الماتىدا ق ر ۇ ق ك شەكارا قىزمەتى اكادەمياسىنىڭ كۋرسانتتارى وتان الدىندا انت قابىلدادى
كۇن سالقىن بولسا دا بۇگىنگى سالتاناتتى راسىمگە وتە كوپ اتا- انا جينالدى. ولاردىڭ ىشىندە قارتتار دا، ءتىپتى سابيلەرىن كوتەرىپ كەلگەندەر دە بولدى. شەكارا قىزمەتى اكادەمياسىنىڭ قاقپاسى اشىلا سالىسىمەن العا ۇمتىلعان ولار، ۇلدارىن جاقسىلاپ كورۋ ءۇشىن، ىڭعايلى ورىن ىزدەپ، ساپتىق الاڭنىڭ بىرەسە انا شەتىنە بىرەسە مىنا شەتىنە جۇگىرىپ شارق ۇرىپ جاتتى. تولقىپ، كوزدەرىنە جاس العاندار دا بولدى.
ادەتتەگىدەي، الاڭعا شەكارا قىزمەتى اكادەمياسىنىڭ جەكە قۇرامى مەن اسكەري وركەسترى ساپ تۇزەپ شىقتى. كەيىن الاڭعا سالتاناتتى تۇردە اتالمىش اسكەري جوعارى وقۋ ورنىنىڭ جاۋىنگەرلىك تۋى شىعارىلدى. بۇدان سوڭ، اتا- انالار مەن شەكارا قىزمەتى ارداگەرلەرىنىڭ قۇرمەتىنە مەرەكەلىك باعدارلاما قويىلدى. ەڭ الدىمەن شەكارا قىزمەتىنىڭ موتو- مانيەۆرلىك دەسانتتىق شابۋىلداۋشى «بوران» توبىنىڭ اسكەري قىزمەتشىلەرى اۆتوماتتان وق جاۋدىرا وتىرىپ، قويان- قولتىق ۇرىس جۇرگىزۋدىڭ نەشە ءتۇرلى ۇتىمدى ادىستەرىن كورسەتتى. قۇلاق تۇندىرعان اتىستان كەيىن، ونەرپاز كۋرسانتتار تامىلجىتىپ ءان شىرقادى. ارتىنشا، الاڭعا ساپ تۇزەپ شىققان ءبىرىنشى كۋرس كۋرسانتتارى الدىندا ءسوز سويلەگەن شەكارا قىزمەتى اكادەمياسىنىڭ باستىعى، پولكوۆنيك پاۆەل پوليۆانوۆ جاس وتان قورعاۋشىلارعا اسكەري انتتىڭ ماڭىزدىلىعىن ۇعىندىردى.
«اسكەري قىزمەتكە كەلگەن قازاقستاننىڭ ءاربىر ازاماتى وتان الدىندا اسكەري انت قابىلدايدى. بۇل كونەدەن كەلە جاتقان اسكەري ءداستۇر. ەل باسىنا كۇن تۋعاندا اتا- بابالارىمىز ءوز حالقىنىڭ باتىر قورعاۋشىلارى بولۋعا انت ەتەتىن بولعان. بۇگىنگى ساپتا تۇرعان ءبىرىنشى كۋرس كۋرسانتتارى الدىندا تۇرعان باستى مىندەت ول، اعا ۇرپاقتىڭ قالدىرىپ كەتكەن باي مۇراسىن ساقتاپ قالۋ. اسكەري انتقا جانە بورىشقا ادال بولۋ، سونداي- اق اسكەري نامىستى، ابىرويدى ساقتاۋ»، - دەدى پولكوۆنيك پ. پوليۆانوۆ.
سونىمەن قاتار ول، قازىر الەمدە بولىپ جاتقان ءار ءتۇرلى كۇردەلى جاعدايلارداردىڭ وتان قورعاۋشىلار الدىنا جاڭا تالاپتار قوياتىندىعىن جەتكىزدى. «تەك ورتالىق ازيا عانا ەمەس، بۇكىل الەمدە بولىپ جاتقان ءار ءتۇرلى قارۋلى قاقتىعىستار، ساياسي جانە ءدىني ەكسترەميزمنىڭ تارالۋى ۇلتتىق قاۋىپسىزدىك ورگاندارىنا جاڭا تالاپتار قويادى. بۇل تالاپتاردى ورىنداۋ ءۇشىن ءارقايسىڭىز اسكەري ءبىلىمدى تولىققاندى مەڭگەرىپ، تارتىپتىلىكتىڭ ۇلگىسىن تانىتىپ، شەكاراشىلاردىڭ اسكەري داڭقىن قادىرلەپ، باعالاي بىلىڭىزدەر»، - دەدى پولكوۆنيك پ. پوليۆانوۆ.
بۇدان كەيىن، شەكارا قىزمەتى اكادەمياسىنىڭ باستىعى انت قابىلداۋعا بۇيرىق بەردى. اسكەري انت قابىلدانىپ بولعان سوڭ، پولكوۆنيك پ. پوليۆانوۆ كۋرسانتتاردى قۇتتىقتادى. سالتاناتتى ءراسىمنىڭ سوڭىندا ۇلتتىق ءانۇران ورىندالدى.
اۆتور: جاپپاربەرگەن ايبوتا
