ق ر تۇڭعىش پرەزيدەنتى - ەلباسىنىڭ كىتاپحاناسى مەن «قازاقپارات» ىنتىماقتاستىق جونىندەگى مەموراندۋمعا قول قويدى - فوتو، كەسكىن
«وتكەن جىلدان بەرى ءبىز حالىقارالىق اقپارات اگەنتتىگى اتالا باستادىق. وعان نە تۇرتكى بولدى؟ ءبىز الدىمىزعا مىناداي ماقساتتار جۇكتەپ وتىرمىز. ءبىزدىڭ پرەزيدەنت قازاقستاندا عانا ەمەس، سونىمەن بىرگە جاھاندىق اۋقىمداعى كوشباسى بولىپ تابىلادى. ەلباسى الەمگە G- Global, يادرولىق قارۋدى تاراتپاۋ، ەتنوسارالىق، مادەنيارالىق، كونفەسسياارالىق ىنتىماقتاستىق جانە دوستىق سىندى جاھاندىق باستامالاردى ۇنەمى العا جىلجىتىپ كەلەدى. سوندىقتان دا ءبىز پرەزيدەنتىمىزدىڭ باستامالارىن الەمگە پاش ەتۋ ءۇشىن حالىقارالىق اگەنتتىككە اينالدىق»، دەدى مەموراندۋمدى راسىمدەۋ بارىسىندا د. دياروۆ.
سونىمەن قاتار ول بۇگىنگى تاڭدا اگەنتتىك جاڭالىقتارى الەمنىڭ ەكى جۇزگە جۋىق ەلىنە تارالاتىندىعىن، جىلدان جىلعا تانىمالداعى ارتىپ كەلە جاتقاندىعىن باسا اتاپ ءوتتى.
ءوز كەزەگىندە ب. جۇمابەكوۆ نازاربايەۆ ورتالىعىنىڭ ەلىمىزدىڭ جەتەكشى بۇقارالىق اقپارات قۇرالدارىمەن ءدال وسىنداي مەموراندۋم جاساسقانىن اتاپ ءوتتى.
«مەنىڭشە، بۇگىن ءبىز وسىناۋ مەموراندۋمعا قول قويۋ ارقىلى الدىمىزعا مەملەكەت باسشىسىنىڭ ءورشىل يدەيالارىن تەك قازاقستاندا عانا ەمەس، سونىمەن بىرگە الەمدىك قوعامداستىقتا ىلگەرىلەتۋ ماقساتىن قويامىز دەپ سەنەمىن»، - دەدى ورتالىقتىڭ اتقارۋشى ديرەكتورى.
مەموراندۋمعا قول قويۋ راسىمىنەن كەيىن «قازاقپارات» قىزمەتكەرلەرى كىتاپحاناعا ساياحات جاسادى.
اۆتور: مارلان جيەمباي
