، تاجىريبەلەرىمەن بولىسكەن قادامىڭىز قۇپتارلىق ءىس. ناتيجەسىندە قازاقستاننىڭ دا از ۋاقىت ىشىندە جەمقورلىقپەن كۇرەس سالاسى بويىنشا مول شارۋا تىندىرا بىلگەنى قۋانتادى. الدا قولعا الىنعان رەفورمالاردىڭ جاقسى ناتيجە بەرەرىنە سەنىمدىمىز.
اليك شپەكبايەۆ، ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى:
- جالپى العاندا امەريكالىقتار ءبىز ۇسىنعان تانىستىرىلىمدارعا وڭ باعاسىن بەردى. ءتىپتى جەمقورلىقپەن كۇرەس جولىنداعى كەيبىر جەكەلەگەن باعىتتار بويىنشا العان اسەرلەرىن دە جاسىرمادى. ءبىز ارىپتەستەرىمىزگە وسى سالادا پايدا بولعان سىرتقى باقىلاۋ، جاريالىق اقپارات، جەمقورلىققا قارسى مادەنيەت سياقتى جاڭا ينستيتۋتتار جايىندا جەتكىزدىك.
