الماتىدا «تۇرعىن ءۇي قۇرىلىس جيناق بانكىنىڭ» سالىمشىلارى پاتەرلەردىڭ ساپاسىنا قاتىستى شاعىمداندى
«العاباس» ىقشاماۋدانىندا 10 ءۇي «قولجەتىمدى باسپانا-2020» جەلىسى بويىنشا سالىنعان. جەتى ءۇي 2013 -جىلى كوكتەمدە پايدالانۋعا بەرىلدى. بىزگە پاتەر كىلتى تابىس ەتىلدى، اكىمدىكتىڭ ادامدارى بولدى، كوميسسيا قابىلدادى.
جىلۋ، سۋ بولعان جوق، ءبىراق كەيىن قوستى. قازىر ىستىق سۋ جوق، سۋىق سۋدى دا وشىرمەكشى. بىزدە گاز جوق. ءۇيدى تۇرعىزعان كومپانيا 30 ميلليون قارىز سياقتى، ال زاردابىن ءبىز كورىپ وتىرمىز، - دەيدى تۇرعىنداردىڭ ءبىرى نازىم ادەنوۆا. - كۇردەلى جوندەۋسىز مۇندا تۇرۋ مۇمكىن ەمەس - قابىرعالار قوپارىلىپ، سىلاق ءتۇسىپ جاتىر، قۇبىرلار شىعىپ تۇر، ليفت جۇمىس ىستەمەيدى. (...) ءبىز ءۇيدى سالعان كومپانيامەن جانە اكىمدىكپەن كەزدەستىك، ءبىراق ولار ەشقانداي شەشىمگە كەلگەن جوق، نە ىستەيمىز، بىلمەيمىز»، - دەپ نارازىلىعىن ءبىلدىردى ايەل.
ۇيدەگى باسپالداقتار. «العاباس» ىقشاماۋدانىنىڭ تۇرعىندارى جولداعان سۋرەت
تۇرعىن ءۇي قۇرىلىس جيناق بانكىنىڭ باسپا ءسوز قىزمەتىندەگىلەردىڭ ايتۋىنشا، بانك پايدالانۋعا بەرىلگەن ۇيلەردىڭ ساپاسىنا جاۋاپ بەرمەيدى. «ۇيلەردى قالانىڭ قۇرىلىس باسقارماسى تۇرعىزادى، ولار تەندەر جاريالاپ، ءۇيدى تۇرعىزاتىن كومپانيانى انىقتايدى. سوندىقتان بارلىق سۇراق سولارعا»، - دەدى باسپا ءسوز قىزمەتىندەگىلەر.
بۇل جاعدايعا قاتىستى «جەر ولجا» كومپانياسىنىڭ پرەزيدەنتى ۋسەين حاسانوۆ تۇسىنىك بەردى. «سۋ مەن جارىققا قاتىستى شوت قاتەلەسىپ ءبىزدىڭ كومپانياعا كەلدى. ءقازىر بۇل انىقتالىپ جاتىر، ماسەلە شەشىلە سالا، قوسادى. ال گاز، وزدەرىڭىز بىلەتىندەي، تۇرعىنداردىڭ بارلىعى كوشىپ كەلىپ، تەستتەر مەن تەكسەرۋلەر جۇرگىزىلگەننەن كەيىن بەرىلەدى. شاعىم، ول ءاردايىم بولادى. بارلىعى قالىپقا كەلتىرىلىپ جاتىر، جوندەيمىز. بىرەۋدىڭ ەسىگىنىڭ تۇتقاسى سىنعان، ەندى بىرىندە تاعى بىردەڭە. مۇنىڭ بارلىعى جاقىن ارادا قالىپقا كەلتىرىلەدى»، - دەپ مالىمدەدى كومپانيا باسشىسى.
ۇيلەردەگى كرانداردان اعىپ تۇرعان سۋ. «العاباس» ىقشاماۋدانىنىڭ تۇرعىندارى جولداعان سۋرەت
ايتا كەتەيىك، قالالىق قۇرىلىس باسقارماسىنان بۇل جايتقا قاتىستى تۇسىنىك الۋ ازىرشە مۇمكىن بولمادى.
