قازاقستان ءتورتىنشى مۇناي وڭدەۋ زاۋىتىنىڭ قۇرىلىسىنان باس تارتىپ وتىرعان جوق

 بۇل تۋرالى كەشە ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ەنەرگەتيكا ءمينيسترى ۆلاديمير شكولنيك ءمالىم ەتتى.

«بىزگە ءتورتىنشى مۇناي وڭدەۋ زاۋىتى قۇرىلىسى ماسەلەسىن قاراستىرىپ، ونى سالۋ تاپسىرماسى بەرىلگەن بولاتىن. قازىرگى كەزدە بۇل تاپسىرما بويىنشا ارنايى توپ جۇمىس ىستەۋدە. وسى باعىتتا تەحنيكالىق- ەكونوميكالىق نەگىزدەمەگە تەحنيكالىق تالاپتار قاراستىرىلۋدا. 2017-دەن 2022 - جىل ارالىعىندا ينديكاتورلار مەن ەلدىڭ ەكونوميكالىق دامۋى بويىنشا جوسپارلاردى ەسكەرە وتىرىپ، جاڭعىرتۋدان وتكەن ءۇش مۇناي وڭدەۋ زاۋىتتارىنان شىعارىلعان ءونىم ىشكى قاجەتتىلىكتى تولىقتاي قامتاماسىز ەتەدى»، - دەدى مينيستر.

ونىڭ سوزىنە قاراعاندا، 2022 - جىلدان كەيىن قازاقستاندا جاعارماي تاپشىلىعى تاعى دا تۋىنداۋى ىقتيمال. سەبەبى، حالىقتى سانى مەن ەكونوميكانىڭ ءوسىمى بولعاندىقتان، مۇناي ونىمدەرىن تۇتىنۋ دەڭگەيى دە ارتا تۇسەدى.

«سول كەزگە قاراي مۇناي وڭدەۋ زاۋىتى سالىنىپ بولۋى ءتيىس. ول جاڭعىرتۋدان وتكەن ءۇش زاۋىتتى تولىقتىرىپ، جاعارمايدىڭ قوسىمشا كولەمىن ءوندىرۋى قاجەت جانە بەنزيننىڭ ەكسپورتتىن جۇزەگە اسىرۋعا قاۋقارلى بولۋى كەرەك.   بۇل تۇرعىدا وسى ۇدەرىستىڭ ەكونوميكاسىن ءتۇسىنۋ دۇرىس بولار ەدى، سەبەبى زاۋىتتىڭ قۇرىلىسى قىمباتقا تۇسەتىن شارا»، - دەدى ۆ. شكولنيك.

ونىڭ ايتۋىنشا، قازىرگى زامانعى مۇناي وڭدەۋ زاۋىتىن سالۋعا 8-9 ميلليارد دوللار كولەمىندە قارجى جۇمسالادى.

 «وسى ماسەلەنى ءبىز قاراستىرىپ جاتىرمىز جانە وسىنداي زاۋىت ەلىمىزدە بولادى»، - دەدى مينيستر.

اۆتور :   رۋسلان    عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى