امەريكانى مويىنداتقان قازاق بالاسى ميلليون دوللار تابۋدىڭ تۇك قيىن ەمەستىگىن ايتتى
بۇل تۋرالى زامانا باسىلىمىنا سىلتەمە جاساپ NUR. KZ حابارلايدى.
ول نەبارى 21 جاسىندا سان-فرانسيسكو قالاسىنىڭ (ا ق ش) «سيليكوندى القاپ» دەپ اتالاتىن اۋماعىنداعى «تۆيتتەر» كومپانياسىنا جۇمىسقا ورنالاسقان العاشقى قازاق بالاسى. ءوزى جاس، ءبىراق سوعان قاراماستان جۇمىس كەستەسى وتە تىعىز.
«مەن اتىراۋ قالاسىنىڭ تۋماسىمىن. وتباسىمىزدا انام مەن اعام بار. ياعني مەن ءۇيدىڭ كەنجەسىمىن. مەكتەپتە وقىپ جۇرگەن كەزىمدە حيميا پانىنەن وليمپيادالارعا قاتىسىپ، كىشىگىرىم جەتىستىكتەرگە قول جەتكىزىپ جۇرەتىنمىن. سودان 2008-جىلى الماتىداعى سۇلەيمەن دەميرەل اتىنداعى ۋنيۆەرسيتەتكە ينجەنەر-باعدارلاماشى ماماندىعى بويىنشا وقۋعا ءتۇستىم دە، ارادا ءبىراز ۋاقىت وتكەن سوڭ ماماندىق تاڭداۋدا قاتەلەسكەنىمدى ۇقتىم. ءسويتىپ «يۋتۋب» جەلىسى ارقىلى شەتەلدىك پروفەسسورلاردىڭ اقپاراتتىق تەحنولوگيا جونىندە جاساعان لەكسيالارىن تىڭداپ، وسى سالاعا دەن قويامىن دەپ شەشتىم. ءسويتىپ ۋنيۆەرسيتەتتىڭ 3- كۋرسىندا وقىپ جۇرگەندە ا ق ش- قا كەتتىم. بۇل مەنىڭ انام مەن باۋىرىمنان اجىراپ، العاش رەت جىراققا كەتۋىم ەدى. باستاپقىدا قاتتى قينالدىم. اعىلشىن ءتىلىن قانشا جەردەن جەتىك بىلەمىن دەگەنىممەن، ول جاقتا قيىندىقتارعا تاپ بولدىم. ءسىڭىسىپ كەتۋ ءۇشىن تاۋلىگىنە 14-15 ساعات جۇمىس ىستەۋىمە، ءبىلىمىمدى شىڭداۋىما تۋرا كەلدى»، - دەيدى ول.
مەن باعدارلامالاۋدىڭ ءبىر ءتىلىن ۇيرەنە باستادىم، ناتيجەسىندە وسى باعدارلامالاۋ ءتىلىن «تۆيتتەر» قولدانعان تىلگە اۋدارۋ مۇمكىندىگىن تاپتىم.
وسى رەتتە ول اناسىنا العىس ايتۋدى ۇمىتقان جوق. اسحاتتىڭ اناسى ماماندىقتى دۇرىس تاڭداۋىما بارىنشا جاعداي جاساپ، ۇلىنىڭ شەشىمدەرىن قولداپ وتىرعان.
«مەن باعدارلامالاۋدىڭ ءبىر ءتىلىن ۇيرەنە باستادىم، ناتيجەسىندە وسى باعدارلامالاۋ ءتىلىن «تۆيتتەر» قولدانعان تىلگە اۋدارۋ مۇمكىندىگىن تاپتىم. ءوزىمنىڭ تاپقان ءتاسىلىمدى اشىق تۇردە ينتەرنەتكە سالدىم دا، ولارعا مەنىڭ امالىمدى «اندرويد» جانە «ІOS» سمارتفون باعدارلامالارى ءۇشىن قولدانعان جاعدايدا قاجەتتى ناتيجەگە ەكى ەسە جىلدامىراق قول جەتكىزۋگە بولاتىنىن ايتىپ حات جازدىم.
ولار العاشىندا مەنىڭ ۇسىنىسىما سەنگەن جوق. ال 2011-جىلى ولار ماعان تاجىريبەدەن ءوتۋدى ۇسىندى. وسىلاي ءۇشىنشى كۋرستا وقىپ جۇرگەنىمدە «سيليكوندى القاپقا» جولىم ءتۇستى»، - دەيدى اسحات.
اسحات ول جاقتا «ماشينالاردى ماشىقتاندىرۋ، ىزدەۋ جانە رەلەۆانتتىلىق بولىمدە» جۇمىس ىستەيدى.
«مەن جەكە ءوزىم ىزدەۋدى جەتىلدىرۋمەن جانە ۇسىنىس جاساۋ جۇيەسىمەن اينالىستىم. بۇل جۇيە قولدانۋشىلارعا كەي ادامداردىڭ قىزىقتى جازبالارىن وقۋدى اۆتوماتتى تۇردە ۇسىنادى. ادەتتەگى قولدانۋشى ءۇشىن مۇنىڭ بارلىعى قاراپايىم نارسە بولىپ كورىنگەنىمەن وتە قيىن ەڭبەكپەن كەلەدى. «تۆيتتەر» جۇمىسىن جەتىلدىرۋ جولىندا ءبىز بۇعان دەيىن قولدانىلماعان شەشىمدەردى پايدالاندىق»، - دەيدى ول.
اسحات 2013-جىلى ءوز ەركىمەن جۇمىستان بوساپ، ديپلومدىق جۇمىس جازىپ، تىڭ يدەيالاردى جۇزەگە اسىرۋعا بەل بۋادى. ناتيجەسىندە ونىڭ ديپلومدىق جۇمىسىن «مايكروسوفت» كومپانياسى ساتىپ العان.
«تۆيتتەر» كومپانياسىندا مەنىڭ ءبىر كۋراتورىم بولدى. ول مەنىڭ ستەنفورد ۋنيۆەرسيتەتىنىڭ پروفەسسورلارىمەن تانىسۋىما جاعداي جاسادى. ءسويتىپ مەن ستەنفورد جانە بەركلي ۋنيۆەرسيتەتتەرىنىڭ بىرنەشە پروفەسسورلارىمەن تانىسىپ، تاجىريبەدەن ءوتتىم. ولاردىڭ اراسىندا نوبەل سىيلىعىنىڭ ماتەماتيكا سالاسىنداعى بالاماسى فيلدس جۇلدەسىنىڭ يەگەرى ەفيم زەلمان دەگەن كىسى دە بار ەدى. قىسقاسى، سول كىسىلەرمەن بىرگە ماتەماتيكالىق فورمۋلالار ارقىلى، ماسەلەن، ۇيالى تەلەفونمەن تۇسىرگەن قاراپايىم سۋرەتتەردىڭ 3D ۇلگىسىن جاسايتىن الگوريتم ويلاپ تاپتىق. مەنىڭ بۇل جاڭالىعىما «مايكروسوفت» قىزىعۋشىلىق تانىتقانىن ەستىدىم. ءسويتىپ ساتۋعا كەلىسىمىمدى بەردىم. بۇل شەشىمىمە ەش وكىنبەيمىن. مەن ويلاپ تاپقان كىشكەنتاي عانا الگوريتمدى بۇگىندە الەمنىڭ ميلليونداعان ادامدارى ءوز يگىلىگىنە پايدالانىپ جاتىر. سول ءۇشىن دە قۋانامىن»، - دەدى اسحات.
الايدا، اسحاتتىڭ قاتەرلى ىسىككە شالدىعۋى ونىڭ ومىرىندەگى ەڭ ۇلكەن سوققى بولدى.
«ۋنيۆەرسيتەتتە وقىپ جۇرگەنىمدە ماعان «راك» دەگەن دياگنوز قويدى. بۇل مەن ءۇشىن وتە اۋىر سوققى بولدى، ءتىپتى ول تۋرالى ايتقىم دا كەلمەيدى... مەنىڭشە، الەمدىك دەڭگەيدەگى پروبلەمالاردىڭ ءبىرى - قاتەرلى ىسىك اۋرۋى. ونىڭ سەبەبى مەن سالدارىن، ودان قۇتىلۋدىڭ جولدارىن ىزدەستىرۋ ءۇشىن عىلىمي جۇمىسپەن اينالىسسام با دەپ ويلاعان كەزدەرىم دە بولدى. سوندىقتان دا «باركلايس» بانكتەر توبىندا جارتى جىل جۇمىس ىستەپ تاپقان ەكى ميلليون دوللارىمدى حالىقارالىق قورعا اۋدارامىن دەپ شەشتىم. بۇل شەشىمىمە مۇلدەم وكىنبەيمىن. سەبەبى ميلليوندى ءبىر رەت تاپقان ادام ەكىنشى رەت تە تابا الادى. اقشا، دۇنيە دەگەن - قولدىڭ كىرى. ادام ودان دا ۇلكەن ماقساتتاردى الدىنا قويا ءبىلۋى كەرەك»، - دەيدى اسحات مىرزابايەۆ.
