بەيجىڭدە قازاقستان مەن قىتاي ترانس شەكارالىق وزەندەرىن پايدالانۋ جانە قورعاۋ ماسەلەلەرى تالقىلاندى
كەزدەسۋ بارىسىندا سۋ رەسۋرستارى سالاسىنداعى ىنتىماقتاستىقتى دامىتۋ جانە قازاقستان رەسپۋبليكاسى مەن قىتاي حالىق رەسپۋبليكاسى اراسىندا ترانس شەكارالىق وزەندەردە سۋ ءبولۋ كەلىسىمى جوباسىنا قاتىستى بىرلەسكەن جۇمىس ماسەلەلەر بويىنشا پىكىر الماسىلدى.
تاراپتار ترانس شەكارالىق وزەندەردى پايدالانۋ جانە قورعاۋ جونىندەگى قازاقستان-قىتاي بىرلەسكەن كوميسسياسىنىڭ جۇمىسىنا وڭ باعا بەردى. 2003-2015-جىلدارى كوميسسيانىڭ 12 ءماجىلىسى وتكىزىلىپ، ولاردىڭ قورىتىندىسى بويىنشا ماڭىزدى ۋاعدالاستىقتار مەن ناتيجەلەرگە قول جەتكىزىلدى.
2014-جىلى قۇرىلعان ساراپشىلاردىڭ ارنايى جۇمىس توبى اينالىساتىن ق ر مەن ق ح ر اراسىندا ترانس شەكارالىق وزەندەردەگى سۋ ءبولۋ كەلىسىمىنىڭ جوباسى بويىنشا بەلسەندى جۇمىس باستالدى. ساراپشىلاردىڭ ءبىرىنشى ءماجىلىسى 2015-جىلدىڭ ناۋرىزدا الماتىدا ءوتتى. 2015-جىلعى قىركۇيەكتە بەيجىڭ قالاسىندا كەلىسىم جوباسىن كەلىسۋ بويىنشا ساراپشىلاردىڭ ەكىنشى ءماجىلىسىن وتكىزۋ تۋرالى ۋاعدالاستىققا قول جەتكىزىلدى.
ش. نۇرىشيەۆ قازاقستان-قىتاي ترانس شەكارالىق وزەندەر ماسەلەلەرى بويىنشا بىرلەسكەن جۇمىستىڭ باس ماقساتى ەكى مەملەكەت باسشىلارى اراسىنداعى ۋاعدالاستىقتاردى ىسكە اسىرۋ بولىپ تابىلاتىندىعىن ايتقان ەلشى «بۇل ماسەلەلەر ەرەكشە باقىلاۋعا الىنىپ، جانە جوعارعى دەڭگەيدەگى كەزدەسۋلەر بارىسىندا ۇنەمى تالقىلانىپ تۇرادى» دەدى.
جياو يۋن قىتايلىق تاراپ ەكى ەل اراسىنداعى كوپجاقتى ستراتەگيالىق ارىپتەستىك قارىم-قاتىناستارى شەڭبەرىندە قازاقستانمەن بۇل باعىتتا ىقپالداستىقتى نىعايتۋعا دايىن ەكەنىن مالىمدەدى.
Baq.kz
