قازاقستاندىقتار ارزان كولىك الۋ ءۇشىن رەسەيگە اعىلا باستادى
تەلەارنا مالىمەتىنشە، رۋبلدىڭ قۇنسىزدانۋى اسىرەسە ورالدىقتار ءۇشىن وڭتايلى بولىپ وتىر. رەسەي ۆاليۋتاسى ارزانداعان سوڭعى ءبىر اپتا كولەمىندە باعاسى قولجەتىمدى كولىك الۋ ءۇشىن كورشى مەملەكەتكە اعىلعان تۇرعىندار كوبەيدى.
سىرتتان جەتكىزىلگەن كولىكتەردى ەسەپكە الىپ، قۇجاتىن رەتتەيتىن مامانداردىڭ دەرەگىنشە، قازىر ورالدا كۇن سايىن جۇزگە تارتا تەمىر تۇلپار تىركەۋگە الىنادى. ايتا كەتۋ كەرەك، ولاردىڭ ىشىندە قىلمىسقا قاتىسى بار، ارنايى تەحنيكالىق نومەرى وزگەرتىلگەن كولىكتەر دە كەزدەسكەن كورىنەدى. ال كولىگىن جاڭالاپ، قۋانىشى قوينىنا سىيماي جۇرگەن جۇرگىزۋشىلەر قۇجاتتارىن تەزدەتىپ رەتتەۋگە اسىعادى.
ەسكە سالايىق، مۇنداي قۇبىلىس بىلتىرعى قاراشا-جەلتوقسان ايلارىندا قىزۋ قارقىن العان بولاتىن. ءتىپتى سىرتتان اكەلىنگەن كولىكتەردىڭ كوپتىگىنەن ورالدا مەملەكەتتىك نومەر تاۋسىلىپ قالعان وقيعالار دا كەزدەسىپتى. دەگەنمەن، كولىك تاسۋشىلار ءنوپىرى بىلتىرعىداي كوپ ەمەس. بۇعان قازاقستان جاعىنان كولىكتىڭ تەحنيكالىق جاعدايىنا قاتىستى قويىلاتىن تالاپتاردىڭ كۇشەيۋى سەبەپ بولدى.
