مەككەگە تىكەلەي رەيستەردىڭ اشىلۋى قازاقستاندىق قاجىلاردىڭ قارجىسىن ۇنەمدەيتىن بولدى
بۇل تۋرالى بۇگىن قازاقستان مۇسىلماندارى ءدىني باسقارماسىندا بولعان باسپا ءسوز ماجىلىسىندە ايتىلدى.
قازاقستان مۇسىلماندارى ءدىني باسقارماسىنىڭ قاجىلىق ميسسياسىنىڭ ءتوراعاسى سەرىكباي قاجى وراز ساۋد ارابيا كورولدىگىنە بارعان رەسمي ساپار اياسىندا «Flynas» اۋە كومپانياسى ءتوراعاسىنىڭ ورىنباسارى، «ناس» حولدينگىنىڭ باسشىسى احمات سۇلتانمەن كەلىسسوزدەر جۇرگىزىپ، ەكىجاقتى كەلىسىم-شارتقا قول قويدى.
كەلىسسوز بارىسىندا قوس تاراپ قازاقستان قاجىلارىن ساۋد ارابيا كورولدىگىنىڭ «Flynas» اۋە كومپانياسى تاسىمالدايدى دەپ ۋاعدالاستى. ەندى قاجىلىق ساپارعا شىعاتىن ازاماتتار الماتىدان جيددا جانە مەدينە قالاسىنا، نەمەسە مەككەگە تىكەلەي رەيسپەن جەتكىزىلەدى.
«شاماسى كەلگەن، بالاعات جاسىنا جەتكەن، جاعدايى بولىپ وتىرعان ءمۇمىن مۇسىلمان ءۇشىن قاجىلىق - پارىز. قاجىلىققا باراتىن ازامات ەڭ باستىسى اللاتاعالانىڭ بىزگە بۇيىرعان امالدارىن، پارىزدارىن وتەۋى كەرەك. كەلگەننەن كەيىن دە ەلدىڭ ىشىندە، قوعام ورتاسىندا، سول قاجى اتىنا سايكەس جۇمىسىن، ەلمەن قارىم-قاتىناسىن جالعاستىرۋى كەرەك»، - دەدى ق م د ب ءتوراعاسىنىڭ ورىنباسارى، نايب-ءمۇفتي سەرىكباي قاجى وراز.
وتانداستارىمىز سىيىمدىلىعى 375 ادام بولاتىن ەيربۋس 330, 300 جولاۋشىعا ارنالعان بوينگ-767, جانە 210 ادامعا ارنالعان بوينگ-757 ۇشاقتارىمەن ۇشاتىن بولدى.
ايتا كەتەيىك، قازاقستان تاراپىنان بەلگىلەنگەن سكات اۋە كومپانياسى جولاۋشىلاردى جەتكىزۋدەن باس تارتتى.
تىكەلەي رەيستەر قاجىلىققا نيەتتەنگەندەردىڭ ۋاقىتىن ۇنەمدەيتىن بولدى. بۇعان دەيىن قازاقستاندىقتار جولدا انكارا، شاردجا قالالارىندا توقتايتىن. جول اراسى 18 ساعاتقا دەيىن سوزىلاتىن. ەندى 6 ساعاتتىڭ كولەمىندە جيدداعا جەتەتىن بولدى. سونداي-اق تىكەلەي رەيستەردىڭ اشىلۋى قاجىلاردىڭ قارجىسىن ۇنەمدەۋگە مۇمكىندىك بەرەدى. بۇرىن ەڭ جوعارعى پاكەت قۇنى 4200 ا ق ش دوللارىن قۇراسا، ەندى ول 3900 بولدى. ياعني، تۋرپاكەت قۇنى 5 پايىزعا ارزاندادى.
قازىر ەلىمىزدەگى بارلىق مەشىتتەردە قاجىلىققا نيەت ەتكەندەر اراسىندا ءتۇسىندىرۋ جۇمىستارى جۇرگىزىلىپ جاتىر. بيىل مۇسىلماننىڭ بەس پارىزىنىڭ ءبىرى - قاجىلىق ساپارى 11- قىركۇيەك پەن 15- قازان ارالىعىن قامتيدى.
اۆتور: گۇلميرا عوسمانالي
